Կոնվերս Բանկը ձեռնամուխ է եղել Հայաստանում էներգաարդյունավետ բնակշինարարության խթանման KfW ծրագրի 4-րդ փուլի իրականացմանը

Արմինֆո. Հայաստանում էներգաարդյունավետ բնակշինարարության խթանման նպատակով Կոնվերս Բանկը սկսել է ՀՀ-ում Բնակարանային ֆինանսավորման նոր ծրագիր: Վարկավորման Ծրագիրն իրականացվում է Ազգային հիփոթեքային ընկերության հետ Կոնվերս Բանկի համագործակցության շրջանակներում:

Ինչպես ԱրմԻնֆո գործակալությունը տեղեկացվել է Բանկի մամուլի ծառայությունից,

«ՀՀ-ում Բնակարանային ֆինանսավորման 4 փուլի շրջանակներում  վարկավորումը հնարավորություն է ընձեռում բարելավել բնակարանային պայմանները, տան կառուցապատման կամ վերանորոգման ժամանակ նորագույն տեխնոլոգիաների կիրառման միջոցով լավագույնս ջերմամեկուսացնել բնակարանը, անցնել  էներգախնայողության, ինչպես նաև ձեռք բերել էներգաարդյունավետության դաս ունեցող (A+ -ից բարձր) կենցաղային տեխնիկա»,- ասացին Բանկում՝ հավելելով, որ հատկապես հեռավոր բնակավայրերի բնակիչների համար վարկավորման  մատչելի պայմանների ստեղծումը , ինչպես նաև շինարարության և վերանորոգման աշխատանքներում էկոլոգիապես մաքուր, էներգաարդյունավետ նյութերի օգտագործումը բանկի վարկավորման քաղաքականության կարևորագույն բաղադրիչներից են:

«ՀՀ-ում Բնակարանային ֆինանսավորման 4 փուլի շրջանակներում շրջանակում hիփոթեքային վարկավորում է իրականացվելու երկու ուղղությամբ՝ «Բնակարանային  էներգաարդյունավետ վարկեր» և «Բնակարանային մարզային վարկեր»:  Վերջին վարկատեսակով էներգաարդյունավետության ապահովման պարտադիր պահանջ չի առաջադրվում: Հաճախորդներին  տրամադրվելու են առավելագույնը 25 մլն դրամի չափով վարկեր՝ առավելագույնը 20 տարի ժամկետով և 11 տոկոս տարեկան դրույքաչափով»,- նշել են Կոնվերս Բանկում:

Նշվեց նաև, որ Կոնվերս Բանկն և Ազգային Հիփոթեքային ընկերությունը սկսել են համագործակցել 2010թ-ից՝ տարբեր ծրագրեր իրականացնելով բնակարանային վարկավորման ոլորտում:

Հիշեցնենք, որ հիփոթեքային ծրագրի 4-րդ փուլի իրականացման շրջանակներում, որը մեկնարկել է 2017-ի փետրվարի 1-ին, Հայաստանը KFW-ից ստացել է 20 մլն. եվրո: Այս փուլում ծրագրի գործընկերներն են 5 բանկեր և 3 ունիվերսալ վարկային կազմակերպություններ`ԱԿԲԱ Կրեդիտ Ագրիկոլ Բանկը, Կոնվերս բանկը, Հայբիզնեսբանկը, Ինեկոբանկը, Արդշինբանկը, «Առաջին հիփոթեքային ընկերություն» ՈւՎԿ, «Գլոբալ Կրեդիտ» ՈՒՎԿ և «Կամուրջ» ՈւՎԿ: Միջոցները մասնակիցներին կտրամադրվի Ազգային հիփոթեքային ընկերությունից (ԱՀԸ), որը կոչված է վերաֆինանսավորել հիփոթեքային վարկերը: Կանխատեսվում է, որ KfW միջոցները կարելի է տեղեբաշխել 2 տարում, նույնիսկ անկում ապրող տնտեսության պայմաններում: Այս տարի ծրագիրը տարբերվում է իր ուղղվածությամբ, որպես, ուղենիշ է վերցված էներգաարդյունավետության բարձրացումը և բնակարան գնելու ակտիվացումը մարզերում: 4-րդ փուլիշրջանակներում միջոցների 2/3-ը նախատեսվում է ուղղել էներգաարդյունավետության բարձրացման աշխատանքներին (պատուհանների, դռների փոխարինում, պատերի ջերմամեկուսացում, արևային և ֆոտոգալվանային վահանակների տեղադրում և այլն):

Նշենք, որ Կոնվերս բանկը և Ազգային Հիփոթեքային Ընկերությունը համագործակցում են 2010 թվականից, տարբեր ծրագրեր իրականացնեկով բնակարանային վարկավորման ոլորտում: ԱՀԸ ստեղծվել 2009-ի հունիսի 16-ին, ՀՀ Կենտրոնական բանկի կողմից, հիփոթեքային վարկերի վերաֆինանսավորման նպատակով:

Ըստ ԱրմԻնֆո գործակալության`Հայաստանի Բանկերի և Վարկային կազմակերպությունների Ռենկինգի, հիփոթեքային միագումար պորտֆելը 2017 թվականի հունվարի 1-ին կազմել է 327.5 մլրդ դրամ ($ 676,7 մլն), որից 43%-ը կամ ավելի քան 140 մլրդ դրամն ապահովել են վերաֆինանսավորման ընկերությունները`«Ազգային հիփոթեքային ընկերություն» և «Մատչելի բնակարան երիտասարդներին» ընկերությունները, ինչպես նաև «Առաջին հիփոթեքային ընկերություն» և «Ֆիդես» հիփոթեքային վարկային ընկերությունները: Բանկերի և նշված վարկային կազմակերպությունների հիփոթեքային վարկավորման ընդհանուր պորտֆելի տարեկան աճի տեմպերը դանդաղել են`37% -ից մինչև 31%: ԱՀԸ վերաֆինանսավորվան ընդհանուր ծավալը 2017-ի հունվարի 1-ին կազմել է ավելի քան 53 մլրդ.դրամ (2-րդ տեղը հիփոթեքային վարկային ընկերությունների շարքում), տարեկան աճը`39%: ԱՀԸ ակտիվների կառուցվածքում վարկային պորտֆելի մասնաբաժինը հասել է 93%: Կոնվերս Բանկի հիփոթեքային պորտֆելը 2017 թվականի հունվարի 1-ին կազմել է 20.7 մլրդ դրամ (2-րդ տեղը բանկային հատվածում), տարեկան աճը`ընդամենը 1%: Կոնվերս Բանկի վարկային պորտֆելի կառուցվածքում հիփոթեքի մասնաբաժինը կազմել է 17%: (ՀՀ դրամի հաշվարկային փոխարժեքը 31.12.2016թ. դրությամբ կազմել է 483,94 դրամ / $ 1).