Անելիք Բանկի դոլարային պարտատոմսերի 2-րդ տրանշի առաջնային տեղաբաշխումն ավարտվել է նախատեսված ժամկետից շուտ

Արմինֆո. Անելիք Բանկի երկրորդ թողարկման անվանական արժեկտրոնային դոլարային պարտատոմսերը ամբողջությամբ տեղաբաշխվել են մայիսի 29-ին՝ նախապես սահմանված ժամկետից շուտ։ Պարտատոմսերը ձեռք են բերել և՛ ֆիզիկական և՛ իրավաբանական անձինք` ինչպես Երևանում, այնպես էլ մարզերում։ Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, թողարկումն արդեն ներկայացվել է ցուցակագրման գործընթացին ՆԱՍԴԱՔ ՕԷՄԷՔՍ Արմենիա բորսայում:

«Պարտատոմսերի գերակշիռ մասը՝ ավելի քան 80%, ձեռք են բերվել ֆիզիկական անձանց կողմից, ինչը վկայում է հաճախորդների խորը վստահության և բարձր ֆինանսական գրագիտության մասին։ Նախատեսում ենք շարունակել պարտատոմսերի նոր տրանշների թողարկումը»,- ասել է Անելիք Բանկի Ֆինանսական տնօրեն Ռուբեն Մելիքյանը:

Նշենք, որ երկրորդ թողարկման պարտատոմսերի ընդհանուր ծավալը կազմեց 5 մլն ԱՄՆ դոլար, շրջանառության ժամկետը՝ 24 ամիս, արժեկտրոնային եկամտաբերությունը՝ 6,25%, տոկոսների վճարման տարեկան պարբերականությունը՝ 6-ամիս:

Իսկ ՆԱՍԴԱՔ ՕԷՄԷՔՍ Արմենիա բորսայում ներկայումս շրջանառվում են Անելիք Բանկի անվանական արժեկտրոնային դոլարային և դրամային պարտատոմսերի 1-ին և 3-րդ տրանշները՝ համապատասխանաբար 5 մլն ԱՄՆ դոլար և 1 մլրդ  ՀՀ դրամ ծավալներով: Առաջին տրանշը (դոլարային) Անելիք Բանկն իր պատմության մեջ առաջին անգամ թողարկեց 2016 թվականի դեկտեմբերին: Դրանց տարեկան եկամտաբերությունը կազմում է 6.5%, շրջանառության ժամկետը` 2 տարի: Ցուցակումը ֆոնդային բորսայում առաջին թողարկումն անցավ 2017-ի հունվարի 20-ին և շրջանառվում են Abond հիմնական ցուցակում: Անելիք Բանկի դոլարային պարտատոմսերի երկրորդ թողարկումը ($ 5 մլն, տարեկան եկամտաբերությունը`6.25%, շրջանառության ժամկետը` 2 տարի) արդեն ներկայացված է ցուցակման: Երրորդ թողարկումը, ՀՀ դրամով, որը թողարկվել է այս տարվա մարտի 15-ին, որի առաջնային տեղաբաշխումն ավարտվել է ապրիլի 12-ին,  ֆոնդային բորսայում սկսեց շրջանառվել 2017-ի ապրիլի 27-ից: ՆԱՍԴԱՔ ՕԷՄԷՔՍ Արմենիա բորսայում Անելիք Բանկի պարտատոմսերի 1-ին և 3-րդ թողարկումների հետ միասին, 2017-ի մայիսի 30-ի դրությամբ շրջանառվում են կորպորատիվ պարտատոմսերի 11 թողարկողների 31 թողարկումներ: Դրանցից 19-ը (այդ թվում`15 դոլարային) կատարել են 7 թողարկող բանկեր`Արարատբանկը, Ամերիաբանկը, Արմսվիսբանկը, Հայբիզնեսբանկը, Անելիք Բանկը, Յունիբանկը և Կոնվերս Բանկը:

Հիշեցնենք, որ «Անելիք Բանկը» շուկայում գործում է 1996 թվականի հոկտեմբերից: 2016 թվականի նոյեմբերին իրականացված լրացուցիչ թողարկմից հետո Բանկի բաժնետերերի կազմը փոխվեց, միացավ կիպրոսյան FISTOCO LTD ընկերությունը, 59.68% բաժնեմասով, ինչը նվազեցրել նախկին բաժնետերերի մասնաբաժինը, դեմս Լիբանանյան ԿրեդիտԲանկ S.A.L ի, 100%-ից մինչև 40.32%: Բանկի անուղղակի մեծամասնական բաժնետերերն են հանդիսանում ֆիզիկական անձինք` Tarek J. Khalefe (CreditBank S.A.L) և Վարդան Դիլանյանը (FISTOCO ՍՊԸ):-