Ուրբաթ, 28 Ապրիլի 2017 14:32

Արմինֆո. Հայաստանում դիտվում են բնակելի շենքերի տանիքներին ֆոտովոլտաժային կայանքների ներդրման ֆենոմենալ տեմպեր: Ապրիլի 28-ին լրագրողներին այդ մասին հաղորդել է էներգետիկ ենթակառուցվածքների և բնական պաշարների փոխնախարար Հայկ Հարությունյանը:

Նրա ասելով, այսօրվա դրությամբ, 100 բնակելի շենքերի տանիքներին արդեն տեղադրվել են նման կայանքներ: Ոլորտի զարգացման գործում ներգրավված են շուրջ 30 խոշոր և մանր ընկերություններ, որոնք լավ փորձ են ձեռք բերել: Կա նաև արևի պանելների արտադրության գործարանի կառուցման ներդրումային ծրագիր: Նրա ասելով, այսօր այդ ոլորտը որակապես նոր մակարդակում է` մեկ տարվա վաղեմության համեմատ:

Բացի այդ, տեղադրվել է ավելի քան 2 հազար արևային ջրատաքացուցիչ: Այս տարվա մարտին Հայաստանում հայտնվել է առաջին «արևային գյուղը»: Խոսքը վերաբերում է Արմավիրի մարզի Լեռնամերձ համայնքին, որի 80 տների տանիքներին տեղադրվել են արևային ջրատաքացուցիչներ և, դրանով իսկ, լուծվել են համայնքի բնակիչների տաք ջրին առնչվող խնդիրները: Գյուղի ևս 20 տների տանիքներին տեղադրվել են ֆոտովոլտաժային կայանքներ, բաժանվել են LED արդյունավետ լամպեր: Ծրագրի իրագործմանն ուղղորդվել է ընդամենը 40 մլն դրամ:

Ինչպես նշել է Հայկ Հարությունյանը, Հայաստանւի և Ղարաբաղի 12 սահմանամերձ գյուղեր  լիովին ապահովվել են LED լամպերով: Այդ գյուղերից վերջինը Ղարաբաղի Մատաղիսն է: Ամեն շաբաթ նման ծրագրեր են իրագործվում այս կամ այն գյուղում: Ծրագրի խոշոր մասնակիցներ են կառավարությունը, ՀԷՑ ՓԲԸ, առանձին գործարարներ: «Այժմ նախապատրաստվում ենք այդ ծրագրի զանգվածային կիրառման», - ընդգծել է փոխնախարարը:

Ավելի վաղ  ԱրմԻնֆո-ի հետ հարցազրույցում նա նշել էր, որ արևային էլեկտրաէներգիայի ավելցուկն օրվա ընթացքում փոխհատուցվում է ՀԷՑ կողմից` գիշերային ժամերին: Մինչև 150 կՎտ հզորությամբ արևային էլեկտրակայանների տերերը կարող են ցանցին էլեկտրաէներգիա մատակարարել առանց ԱԱՀ և, իրենց մատակարարումների հաշվին ստանալ էլեկտրաէներգիայի դիմաց հաշիվների դուրս գրումներ: Այդ առնչությամբ փոփոխություններ են կատարվել հինգ տարբեր օրենքներում: Նման կայանների տերերը ազատվել են լիցենզիաների, սարքավորման ներկրման համար պետական տուրքների վճարումից, ցանցն անվճար փոխարկում է իրականացնում: Արդյունքը` այն առևւտրային բանկերի և միջազգային ֆինանսական ինստիտուտների դրական արձագանքը , որոնք համաձայնել են սկսել ֆինանսավորում: Արդեն կա 4-5 հատուկ վարկային ծրագիր, որոնք նկատակաուղղված են տեխնոլոգիաների զարգացմանը: Առավել ևս, որ ոլորտը չի նախատեսում նախնական ներդրումներ: Առևտրային բանկերի վարկային պայմանները ձևավորվել են այնպես, որ լրացուցիչ ամսավճարներ չեն եղել: Փաստորեն, էլեկտրաէներգիայի այն ծավալները, որոնք ուղղորդվում են ցանց, վարկի վճարումն է: Քաղաքացիների որոշ պասիվությունը նման պայմաններում, պարզապես, անտրամաբանական է: Բացի այդ, մինչև 1 մեգավատ հզորությամբ փոքր արևային էլեկտրակայանների համար սահմանված սակագինը հավասար կլինի 1 կՎտ/ժ դիմաց 46,64 դրամի: Նպատակը շուկայի բացումն է մինչև 1 ՄՎտ հզհորությամբ փոքր  արևային էլկետրակայանների կառուցման համար: Այդ սակագինը առավելագույնս մոտեցված է լավ վարկային ռեսուրսներ ներգրավելու հնարավորությանը: