Հինգշաբթի, 8 Հունիսի 2017 15:36

Արմինֆո. Հայաստանի զարգացման հիմնադրամի նախաձեռնությամբ Իտալիայի մայրաքաղաք Հռոմում հայ-իտալական միջկառավարական հանձնաժողովի առաջին նիստի շրջանակում տեղի է ունեցել «Հայաստան-Իտալիա» գործարար համաժողովը՝ երկկողմ ներդրումային և գործարար կապերն ակտիվացնելու նպատակով։ Հայ-իտալական միջկառավարական հանձնաժողով ստեղծելու որոշումը կայացվել է 2016 թ. նոյեմբերին՝ Իտալիայի արտաքին գործերի և միջազգային համագործակցության նախարար Պաոլո Ջենտիլոնիի պաշտոնական այցի շրջանակում։

 

Ինչպես ԱրմԻնֆո գործակալությանը տեղեկացվել է DFA մամուլի ծառայությունից, Հայաստանյան 26 տնտեսվարողներ իտալացի պոտենցիալ 170 գործընկերներին են ներկայացրել բիզնես-ծրագրեր, նշել ներդրումային ոլորտներ, որտեղ հնարավոր է համատեղ շահավետ գործունեություն ծավալել: Շահագրգիռ ընկերությունների միջև կազմակերպվել են հանդիպումներ՝ ներդրումային ծրագրերը և հայկական ապրանքների արտահանման հնարավորությունները քննարկելու նպատակով։ Ներկայացվել է Հայաստանում իտալական «Ռենկո» և «Սարտիս» ընկերությունների հաջողության պատմությունը։

 

«Հիմա Հայաստանում ներդրումներ անելու նպաստավոր ժամանակաշրջան է. կառավարությունն այսօր բիզնեսին ընդառաջ բազմաթիվ քայլեր է անում, բարելավում է գործարար միջավայրը, վերացնում է բյուրոկրատական քաշքշուկները։ Կոնկրետ մեր հիմնադրամը պատրաստ է ներդրումային ցանկացած փուլում գործնական աջակցություն և խորհրդատվություն ապահովել այդ թվում՝ իտալացի գործարարներին»,-նշել է Հայաստանի զարգացման հիմնադրամի գործադիր տնօրեն Արմեն Ավակ Ավակյանը՝ ավելացնելով, որ համաժողովը և B2B-ները երկրի ներդրումային հնարավորությունները ներկայացնելու նպատակով էին կազմակերպվել։

 

«Հայաստան-Իտալիա» գործարար համաժողովի առանցքում գյուղմթերքի վերամշակման, վերականգնվող էներգետիկայի, ՏՏ, կոշիկի և տեքստիլ արդյունաբերության (սարքավորումներ), զբոսաշրջության ոլորտներում Հայաստանի ներդրումային հնարավորությունների ներկայացման հարցերն են։

 

Համաժողովի շրջանակում Հայաստանի զարգացման հիմնադրամի և Իտալիայի առևտրի խթանման գործակալության (ICE) միջև ստորագրվել է փոխըմբռնման հուշագիր՝ երկկողմ առևտրատնտեսական կապերը զարգացնելու նպատակով: Հուշագրով կողմերը համաձայնել են ամրապնդել երկու երկրների գործարար շրջանակների համագործակցությունը, տեղեկատվություն փոխանակել առաջիկայում նախատեսվող միջոցառումների, գործարար այցերի, ցուցահանդեսների մասին, ինչպես նաև պայմանավորվածություն են ձեռք բերել անել հնարավորը՝ երկկողմ առևտրի և ներդրումների աճի խոչընդոտների նույնականացման և վերացման ուղղությամբ։

 

Հիշեցնենք, որ Իտալիայի արտաքին առևտրի ինստիտուտը (ICE) պետական կազմակերպություն է, որն զբաղվում է Իտալիայի և մյուս երկրների միջև առևտրի զարգացման հարցերով: Կազմակերպությունն օգնում է իտալական ընկերություներին միջազգային շուկաներ դուրս գալու հարցերում, աջակցելով արտադրական ներդրումներին Իտալիայում և արտերկրում: Բացի այդ, ICE ակտիվորեն զբաղվում է իտալացի և օտարերկրացի մենեջերների կրթությամբ, որոնք աշխատում են միջազգային շուկաներում և նպաստում «Made in Italy» ապրանքանիշի առաջխաղացմանը: ICE կենտրոնական գրասենյակը գտնվում է Հռոմում և ունի ներկայացուցչությունների մեծ ցանց Իտալիայում և արտերկրում (17 տարածաշրջանային ներկայացուցչութոյւններ 83 երկրներում):

 

Նշենք, որ Հայաստանի և Իտալիայի առևտրաշրջանառությունը 2016-ին շուրջ 160 միլիոն ԱՄՆ դոլար է կազմել, այդ թվում, արտահանումը՝ մոտ 32 միլիոն դոլար, ներմուծումը՝ 127,5 միլիոն դոլար։ Նախորդ տարի Հայաստանից Իտալիա է արտահանվել հիմնականում տեքստիլ արտադրանք, հագուստեղեն, ալյումինե նրբաթիթեղ, էթիլային սպիրտ, լիկյոր, պլաստմասե իրեր, ավտոմատ կարգավորման ու ղեկավարման սարքեր և այլն։ Հիմնականում ներմուծվել է շոկոլադ, հրուշակեղեն, մակարոնեղեն, գործվածքներ, կենտրոնական ջեռուցման կաթսաներ, նավթամթերք և այլն: Իտալիան Հայաստանի 17-րդ խոշոր ներդրումային գործընկերն է. 2016 թ. հունվար-սեպտեմբերին 103.3 միլիոն դրամի ներդրումներ են արվել:-