Արմինֆո. ՎՏԲ-Հայաստան Բանկը գործարկում է վարկավորման հատուկ առաջարկ, որի շրջանակներում ՀՀ Ճանապարհային ոստիկանության աշխատակիցները կստանան մի շարք արտոնություններ:
Ինչպես ԱրմԻնֆո գործակալությունը տեղեկացվել է Բանկի մամուլի ծառայությունից, այսուհետ ՀՀ Ճանապարհային ոստիկանության աշխատակիցները կարող են ստանալ վարկային գիծ՝ սկսած 11.5% -ից և սպառողական վարկ՝ սկսած 14.5%-ից: Վարկային սահմաչափը կախված է ՀՀ Ճանապարհային ոստիկանության աշխատակցի զբաղեցրած պաշտոնից` հասնելով մինչև 4 մլն. ՀՀ դրամ: Վարկային գիծը տրամադրվում է մինչև 3 տարի, իսկ սպառողական վարկը` մինչև 5 տարի մարման ժամկետով: Վարկի տրամադրման որոշումը կայացվում է առավելագույնը 1.5 աշխատանքային օրվա ընթացքում:
Վարկը ստանալու համար անհրաժեշտ է ներկայացնել փաստաթղթերի նվազագույն փաթեթ`անձը հաստատող փաստաթուղթ (այդ թվում` վկայական), սոցիալական քարտ կամ հանրային ծառայությունների համարանիշ /կամ վերջինիս բացակայության մասին տեղեկանք/:
Բացի արտոնյալ պայմաններով վարկային պրոդուկտներից` ՀՀ Ճանապարհային ոստիկանության աշխատակիցներին տրամադրվում են նաև անվճար աշխատավարձային քարտ, անվճար SMS և Ինտերնետ բանկինգ, ինպես նաև քարտի դրական մնացորդի դիմաց 3% (AMD) և 2% (USD) հաշվեգրման հնարավորություն:
Հաճախորդներին ընձեռվում է նաև այլ բանկերից վարկերի գնման/տեղափոխման հնարավորություն: Առաջարկի մասին ավելի մանրամասն տեղեկություններ կարելի է ստանալ, այցելելով ՎՏԲ-Հայաստան Բանկի 65 մասնաճյուղերից որևէ մեկը կամ զանգահարելով Բանկի միասնական տեղեկատվական կենտրոն` 87-87 հեռախոսահամարով:
Ըստ ԱրմԻՆֆո գործակալության` Հայաստանի Բանկերի Ֆինանսական Վարկանիշների, 2017 թվականի հունվարի 1-ի դրությամբ ՎՏԲ-Հայաստան Բանկը մանրածախ վարկավորման ծավալով գտնվում է առաջատար եռյակում, արձանագրելով 78.01 մլրդ դրամի ծավալ: Բանկի վարկային ընդհանուր պորտֆելում մանրածախի մասնաբաժինը կազմել է ավելի քան 47%: Իսկ մանրածախ վարկավորման ընդհանուր ծավալներում ՎՏԲ-Հայաստան Բանկի մասնաբաժինը շուկայում հասնում է 11%-ի:
Հիշեցնենք, որ «ՎՏԲ-Հայաստան Բանկ» ՓԲԸ ՎՏԲ միջազգային ֆինանսական խմբի մասնակից է դարձել 2004թ. ապրիլին: «ՎՏԲ Բանկ» ԲԲԸ հանդիսանում է «ՎՏԲ-Հայաստան Բանկ» ՓԲԸ 100% բաժնետոմսերի փաթեթի միանձնյա բաժնետերը; Բանկը հիմնական ցուցանիշների մի ամբողջ շարքով մշտապես ներառվում է ՀՀ բանկային համակարգի առաջատարների թվի մեջ: Ներկա դրությամբ Բանկն ունի 67 մասնաճյուղ, իր ներկայությունն ապահովելով ոչ միայն մայրաքաղաքում, այլև մարզերում: