Չորեքշաբթի, 10 Մայիսի 2017 14:22

Արմինֆո. «Մեր ծրագրերում բոլոր ներդրումային ծրագրերն ու ակնկալիքները հստակ նշված են»,- Ավստրիայի Հանրային ռադիոյին հարցազրույցում հայտարարել է ՀՀ վարչապետ Կարեն Կարապետյանը՝ խոսելով նախատեսվող 3,2 մլրդ դոլար ներդրումներ աղբյուրների մասին:

Մասնավորապես, ինչպես հիշեցրել է վարչապետը, մոտակա տարիներին նախատեսվում է3,2 մլրդ դոլարի միջոցներ ներդնել հինգ հիմնական աղբյուրներից` մասնավոր բիզնեսի ներդրումներ, վարկեր, դոնորների ծրագրեր, պետբյուջե, համայնքային բյուջեներ։ «Մենք իրատեսական ենք համարում 2017 թ. ընթացքում 830-840 մլն դոլարի նախագծերի իրականացումը»,- հայտարարել է նա:

«Մենք գիտակցաբար ենք հրապարակել այս թվերը, գիտակցելով, որ հասարակությունը մեզանից հաշվետվություն է պահանջելու։ Մենք հատուկ ենք շատ բարձր նշաձող սահմանել, որը ստիպում է թիմի բոլոր անդամներին աշխատել առավելագույն լարվածությամբ»,- ասել է նա: Որպես ակնկալվող ներդրումների օրինակներ՝ կառավարության ղեկավարը նշել է Lydian ընկերության ներդրումները մեր հանքարդյունաբերության մեջ։ «Շատ նախագծեր ունենք, որոնք վերաբերում են Հայաստանի մարզերում աղբի վերամշակման ենթկառուցվածքների ստեղծմանը։ Կան ծրագրեր` կապված ջերմոցային տնտեսությունների, ճանապարհաշինության, պղինձի ձուլման գործարանի կառուցման հետ»,- նշել է վարչապետը: «Մենք հավանական ներդրողներին ասում ենք, որ, Հայաստան գալով, նրանք նաեւ հնարավորություն են ստանում դուրս գալ Եվրասիական միության, ինչպես նաեւ Իրանի շուկա, որի հետ մենք այժմ ստեղծում ենք ազատ տնտեսական գոտի սահմանին»,- ասել է Կարեն Կարապետյանը:

Հիշեցնենք, որ 2017 թ. փետրվարին վարչապետ Կարեն Կարապետյանը հայտարարել էր առաջիկա տարիներին 3.2 մլրդ դոլարի ներդրումների ներգրավման հնարավորության մասին: Դրանցից 830 - 840 միլիոնն սպասավում է այս տարի: Մինչդեռ օտարերկրյա ուղղակի ներդրումները Հայաստանի տնտեսությունում 2016 թվականին նվազել են մինչև $ 90 մլն՝ վերջին 5 տարիներին տարեկան կրճատվելով 40-50%: