Beeline-ն ընդլայնում է սպառողական վարկավորման ոլորտում գործընկեր բանկերի ցանցը. ցուցակը համալրել է ԻՆԵԿՈԲԱՆԿ-ը

Արմինֆո. Beeline-ը հայտարարել է սպառողական վարկավորման ոլորտում «ԻՆԵԿՈԲԱՆԿ» ՓԲԸ-ի հետ համագործակցության մեկնարկի մասին: Ինչպես ԱրմԻնֆո-ին հաղորդեցին ընկերության մամուլի ծառայությունից, հեռախոսներ, սմարթֆոններ, պլանշետներ և Beeline գրասենյակներում վաճառվող այլ սարքավորումներ ձեռք բերելու համար հաճախորդներին հասանելի են վարկավորման մի քանի տեսակ: Մասնավորապես, վարկերը կարող են տրամադրվել մինչև 36 ամիս ժամկետով և սկսած 0 տոկոս տարեկան տոկոսադրույքով: Beeline-ի հաճախորդները կարող են ստանալ 30.000 դրամից մինչև 1 մլն. դրամ արժողությամբ վարկեր: 

«Beeline-ը շարունակում է հոգ տանել հաճախորդների հարմարավետության մասին` ձգտելով առաջարկել առավելագույնս ձեռնտու գներ և պարզ ու հարմար պայմաններ: Հավատարիմ մնալով մեր նպատակին մենք մշտապես ընդլայնում ենք մեր գործընկերների ցանկը և ձգտում ենք անել, այնպես, որ վարկավորման պայմանները շուկայում լինեն առավելագույնս մրցունակ, իսկ ձևակերպման գործընթացը արագ և հարմարավետ», - նշել է Հայաստանում Beeline-ի գլխավոր տնօրեն Անդրեյ Պյատախինը:   

Նշենք, որ յուրաքանչյուր ամիս Beeline-ի գրասենյակներից ուղարկվում է ավելի քան 4500 հարցում ապառիկ պայմաններով սարքավորումներ ձեռք բերելու համար:  «ԻՆԵԿՈԲԱՆԿ»-ի կողմից տրամադրվող ապառիկից կարելի է օգտվել Beeline վաճառքի և սպասարկման բոլոր գրասենյակներում:

Ներկայումս, Beeline վաճառքի և սպասարկման գրասենյակներում ապառիկ պայմաններով սարքավորումներ կարելի է ձեռք բերել հետևյալ բանկերի միջոցով՝ Յունիբանկ,  ԱԿԲԱ-ԿՐԵԴԻՏ ԱԳՐԻԿՈԼ բանկ, ԻՆԵԿՈԲԱՆԿ:

Լրացուցիչ տեղեկատվություն կարելի է ստանալ` զանգահարելով 0611 անվճար համարին կամ մոտակա Beeline գրասենյակում: 

ԱրմԻնֆո ԼԳ պատրաստած «Հայաստանի բանկերի ֆինանսական վարկանիշի» տվյալների համաձայն, ԻՆԵԿՈԲԱՆԿ-ն ընդգրկված է առաջատար հնգյակում ըստ սպառողական վարկավորման ծավալի`49.8 մլրդ դրամ կամ բանկի վարկային պորտֆելի 30.3%: 2016 թվականին ԻՆԵԿՈԲԱՆԿ-ը  42%-ով ավելացրել է սպառողական վարկերի պորտֆելը: Սպառողական վարկավորման գծով առաջատար հնգյակում են նաև Յունիբանկը (1-ին դիրք) եւ «ԱԿԲԱ-Կրեդիտ Ագրիկոլ Բանկը» (4-րդ դիրք): Յունիբանկի վարկային պորտֆելում  սպառողական վարկերի բաժինը հասնում է 48.4%-ի, իսկ «ԱԿԲԱ-Կրեդիտ Ագրիկոլ Բանկինը»` 26,1%-ի: 2016 թվականին Յունիբանկի սպառողական վարկավորման ծավալն ավելացել է 10,2% -ով, իսկ «ԱԿԲԱ-Կրեդիտ Ագրիկոլ Բանկինը»` 4,6%-ով: Բանկերի սպառողական վարկերի միագումար ծավալում ԻՆԵԿՈԲԱՆԿ-ի բաժինը կազմում է 10.1%, Յունիբանկինը` 13.6%, իսկ  «ԱԿԲԱ-Կրեդիտ Ագրիկոլ Բանկինը»` 11,2%:

«ԱրմենՏել» ՓԲԸ-ն (Beeline ապրանքանիշ) հանդիսանում է «Վեոն» ընկերությունների խմբի մի մասը, որը հանդիսանում է աշխարհի խոշորագույն ինտեգրված օպերատորներից մեկը: Ընկերությունների խումբն ընդգրկում է մի շարք հեռահաղորդակցության ընկերություններ, որոնք մատուցում են ինչպես անլար և ամրակցված կապի տեխնոլոգիաների լայն շրջանակի վրա հիմնված ձայնային կապի ու տվյալների հաղորդման, այնպես էլ լայնաշերտ ինտերնետ հասանելիության ծառայություններ ավելի քան  200 մլն. բաժանորդների Ռուսաստանում, Իտալիայում, Ուկրաինայում, Ղազախստանում, Ուզբեկստանում, Տաջիկստանում, Հայաստանում, Վրաստանում, Ղրղզստանում, Լաոսում, Ալժիրում, Բանգլադեշում և Պակիստանում,: «ՎիմպելԿոմ» խմբի ընկերությունները ծառայություններ են մատուցում «Beeline», «Киевстар», «Wind», «Mobilink», «Banglalink» և «Djezzy» ապրանքանիշերի ներքո: «Վեոն»-ի բաժնետոմսերը շրջանառվում են NASDAQ բորսայում VIP նշումով: Մանրամասներին կարելի է ծանոթանալ www.veon.com կայքում: