Դեսպան. Հայաստանի տնտեսությունում ամերիկյան ներդրումների ներուժը գնահատվում է $8 մլրդ

Արմինֆո. Հայաստանի տնտեսությունում ամերիկյան ներդրումների ներուժը գնահատվում է $8 մլրդ: Այդ մասին մայիսի 17-ին վերականգնվող էներգետիկայի զարգացման համաժողովի ժամանակ հայտարարել է ՀՀ-ում ԱՄՆ դեսպան Ռիչարդ Միլսը:

Նրա խոսքով, ԱՄՆ նոր վարչակազմը շահագրգռված է Հայաստանի հետ առևտրատնտեսական համագործակցության զարգացմամբ, փոխադարձ ապրանքաշրջանառության ավելացմամբ և ներդրումների ներգրավմամբ՝ շահույթ ստանալու նպատակով:

«Հայաստանը և վերջինիս էներգետիկ համակարգը վերջին 25 տարիների ընթացքում մեծ աճ են արձանագրել:   Երբ ես մտածում եմ այս ոլորտի  առաջիկա 25 տարիների մասին, ոգևորություն եմ ապրում, քանզի գիտեմ, որ այդ զարգացումները նաև այսօր և այստեղ ձևավորվող գործընկերությունների արդյունքն են լինելուե, - ասել է ՀՀ-ում ԱՄՆ դեսպան Ռիչարդ Միլսը, ով համաժողովում հանդես է եկել բացման խոսքով: 

Մեկօրյա այս համաժողովը նպատակ ուներ ամրապնդել ամերիկյան ու հայկական ընկերությունների միջև հետզհետե ընդլայնվող կոմերցիոն կապերը և Հայաստանի էներգետիկ ոլորտի օպերատորներին ծանոթացնել առաջատար ամերիկյան ընկերությունների հետ, որոնք համաժողովում ներկայացնում էին այս ոլորտում իրենց նորագույն տեխնոլոգիաները:

Կանաչ, վերականգնվող էներգիան, որը վերջին տարիներին աճել է, հետզհետե ավելի շատ տեղ է զբաղեցնում Հայաստանի էներգետիկ ոլորտում: 2010-ից 2015թ. Հայաստանում հոսանքի արտադրությունը աճել է 20%-ով, որն ինչպես փաստել է դեսպան Միլսը, հիմք է տալիս ԱՄՆ դեսպանությանը Հայաստանում ներդրումային հնարավորություններ տեսնել ամերիկյան ընկերությունների համար: «Ինչպես ձեզնից շատերը գիտեն, մենք այս տարի հայ-ամերիկյան հարաբերությունների 25-ամյա հոբելյանն ենք նշում: 25 տարի առաջ ԱՄՆ պետքարտուղարությունում ես նորանկախ Հայաստանի Հանրապետության հետ կապված հարցերով էի զբաղվում, շատ լավ եմ հիշում այդ ժամանակները: Ձեր մեջ էլ կարծում եմ կան այն տարիքի մարդիկ, ովքեր կհիշեն, որ անկախության առաջին տարիներին Հայաստանում էներգետիկ իրավիճակը շատ անկայուն էր: Հոսանքի անջատումները կանոնավոր բնույթ ունեին: Մարդիկ ծառեր էին հատում, որպեսզի տները ջեռուցեին: Իրական ճգնաժամ էր: Սակայն Հայաստանը մթության ու սղության առաջ տեղի չտվեց, այլ բարեկամների ու գործընկերների օգնությամբ, ինչպիսին է՝ Միացյալ Նահանգները, կարողացավ դառնալ մի երկիր, որն ի վիճակի է հոգալ սեփական կարիքները, և դեռ ավելին, կարող է արտահանել էլեկտրաէներգիայի ավելցուկը», - ասել է դեսպան Միլսը:

Նա ընդգծել է էներգետիկ դիվերսիֆիկացման ու կանաչ էներգիայի արտադրությունը խրախուսելու ուղղությամբ ՀՀ կառավարության արժեքավոր աշխատանքը, այդ թվում և հունվարին կազմակերպված Արևային էներգետիկայի ներդրումային համաժողովը: Դեսպանը նաև նշել է այս ոլորտում ԱՄՆ-ի ու Հայաստանի գործակցության մասին, մասնավորապես՝ անցած ամիս հայաստանյան պաշտոնյաների ու մասնավոր հատվածի ներկայացուցիչների համար կազմակերպված ճանաչողական այցը դեպի ԱՄՆ, որտեղ նրանց ներկայացվել է արևային էներգիայի արտադրության լավագույն փորձը:

Համաժողովին իրենց փորձը ներկայացնելու և Հայաստանում առկա գործարար հնարավորություններին ծանոթանալու համար ներկայացուցիչներ էին գործուղել յոթ ամերիկյան ընկերություններ՝ Հանիվել Բիլդինգ Սոլյուշենս, Հանիվել Սմարթ Էներջի, ՄաքԼին Փաուեր Սիսթեմզ, Ֆերսթ Սոլար Փաուեր Սոլյուշենս, Կատերպիլար, Ջեներալ Էլեկտրիկ և Կոնտուր Գլոբալ: Համաժողովին զեկուցումներով հանդես եկան նաև Միջազգային ֆինանսական կորպորացիայի, Գերմանիայի զարգացման KfW բանկի, Ամերիա բանկի, շվեյցարական Meeco Group-ի և ՀՀ կառավարության ներկայացուցիչները: 

«Առաջնորդելով վերականգնվող աղբյուրների օգտագործմամբ էներգետիկ ոլորտի դիվերսիֆիկացման և էներգախնայողական ծրագրերին ուղղված աշխատանքները՝ ՀՀ կառավարությունը մշակել և ներդրել է մեխանիզմներ և ծրագրեր, որոնք թույլ են տալիս զարկ տալ վերականգնվող և արևային էներգիայի աճին Հայաստանում: Իսկ ԱՄՆ կառավարությունը պատրաստ է շարունակել գործակցությունը Հայաստանի հետ, ինչպես եղել է վերջին 25 տարիների ընթացքումե, - ասել է դեսպան Միլսը: