Երեթշաբթի, 25 Ապրիլի 2017 19:50

Արմինֆո. Վարչապետ Կարեն Կարապետյանի մոտ տեղի է ունեցել խորհրդակցություն, որի ընթացքում քննարկվել են տեղական արտադրության զարգացմանն ուղղված մի շարք հարցեր:

 

Ինչպես ԱրմԻնֆո գործակալությանը տեղեկացվել է ՀՀ կառավարության մամուլի ծառայությունից, կառավարության ղեկավարին են ներկայացվել ներմուծումը տեղական արտադրանքով փոխարինելու ուղղությամբ կատարվող աշխատանքները, հնարավորություններն ու ծավալները: Նշվել է, որ այժմ առարկայական կազմվում են այն ապրանքների խմբերը, որոնց ուղղությամբ հնարավոր է կազմակերպել այդ գործընթացը: Առաջարկվել է ձևավորել համապատասխան հարթակ, որտեղ ակտիվ շփումների միջոցով տեղական արտադրողը կկարողանա գտնել իր սպառողին, այդպիսով խթանելով արտադրությունը: 

Վարչապետը նշել է, որ հարցին պետք է ցուցաբերել լուրջ, հետևողական ուշադրություն և ավելացրել. «Անհրաժեշտ է խելացի տարբերակ մշակել, որպեսզի մրցակցությունը չխաթարվի, բայց մենք ներուժ, հեռանկար ունեցող ֆերմերին պետք է օգնենք զարգանալ, խրախուսենք արտահանման աճը»,- ասել է Կարեն Կարապետյանը:

 

Ըստ ՀՀ Ազգային վիճակագրական ծառայության տվյալների, 2016-ին Հայաստանի արտաքին առևտրաշրջանառության դինամիկան անկումից հետո արձանագրել է 7.4% աճ, արտահանման 20% և ներմուծման 1.6% աճի հաշվին: 2017 թվականի I եռամսյակում Հայաստանի արտաքին առևտրաշրջանառությունը տարեկան կտրվածքով աճել է 17.4%, մասնավորապես, արտահանումն աճել է 16.5%, իսկ ներմուծումը`17.9%, մինչդեռ մեկ տարի առաջ, 2016-ի I եռամսյակում ներմուծման ծավալների 15.9% անկման հետևանքով  արտաքին առևտրի շրջանառությունն արձանագրել էր 3,8% անկում, չնայած արտահանման ծավալների 26.3% աճին: