Հինգշաբթի, 25 Մայիսի 2017 15:41

Արմինֆո. Ֆինանսական հաշտարարի հայկական գրասենյակը բավական արդյունավետ է լուծում ֆիզիկական անձանց և ֆինանսական կազմակերպությունների միջև վեճերը: Մայիսի 25-ին, պատասխանելով ԱրմԻնֆո գործակալության հարցին, նման կարծիք է հայտնել իտալացի որակավորված մեդիատոր Կորրադո Մորան, ով Երևան է ժամանել մայիսի 25-26-ը Երևանում ընթացող` «Ֆինանսական Օմբուդսմենի Ինստիտուտն ուղղված հանրության վստահության ամրապնդմանը և ֆինանսական միջնորդության ավելացմանըե թեմայով 7-րդ կոնֆերանսին մասնակցելու նպատակով:

 

«Մենք առաջին տարին չէ, որ համագործակցում ենք հայ գործընկերների հետ: Կարող եմ ասել, մենք էլ շատ բան ունենք սովորելու Հայաստանի ֆինհաշտարարի կառույցի փորձից, ֆիզիկական անձանց և ֆինանսական կազմակերպությունների միջև վեճերի լուծման մեթոդների առումով»,-հավելել է նա:

 

Նրա խոսքով, Հայաստանում ձևավորվել է օպտիմալ, լավ կազմակերպված միջավայր, որտեղ բանկերը, ապահովագրական ընկերությունները, Կենտրոնական բանկը և Ֆինհաշտարարի գրասենյակը կարող են արագ արձագանքել պրոբլեմներին և գտնել լուծումներ: «Դուք ունեք այն, ինչը չունենք մենք»,-ընդգծել է Կ.Մորան: Մասնավորապես, նա տեղեկացրել է, որ իտալական պրակտիկայում ամենից հաճախ բողոքներ են լինում բժշկական սխալներից ապահովագրության, ինչպես նաև բանկային հատվածում, կապված բարձր տոկոսադրույքների հետ:

 

Իր հերթին, Հայաստանի ֆինհաշտարարի գրասենյակի ղեկավար Փիրուզ Սարգսյանը նշել է, որ Հայաստանում բողոքների գծով ավանդաբար առաջատարն է ապահովագրական հատվածը, տարեկան 20% միջին աճով: Պատասխանելով ԱրմԻնֆո-ի հարցին, Փ.Սարգսյանը հայտարարել է, որ հունվարից մինչև մայիսի 21-ը ֆինհաշտարարի գրասենյակն ստացել է 723 գրավոր բողոք, որից 357-ն ստացել է իր լուծում, ընդ որում, լուծումների 86.6%-ը կայացվել է հաճախորդի օգտին, վճարելով նրանց մոտ 45 մլն.դրամ:

 

«Ստացված բողոքների գերակշիռ մասը ԱՊՊԱ գծով է, որոնք էլ իրենց հերթին բաժանվում են 3 խմբերի: Մասնավորապես, դա վերաբերվում է վնասի հատուցման չափերին, ապահովագրական ընկերությունների կողմից հատուցումների չիրականացմանը և կողմերի տարաձայնություններին, կապված պատասխանատվության չափի հետ», - ավելացրել է նա: Երկրորդ տեղում են, ըստ ֆինհաշտարարի, բանկային ոլորտի բողոքները,  մասնավորապես, բանկային քարտերով խարդախությունները, իրավական հարաբերությունները սպառողական վարկերի, ավանդների շրջանակներում և այլն:

 

Ելնելով վիճակագրական տվյալներից, Փ.Սարգսյանը նշել է, որ զգալիորեն ավելացել է ֆինանսական հաշտարարի գրասենյակի մասին հանրույան իրազեկվածությունը: Այս  առումով նա նշել է, որ տարեկան գրանսվում է մոտ 6000 բողոք, որից 1600-ը`գրավոր: «Տարեկան ներկայացված բողոքների մոտ 70%-ը հաջողվում է լուծել հօգուտ դիմողի», - ասել է նա, հավելելով, որ Հայաստանում ֆինհաշտարարի գրասենյակի բացումից ի վեր, 2009 թվականի հունվարի 24-ից, գրասենյակը ֆինանսական կազմակերպությունների դեմ ստացել է 17 414 դիմում-բողոք, իսկ ֆիզիկական անձանց կատարված փոխհատուցման ընդհանուր գումարը գերազանցել է 1 մլրդ. դրամը:

 

Նշենք, որ ֆինանսական օմբուդսմեն ծառայությունը, որը Հայաստանում գործում է 2009 թվականից, տրամադրվում է անվճար, ինչի դիմաց վճարելում են իրենք, ֆինանսական հաստատությունները: Հայաստանի ֆինհաշտարարի  փորձը միջազգային գործընկերների կողմից ճանաչվել է լավագույնը ԱՊՀ տարածքում: