Փորձագետ. BRI հայեցակարգի շրջանակներում Հայաստանը կարող է զգալի դերակատարում ունենալ թվային ենթակառուցվածքների զարգացման ոլորտում

Արմինֆո. «Մեկ գոտի-մեկ ուղի» (BRI) հայեցակարգի շրջանակներում Հայաստանը կարող է զգալի դերակատարում ունենալ թվային ենթակառուցվածքների զարգացման ոլորտում: Նման կարծիք է հայտնել Եվրոպական ֆորումի և Շվեդական արդյունաբերության միջազգային գործերի գծով ներկայացուցիչ Հենրիկ Հալլագրենը, «Մետաքսե ճանապարհ-տնտեսական գոտի» սեմինարի ընթացքում, որը կազմակերպվել է մայիսի 23-ին, «Ֆրիդրիխ Էբերտ» Հիմնադրամի հայկական գրասենյակի կողմից, Երևանի մամուլի ակումբում:

Նա նշել է, որ Հայաստանի ՏՏ-հատվածը բավականին զարգացած է, և այդ ոլորտի մասնագետների գիտելիքները կարող են օգտագործվել մյուս երկրների շուկաներում: Նա ընդգծել է. «Չինացիները քիչ են խոսում թվային ենթակառուցվածքների մասին, իսկ այդ հատվածը շատ կարևոր է պետությունների համագործակցության համար այս նախաձեռնության շրջանակներում»: Նա ընդգծել է նաև Հայաստանի դերը ԵՄ-Հայաստան-Չինաստան եռակողմ հարաբերությունների կարգավորման հարցում: Նա նշել է, որ ԵԱՏՄ երկրներն ունեն սահմանափակ տնտեսություններ, բացի Ռուսաստանից և Ղազախստանից, ինչպես նաև բարձր չեն նրանց ներքին ապրանքաշրջանառութունները և երրորդ երկրների հետ առևտրի ծավալները: Դրա համար Հայաստանը պետք է ուժեղ դիրքեր ունենա, ինչի համար ինքը պետք է դառնա ռազմավարական առումով ուժեղ երկիր: Բացասական գործոնների շարքում նա նշել է ենթակառուցվածքների պակասը և էներգետիկ կախվածությունը:

Հիշեցնենք, որ 2013 թվականի աշնանը Չինաստանի նախագահ Սի Ցզինպինը ներկայացրեց «Մեկ գոտի- մեկ ուղի» ծրագրի հայեցակարգը, որն ներառում է «Մետաքսի ճանապարհի տնտեսական գոտի» և «21-րդ դարի Մետաքսե ծովային ճանապարհ» ստեղծումը: Առաջին մասի իրականացումը նախատեսվում է 2016- 2020 թվականներին, իսկ 2015 –ին արդեն սկսվեց ֆինանսական բազայի ձևավորումը, Մետաքսի ճանապարհի հիմնադրամի և Ասիական ենթակառուցվածքային ներդրումային բանկի տեսքով:

«Գոտիները և ուղիներ» ծրագրի նպատակն է`ստեղծել տարանցիկ-տրանսպորտային համակարգ, որը Չինաստանը կապում է Եվրասիական մայրցամաքի և Աֆրիկայի երկրների հետ: Հայեցակարգը նախատեսում է նաև տրանսպորտային և լոգիստիկ ենթակառուցվածքների զարգացում, ազատ առևտրի հսկայական գոտու ստեղծում, ինչպես նաև ունիկալ ֆինանսական համակարգ, համախմբելով տարածաշրջանային զարգացման բանկերը, պայմաններ ստեղծելով կապիտալի տեղաշարժի համար և ապահովելով հաշվարկներն ազգային արժույթներով, առաջին հերթին`յուաննով: Նախագծի իրականացման նպատակով Պեկինը հաստատել է «Նոր Մետաքսի ճանապարհ» $ 40 մլրդ ֆոնդը, ինչպես նաև $ 100 մլիլիոնանոց Ենթակառուցվածքների ներդրումների ասիական բանկը, որը սկսել է իր աշխատանքը 2015-ի հունիսի 29-ին: Ըստ Հալգերնի, արդեն ներդրվել է մոտ $ 50 մլրդ., իսկ առաջիկա 5 տարիներին ներդրումների ծավալը կարող է հասնել մինչև $ 500 մլրդ-ի:

Ըստ ՀՀ Ազգային վիճակագրական ծառայության տվյալների, 2016 թվականին  առևտրի շրջանառությունը Հայաստանի և Չինաստանի միջեւ նվազել է 5.7%, կազմելով $ 454.1 մլն, այդ թվում, արտահանման ծավալը նվազել է 41,7%, մինչև $ 96,4 մլն., իսկ ներմուծումն աճել է 13.2%, մինչև $ 357,7 մլն: