Ուրբաթ, 5 Մայիսի 2017 16:26

Արմինֆո. Երևանը բանակցություններ է վարում Նյու Դելիի հետ Եվրոպա-Կովկաս-Ասիա տարանցիկ միջանցքի ստեղծման նախագծում Հնդկաստանի ներգրավվածության շուրջ : Այդ մասին մայիսի 5-ին հայտարարել է տրանսպորտի, կապի և  տեղեկատվական տեխնոլոգիաների նախարար Վահան Մարտիրոսյանը՝ պատասխանելով ԱրմԻնֆո-ի հարցին:

Նրա խոսքով, անցած տարեվերջին հաջողությամբ իրականացվեց Եվրոպայից Հայաստանի տարածքով Իրան բեռների տեղափոխման պիլոտային ծրագիրը: «Նախագիծը հաջողված էր՝ թե ժամանակային, թե գնային տեսակետից»,- ընդգծել է նախարարը: Նա հայտնել է, որ ներկայումս  Թեհրանում է գտնվում նախարարության և «Հարավկովկասյան երկաթուղու» պատվիրակությունը, որն իրանցի բեռնափոխադրողների հետ գործարար համաժողովում քննարկում է հիշյալ ուղեգծի ընդլայնման հնարավորությունը: «Գլխավորը դրա կոմերցիոն գրավչությանը հասնելն է»,- նշել է Վ. Մարտիրոսյանը՝ ավելացնելով, որ բանակցությունների հաջողության դեպքում դրան կմիանան նաև հնդկական ընկերությունները:

Հիշեցնենք, որ 2016 թվականի նոյեմբերի 23-ին Իրանը Հայաստանի տարածքով, Եվրոպայից եկող տրանսպորտային միջանցքով, ստացել է առաջին բեռը, որը եկել է Գերմանիայից: Հեռանկարում նախատեսվում է, որ այս ուղին կփոխարինի Թուրքիայի տարածքով գնացող ճանապարհին: «Երկու բեռնատար կոնտեյներ Իրան է ժամանել Հայաստանի սահմանով: Կոնտեյներներն ուղարկվել են Համբուրգից` թուրքական երթուղու համեմատ ավելի կարճ ճանապարհով:

Թեհրանն ու Անկարան արդեն վաղուց տարանցման շուրջ տարաձայնություններ ունեն երկու հարևան երկրներում վառելիքի տարբեր գների առնչությամբ: Բացի այդ, ընդհանուր սահմանը հաճախ ճանապարհային խցանումների ասպարեզ էր տարանցիկ բեռնատարների համար: Սահմանին հերթը հասնում է 15 կմ: Հարևան երկրների մաքսային մարմինների  պաշտոնատար անձանց ստորագրած համաձայնագրերն այդպես էլ չկարողացան լուծել այդ խնդիրը: Իրանի կառավարությունն Անկարայից անվտանգության երաշխիքներ է պահանջել իրանական բեռնատարների համար, սակայն արդյունքն անբավարար էր, ինչը հանգեցրել է անբավարար վստահության, որ Թուրքիան ի զորու է դադարցնել բռնությունը: Հետևաբար, Իրանի ճանապարհների և քաղաքային զարգացման նախարարությունը ցամաքային բեռնափոխադրումներ իրականացնող ընկերություններին խորհուրդ է տվել խուսափել Թուրքիայի տարածքով անցնող երթուղիներից: Նախարարությունը բեռնատարների վարորդներին հորդորել է օգտագործել երկու այլընտրանքային երթուղի. մեկը` Ադրբեջանով, Ռուսաստանով և Բելառուսով, մյուսը` Հայաստանով, Վրաստանով, Սև ծովով, այնուհետև Ռումինիայով կամ Բուլղարիայով: ՊարզվեԼ Է, որ Հայաստանի տարածքով անցնող նոր երթուղով բեռնափոխադրումների արժեքը 1-2%-ով էժան է` համեմատած թուրքական երթուղու հետ: Մուլտիմոդալ փոխադրումների նախագծի շրջանակում նախատեսվում է կազմակերպել ավտոմոբիլային տրանսպորտով իրանական բեռների փոխադրում Հայաստանի տարածք (Երասխ), որտեղից` երկաթուղային տրանսպորտով մինչև Վրաստանի սևծովյան նավահանգիստներ, իսկ այնտեղից` լաստանավով մինչև Եվրոպա: