Հինգշաբթի, 6 Ապրիլի 2017 16:03

Արմինֆո. Այսօր կառավարության նիստում անդրադառնալով թուրքմենական պատվիրակության առաջիկա այցին՝ վարչապետ Կարեն Կարապետյանը համապատասխան հանձնարարականներ է տվել կառավարության անդամներին: Մասնավորապես, դիմելով ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանին, վարչապետն ասել է. «Ամփոփում եք ամբողջ նյութերը: Ես ազդակներ ունեմ, որ իրենք շատ լուրջ աշխատում են: Արտաքին գործերի նախարարության միջոցով ճշտում եք թուրքմենական պատվիրակության այցի ժամկետները, կազմը և նախապատրաստվում եք»:

 

Հիշեցնենք, որ մարտի 27-28-ը վարչապետ Կարեն Կարապետյանը պաշտոնական այցով մեկնել էր Թուրքմենստան: Թուրքմենստանի նախագահ Գուրբանգուլի Բերդիմուհամեդովի հետ հանդիպմանը Հայաստանի վարչապետը քննարկել էր տնտեսության տարբեր հարցեր: Կարեն Կարապետյանը և Գուրբանգուլի Բերդիմուհամեդովը համոզմունք էին հայտնել, որ տնտեսական համագործակցությունը կարող է խթանել երկկողմ առևտրաշրջանառության աճը: Գուրբանգուլի Բերդիմուհամեդովն իր աջակցությունն էրհայտնել երկու երկրների միջև քննարկվող փոխշահավետ ծրագրերի իրականացմանը: Կողմերը պայմանավորվել էին քննարկումները շարունակել ապրիլին՝ Երևանում, աշխատանքային խմբերի մակարդակով: 

 

Իսկ մինչև Հայաստանի պատվիրակության այցը հաղորդվել էր, որ Հայաստանը մտադիր է Թուրքմենստանի հետ քննարկել համագործակցության հեռանկարային նախագծեր, որոնք քննարկվել են մարտի 14-ին Երևանում հայ-թուրքմենական տնտեսական համագործակցության միջկառավարական հանձնաժողովի հերթական նիստում: Ավելի վաղ հաղորդվել էր, որ Աշխաբադը Թեհրանին առաջարկել է օրական մինչև 15 մլն խմ ավելացնել գազային սվոփի ներկայիս ծավալը Հայաստանի և Ադրբեջանի համար: Հունվարի 13-ին մամուլի ասուլիսում պատասխանելով ԱրմԻնֆո-ի հարցին` վարչապետ Կարեն Կարապետյանը հայտարարել էր, որ Հայաստանի կառավարությունն աշխատում է հանրապետություն գազի մատակարարման տարբեր սվոփային սխեմաների շուրջ: Վարչապետի ասելով, Հայաստան գազի սվոփային մատակարարումները քննարկվել են 2017 թվականի առաջին աշխատանքային օրը` Իրանի և Թուրքմենստանի դեսպանների հետ:

 

Ռուսաստանից Հայաստան բնական գազի մատակարարման միակ ուղին, որն անցնում է Վրաստանի տարածքով, մշտապես քննարկումների առարկա է դառնում` Մոսկվայի և Թբիլիսիի միջև հարաբերությունների զարգացման համատեքստում: Այդպիսով, Իրանի տարածքով թուրքմենական գազի սվոփային մատակարարումները Հայաստան հանրապետության էներգետիկ անվտանգության ապահովման լավագույն եղանակն է: Ընդ որում, թվում է, թե հենց սվոփային մատակարարումները կարող են Հայաստանը զերծ պահել ինչպես Մոսկվայի և Թբիլիսիի միջև հավերժ տարաձայնություններից, այնպես էլ «Գազպրոմի» թոփ-մենեջերների չափից դուրս մեծ ախորժակներից:

 

Նշենք, որ Հայաստանի ազգային վիճակագրական ծառայության տվյալներով, Հյաստանի և Թուրքմենստանի միջև  արտաքին առևտրի շրջանառությունը 2016 թվականին կազմել է 12 մլն  դոլար` 32,8% տարեկան անկմամբ: Ընդ որում, արտահանումը կազմել է 5,8 մլն դոլար` 66,9% տարեկան անկմամբ, ներմուծումը` 6,2 մլն դոլար` 18,6% տարեկան անկմամբ: