Չորեքշաբթի, 17 Մայիսի 2017 17:41

Արմինֆո.  «ՓՄՁ ներդրումներ ՈՒՎԿ» ունիվերսալ վարկային կազմակերպությունն անցյալ տարվա ընթացքում վարկեր է տրամադրել Հայաստանի մոտ 50 փոքր և միջին ձեռնարկություններին: Ինչպես մայիսի 17-ին Երևանում կայացած մամուլի ասուլիսում հայտարարել է ընկերության գործադիր տնօրեն Արթուր Բադալյանը, ընթացիկ 2017 թվականին ՈւՎԿ-ն արդեն տրամադրել մոտ 20 վարկեր, որոնց ընդհանուր գումարը կազմում է 1 մլրդ դրամ: Ըստ Բադալյանի, վարկային կազմակերպության ակտիվները 2016-ի վերջին կազմել են շուրջ 12.5 մլրդ դրամ, սեփական կապիտալը`1.8 մլրդ դրամ: Ընդհանուր առմամբ, վերջին 7 տարիների վարկավորման ընթացքում ստեղծվել է շուրջ 850 նոր աշխատատեղ:

Ինչպես տեղեկացրել է ՈւՎԿ ներկայացուցիչը, վարկերը տրամադրվում են մինչև 7 տարի մարման ժամկետով, միջինը`12% տարեկան տոկոսադրույքով, ՀՀ դրամով, 3 - 4 տարի տրամադրվում է շրջանառության համալրման համար, 7 տարի`կապիտալ ծախսերի, ինչպես նաև 2 տարի`արտոնյալ ժամկետի համար: Վերջին 4 տարիներին կազմակերպությունը 3%-ով սուբսիդավորել է արտահանումային ձեռնարկություններին տրամադրվող վարկերը, իսկ սահմանամերձ տարածքների ձեռնարկությունների սուբսիդիաները կազմել են 7%: Ավելի մատչելի պայմաններով վարկավորելու նպատակով այսօր ընթանում են նոր ռեսուրսների ներգրավման ուղղությամբ բանակցություններ: Բացի այդ, ՀՀ գյուղնախարարության գյուղատնտեսական մեքենաների լիզինգի ծրագրի շրջանակներում սուբսիդիաները կկազմեն տարեկան 9%, որի 7%-ը սուբսիդավորվում է: Այսպիսով, ֆերմերները հնարավորություն են ստացել գյուղատնտեսական տեխնիկա ձեռք բերել լիզինգով, տարեկան 2%-ով և 3-10 տարի մարման ժամկետով (փոքր գույքը`3 տարով, տրակտորները`6, կոմբայնները`10 տարով):

«ՓՄՁ ներդրումներ» ՈՒՎԿ-ն Հայաստանում ստեղծվել է 2009 թվականի օգոստոսի 7-ին: Կազմակերպության հիմնական նպատակը փոքր և միջին բիզնեսի զարգացման խթանումն է: Կազմակերպության շահույթը 2016 թվականին կազմել է 260 մլն դրամ:

Նշենք նաև, որ Հայաստանի ակտիվ հարկատուների ցանկում ՓՄՁ սուբյեկտները կազմում են 80-90%, բայց այս ոլորտն ապահովում է երկրի հարկային մուտքերի ընդամենը 5- 6%-ը: Իսկ ՓՄՁ ոլորտի մասնաբաժինը երկրի ՀՆԱ կառուցվածքում (2013-2015 թվականներին) միջին հաշվով կազմել է 27%: