«Ռուսգիդրո» ընկերությունն մտադիր է քննարկել Սևան-Հրազդան ՀԷԿ-երի կասկադը վաճառելու հնարավորությունը

Արմինֆո. «Ռուսգիդրո» ընկերության վարչությունն առաջիկայում մտադիր է քննարկել Սևան-Հրազդան ՀԷԿ-երի կասկադը վաճառելու հնարավորությունը, քանի որ համարում է այն ոչ պրոֆիլային ակտիվ: Այդ մասին հայտնում է FinanZ.ru պորտալը, հղում կատարելով «Ռուսգիդրոյի» գլխավոր տնօրենի առաջին տեղակալ Ջորջ Ռիժինաշվիլուն:

Նրա խոսքով, առաջիկա 2-3 ամսում ընկերությունը մտադիր է գնահատել ակտիվն ու առաջարկությունների փաթեթ ձևավորել պոտնեցիալ գնորդների համար: «Մենք ունենք Սևան-Հրազդանի կասկադը Հայաստանում, որը մտադիր ենք առաջիկայում օտարել: Դա ոչ պրոֆիլային ակտիվ է», -ասել է Ռիժինաշվիլին: Նա հավելել է, որ դեռևս ընկերությունն ակտիվի գնահատում չի կատարել, սակայն մտադիր է դա անել մոտ ապագայում՝ 2-3 ամսում: «Մենք դեռևս ներքին գնահատում չենք կատարել, քանի որ ֆինանսական մոդելի վերլուծություն է կատարվում, սակայն օտարման մասին որոշումը բավականին կայուն է», -ասել է նա:

Նշենք, որ ներկայումս Կասկադում ընթանում է Երևան ՀԷԿ-1-ի վերահագեցման և արդիականացման ծրագրի իրականացումը: Հիմնական սարքավորումներն արդեն ստացվել են և առաջիկայում սպասվում է մնացածի ստացումը: Մոնտաժային աշխատանքներն ընթանում է ժամանակացույցից ավելի արագ տեմպերով: Ընկերության ներդրումային արժեքը գերազանցում է 50 մլն.դոլարը: Միջոցները պետք է ներգրավվեին Ասիական զարգացման բանկից (25 մլն.դոլար) և Վերակառուցման և զարգացման եվրոպական բանկից (25 մլն.դոլար): Սևանի ՀԷԿ-ի արդիականացման համար նախատեսվում է ներդնել 1,7 մլրդ դրամ, Հրազդանի ՀԷԿ - 778 մլն դրամ, Արգել ՀԷԿ- 1,3 մլրդ դրամ, Արզնի ՀԷԿ - 658 մլն դրամ, Քանաքեռ ՀԷԿ - 283 մլն դրամ Երևան-1 ՀԷԿ - 16.3 մլրդ դրամ, Երևան-3 ՀԷԿ - 13 մլն դրամ: Ներդրումները մյուս ուղղություններով կկազմեն 406 մլն.դրամ: Կասկադի լիակատար արդիականացման համար պահանջվում է ներդնել մոտ 1.5 մլրդ.դոլար:

«Միջազգային էներգետիկ կորպորացիա» ՓԲԸ-ն գրանցվել է 2003 թվականի մայիսի 8-ին: Այն դարձավ ԻՆՏԵՐ ՌԱՕ ԵԷՍ-ի առաջին արտադրող ընկերությունը: 2003 թվականի հուլիսի 17-ին ընկերությանը հանձնվեց «Սևան-Հրազդան կասկադ» ՓԲԸ համալիրը, իսկ 2011 թվականի մարտի 24-ին`«ՌուսՀիդրո» ԲԲԸ-ն արտերկրում հիդրոգեներացիոն ակտիվների ձեռքբերման և զարգացման ռազմավարության շրջանակներում ձեռք բերեց «ՄԷԿ» ՓԲԸ բաժնետոմսերը, որը Հայաստանի հիմնական էլեկտրաարտադրողներից մեկն է:

«Միջազգային էներգետիկ կորպորացիա» ՓԲԸ գույքային համալիրն ընդգրկում է Սևան-Հրազդան կասկադի յոթ հիդրոէլեկտրակայանները: Կայանները օգտագործում են Հրազդան գետի բնական հոսքը, ինչպես նաև ոռոգման նպատակով ջրի բացթողումները Սևանա լճից: Կասկադի բոլորը ՀԷԿ-երը գտնվում են աշխատանքային վիճակում: Սահմանված հզորությունը կազմում է 561 ՄՎտ, իսկ արտադրա-տեխնոլոգիական հզորությունը`500 մլն կՎտ/ժամ, ինչը կազմում է Հայաստանի Հանրապետության ներքին սպառման մոտ 10%