Մոտակա ամիսներին Իտալիայում կբացվի անցած տարի Հայաստանում ստեղծված Shaula International խորհրդատվական ընկերության ներկայացուցչությունը

Արմինֆո. Մոտակա ամիսներին Իտալիայում կբացվի անցած տարի Հայաստանում ստեղծված Shaula International խորհրդատվական ընկերության ներկայացուցչությունը, որը հանդես կգա՝ որպես Հայաստանի զարգացման հիմնադրամի /ՀԶՀ/ պաշտոնական ռեզիդենտ: Այդ մասին ԱրմԻնֆո-ի թղթակցի հետ հեռախոսազրույցում հայտնել է Shaula International ընկերության գործադիր տնօրեն Ֆաբիո Լենցին:

«Մեկ-երկու ամսվա ընթացքում մտադիր ենք ներկայացուցչություն բացել Իտալիայում և կամուրջ հանդիսանալ հայկական և իտալական գործարար շրջանակների միջև»,- ասել է նա: Shaula International-ի ղեկավարը նշել է, որ ընկերությունը կզբաղվի շուկայի ուսումնասիրման (Marketing Research) և գործարար համագործակցության իրավական ապահովման (Legal Support) հարցերով՝  նպաստելով հայ-իտալական առևտրատնտեսական և ներդրումային համագործակցությանը: Ֆ. Լենցին տեղեկացրել է, որ Shaula International-ի գործընկեր է հանդիսանում Հռոմի իրավաբանական ընկերություննեից մեկը, որը կապահովի հայկական և իտալական ընկերությունների համագործակցության իրավական կողմը:  

Shaula International-ը դեռևս գրանցված չէ տվյալների եվրոպական բազաներում և ստեղծվել է անցած տարի Հայաստանում: Իտալիայի հետ վերջինիս կապն առայժմ սահմանափակվում է համասեփականատիրոջ իտալական ծագմամբ: Ըստ որում, ընկերության պաշտոնական կայքում բացակայում է տեղեկատվություն, ինչից կարելի է ամբողջական պատկերացում կազմել վերջինիս գործունեության մասին:

Հիմնադրամի՝ ավելի վաղ ԱրմԻնֆո-ին տրամադրված պաշտոնական հաղորդագրության համաձայն, Հայաստանի զարգացման հիմնադրամի գործադիր տնօրեն Արմեն Ավակ Ավակյանը և Shaula International ընկերության գործադիր տնօրեն Ֆաբիո Լենցին ստորագրել են փոխըմբռնման հուշագիր, որի ստորագրման արարողությանը ներկա է գտնվել Հայաստանում Իտալիայի դեսպան Ջովաննի Ռիչուլին։ Shaula International-ը պատրաստակամություն է ստանձնում իտալական ընկերություններին ներկայացնել Հայաստանի բիզնես միջավայրը, արտոնյալ առևտրային ռեժիմները, երկու կողմերի բիզնեսմենների համար առավել ամուր գործնական կապերի հիմք ստեղծել: Shaula International ընկերության գործադիր տնօրենն իր հերթին նշել է. «Մենք պատրաստ ենք ամբողջ ուժով իրագործել այս նախաձեռնությունը՝ դեպի Հայաստան ավելի շատ ներդրումներ և գործարարների ներգրավելու, արտահանումը և զբոսաշրջությունը խթանելու համար»:

Նշենք, որ Հայաստանի զարգացման հիմնադրամն ստեղծվել է 2015 թվականին՝ երկրի տնտեսական աճի խթանման հիմնական առաքելությամբ։ Հիմնադրամն իր գործունեությունն իրականացնում է՝ գլխավոր նպատակ ունենալով երկրի վարկանիշի և մրցունակության բարձրացումը: ՀԶՀ-ն միաժամանակ իր ջանքերն ուղղում է ներդրումների ներգրավմանը, արտահանման խթանմանը, գործարար միջավայրի բարելավմանը, տարածքային զարգացման ծրագրերի իրականացմանը և զբոսաշրջության զարգացմանը: Կառավարական աղբյուրներից ԱրմԻնֆո-ի տվյալներով՝ օրակարգում է Հիմնադրամի փակման հարցը՝ կապված վերջինիս աշխատանքի անարդյունավետության հետ, սակայն վերջնական «դատավճիռ» դեռ չկա: 

ՀՀ Ազգային վիճակագրական ծառայության տվյալներով՝ Հայաստանի և Իտալիայի միջև արտաքին առևտրաշրջանառությունը 2016 թ. կազմել է $160.8 մլն՝ 11,2% տարեկան անկումով: Մասնավորապես, արտահանումը կրճատվել է 2%-ով՝ մինչև $31.8 մլն, ներմուծման՝ 13,2% , մինչև $129 մլն անկման պայմաններում: