Արմինֆո. 2016 թվականին «Հայաստանի էլցանցեր» ՓԲԸ շահույթը կազմել է 23.2 մլրդ.դրամ: Այս մասին մարտի 18-ին Երևանում կայացած մամուլի ասուլիսում հայտարարել է ընկերության գլխավոր տնօրեն Կարեն Հարությունյանը, պատասխանելով ԱրմԻնֆո գործակալության հարցին:
Նրա խոսքով, ընկերության հաշվետվույթունը պատրաստվել է KPMG աուդիտորական ընկերության կողմից: Ընդ որում, շահույթը կազմված է մի քանի բաղադրիչից, որից մեկը կոչվում է գերշահույթ և գոյանում է ոչ ընկերության մեղքով: Շուկայից ձեռք բերելով ավելի էժան էլեկտրաէներգիա, ընկերության մոտ գոյանում է գերշահույթ, որը, ըստ պայմանագրերի, ենթակա նվազեցման`հաջորդ ֆինանսական մարժայի ընթացքում: Այսպիսով, ըստ տնօրենի, 23.2 մլրդ.դրամից վերադարձի ենթակա է 1.5 մլրդ.դրամը: Բացի այդ, միջոցների տնտեսման արդյունքում ընկերությունն ստացել է լրացուցիչ 1.5 մլրդ. դրամ: Հետևաբար, ընկերությունը կարող է արձանագրել գերշահույթ: «Մենք վաստակել ենք այնքան, որքան կարողացել ենք»,-նշել է Կարեն Հարությունյանը, հավելելով, որ անցյալ տարին ընկերություն եզրափակեց ցանցի ընդհանուր կորուստների 3% նվազեցումով: Նա նաև ուրախությամբ նշել է, որ հանրապետության արդյունաբերական հատվածում արձանագրվել է էլեկտրաէներգիայի սպառման ծավալների աճ: Մասնավորապես, 2012 թվականին սպառման ծավալն արդյունաբերության հատվածում կազմել է 1.018 մլրդ կՎտժ, 2013-ին `1.02 մլրդ, 2014-ին`1,24 մլրդ, 2015-ին `1,3 մլրդ, 2016-ին `1,337 մլրդ կՎտԺամ: Այսպիսով, ընդգծել է Կարեն Հարությունյանը, առավել դինամիկ աճ է նկատվել արդյունաբերական հատվածում, ինչը հիմնականում պայմանավորված է հանքարդյունաբերության ոլորտի, և մի շարք այլ ոլորտներում արտադրության զարգացման հետ: Ընդհանուր սպառման ծավալներում նվազել է սպառումը «Արցախէներգո» ընկերությունում, որը լիովին դարձել է ինքնաբավ: Փոքր-ինչ նվազել են սպառման ծավալները նաև բյուջետային կազմակերպություններում, ինչը կապված է վերահսկողության աճով: Գլխավոր տնօրենը նշել է, որ 2016-ի օգոստոսի 1-ից ընկերությունը չունի ժամկետանց պարտավորություններ, ունի պարտավորություններ նախկինում վերցրած վարկերով, որոնք $ 242 մլն-իօց նվազել են մինչև $ 147 մլն: Դա տեղի է ունեցել նաև տոկոսադրույքների վերաֆինանսավորման հաշվին, որոնք կազմել են մոտ 5%, ինչն աննախադեպ երևույթ է Հայաստանի այսօրվա շուկայում: Ընկերության հիմնական կրեդիտորներն են` Ճապոնիայի կառավարությունը, ինչպես նաև HSBC բանկը և Արդշինբանկը:
Իր հերթին, ընկերության տնօրենների խորհրդի նախագահ Կարեն Դարբինյանը նշել է, որ ընկերությունը նախատեսում է մինչև 2020 թվականը կատարել 200 մլն. դոլարի ներդրումներ, ինչը թույլ կտա կորուստները հասցնել 9%-ից ցածր մակարդակի: Բայց այսօր արդեն արձանագրվել է ոչ վատ արդյունք`9,7%, ինչը հաջողվել է ցանցի օպտիմալացման հաշվին: Նրա խոսքով, 2020-ին կհաջողվի ցանցի կորուստները հասցնել 8,2-8,5%-ի, ինչի արդյունքում տարեկան կտնտեսվի 1,5 մլրդ.դրամ, որն ամբողջովին կուղղվի վարկային պորտֆելի մարմանը: Միևնույն ժամանակ, առևտրային կորուստները հավասարվել է զրոյի, իսկ տեխնիկական կորուստները, որոնք պահանջում է խոշոր ներդրումների ներգրավում, կազմել են 9,7%: Օգտագործված էներգիայի դիմաց վճարների հավաքագրման մակարդակը կազմում է 99,2%: Ըստ Կարեն Դարբինյանի, արդյունաբերության հատվածի մասնաբաժնի ավելացումը սպառման ընդհանուր ծավալներում պայմանավորված է նաև ստվերային տնտեսության կրճատումով:
«Հայաստանի էլեկտրական ցանցեր» ՓԲ ընկերությունն ստեղծվել է 2002թ. մայիսին չորս պետական տարածաշրջանային էլեկտրաէներգիայի բաշխման և իրացման ցանցերի («Երևանի էլեկտրական ցանցեր», «Հյուսիսային էլեկտրական ցանցեր», «Հարավային էլեկտրական ցանցեր» և «Կենտրոնական էլեկտրական ցանցեր») միաձուլման արդյունքում: Ընկերությունը հիմնականում զբաղվում է էլեկտրաէներգիայի բաշխմամբ և իրացմամբ: Ցանցերի ընդհանուր երկարությունը կազմում է 36 հազ. կմ: Ընկերությունը Հայաստանի Հանրապետության տարածքում ունի էլեկտրաէներգիայի բաշխման բացառիկ արտոնագիր: Էլեկտրաէներգիայի բաշխումն իրականացվում է ՀՀ հանրային ծառայությունները կարգավորող հանձնաժողովի կողմից հաստատագրված սակագներով: Ընկերությունը սպասարկում է մոտ 985 000 սպառողի:-