Վարդան Արամյան. Երկրի բյուջեի լրացուցիչ եկամուտները կուղղվեն ենթակառուցվածքների`ճանապարհների և ոռոգման համակարգերի զարգացմանը

Արմինֆո. Երկրի բյուջեի 50 մլրդ.դրամի լրացուցիչ եկամուտները ՀՀ կառավարությունը մտադիր է ուղղել ենթակառուցվածքային նախագծերին: «Կարծում եմ, որ ավելի արդարացված կլինի այսօր այդ գումարը ներդնել և ստանալ հավելյալ արժեք, որը, արդեն հետագայում, կարելի է ուղղել պետական պարտքի սպասարկմանը»,-ԱրմԻնֆո գործակալության հետ հարցազրույցում հայտարարել է ՀՀ ֆինանսների նախարարի ժ.պ. Վարդան Արամյանը:

Ըստ Արամյանի, քանի որ հարկային մուտքերը տարվա առաջին եռամասյակում արդեն 13 մլրդ.դրամով գերազանցել են բյուջեով ամրագրված ցուցանիշները, կառավարությունն ընդունել է բյուջեի կապիտալ ծախսերն ավելացնելու մասին որոշում: Տնտեսական ակտիվությունը նույնպես գերազանցել է սպասելիքները, արձանագրելով 6-6.6% աճ: «Իսկ կառավարությունը տարեկան կտրվածքով ակնկալում է 50 մլրդ.դրամի լրացուցիչ հարկային մուտքեր, հետևաբար, նախատեսում է այդքանով ավելացնել կապիտալ ծախսերը, ինչը թույլ կտա 2018 թվականի տնտեսական աճի համար պլանավորել ավելի բարձր ցուցանիշներ»,-ասել է Արամյանը, նկատելով, որ այսօր կառավարությունն ակնկալում է ՀՆԱ աճի ավելի բարձր ցուցանիշներ, քան դրանք ամրագրված են երկրի 2017 թվականի բյուջեով:

Միևնույն ժամանակ, նրա խոսքով, կառավարությունում չեն մոռանում, որ նման «բարձունքներ» Հայաստանի տնտեսությունն արձանագրել էր նաև 2016 թվականի առաջին կիսամյակում, որից հետո վրա հասավ տնտեսական անկման փուլը: Արամյանը բազմաթիվ անգամ հայտարարել է, որ տնտեսական ակտիվության ցուցանիշը կարող է մի փոքր դանդաղել, ելնելով անցյալ տարվա կեսերի իր աճի բազային արդյունքից: Բացի այդ, ինչպես պարզաբանել է նախարարը, Հայաստանի տնտեսությունն ավանդաբար կախման մեջ է գտնվում ռուսականից, և այնտեղի բացասական միտումներն ուշացումով անդրադառնում են տեղի տնտեսության վրա: «Մի րոպե պատկերացնենք, որ միջազգային շուկայում տեղի է ունենում գների կտրուկ անկում, ինչն անդրադառնում է արտահանման, ֆինանսական մուտքերի վրա, իսկ արդյունքում, մենք ունենում ենք տնտեսական աճի ցածր տեմպեր: Այդ դեպքում, հակացիկլային քաղաքականության շրջանակներում, երբ պահանջարկն արդեն արձանագրել է բնական անկում, պետությունը դրա բարձրացման համար պետք է գնա այլ ճանապարհով, խելամտորեն ավելացնելով կապիտալ ծախսերը` նոր վարկերի ներգրավման միջոցով, դրանով իսկ թույլ տալով բյուջեի դեֆիցիտի որոշակի աճ»,-պարզաբանել է նախարարը:

Նա ընդգծել է, որ այդ քաղաքականության շրջանակներում բյուջեի լրացուցիչ 50 մլրդ.դրամ եկամուտները կուղղվեն ենթակառուցվածքային նախագծերին`ճանապարհներին և ոռոգման համակարգերի զարգացմանը: «Այդ ռազմավարությունն ունի իր փիլիսոփայությունը: Որքան էլ մենք այսօր մասնավոր հատվածին կոչ անենք կատարել ներդրումներ, այնուամենայնիվ, ճանապարհների և մյուս ենթակառուցվածքների համապատասխան որակի բացակայության դեպքում ծայր աստիճան բարդ է դրա վրա հույսեր դնելը: Ներդրումները պետք է մոտիվացված լինեն զարգացած ենթակառուցվածքներով»,-ընդգծել է Արամյանը:

Հիշեցնենք, որ 2017 թվականի առաջին եռամսյակում, ըստ ՀՀ ՊԵԿ ղեկավարի, արձանագրել է 255 մլրդ դրամի հարկային աննախադեպ մուտքեր, նախատեսված`242 մլրդ դրամի փոխարեն: Զգալիորեն կրճատվել է «ստվերի» ծավալը`48,8% -ից մինչև 33,2%: 2016 թվականի հոկտեմբերից մինչև 2017-ի ապրիլը Կոմիտեն ապահովել է 653.8 մլրդ.դրամի հարկային մուտքեր, ինչը 7.6% գերազանցում է 2015-2016 թվականների տարվա նույն ժամանակահատվածի ցուցանիշը: Դրանից 500.3 մլրդ դրամն ապահովել են հարկային մարմինները, իսկ 153,5 մլրդ.դրամը`մաքսայինները: Հարկային եկամուտների աճը կազմել է 43.1 մլրդ դրամ կամ 9.4%, ընդ մաքսային եկամուտներինը` 3 մլրդ դրամ կամ 1.9.%: