Գյուղտեխնիկայի լիզինգի ծրագրի շրջանակում շահառուներին տրամադրվել է 17 միավոր տրակտոր

Արմինֆո. «Հայաստանի Հանրապետությունում գյուղատնտեսական տեխնիկայի ֆինանսական վարձակալության` լիզինգի պետական աջակցության» ծրագրի  շրջանակում  հունիսի 9-ի դրությամբ շահառուներին տրամադրվել է 17 միավոր տրակտոր և 8 միավոր այլ գյուղտեխնիկա:

Ինչպես ԱրմԻնֆո-ին հաղորդեցին ՀՀ գյուղատնտեսության նախարարության տեղեկատվության և հասարակայնության հետ կապերի բաժնիցմ, տրակտորի ձեռք բերման 13 հայտ հաստատված է, ևս 19 հայտ գտնվում է ուսումնասիրության փուլում: Բացի այդ, ուսումնասիրվում է երկու ընկերությունների կողմից ներկայացված մեքենա-տրակտորային կայանի ստեղծման  ծրագրերը՝ 350 մլն դրամ ընդհանուր արժողությամբ:  «Այս պահի դրությամբ ծրագրում ընդգրկված են «ՓՄՁ ներդրումներ», «ՔԱՐԴ ԱգրոԿրեդիտ»  ՈՒՎԿ-ները և «ԱԳԲԱ Լիզինգ» վարկային կազմակերպությունը», - ասվում է հաղորդագրությունում:

Հիշեցնենք, որ «Հայաստանի Հանրապետությունում գյուղատնտեսական տեխնիկայի  ֆինանսական վարձակալության` լիզինգի պետական աջակցության» ծրագրի շրջանակում հայտերի ընդունման գործընթացը մեկնարկել էր մարտի 27-ից:  Ավելի վաղ հաղորդվել էր, որ կառավարության հաստատած ծրագրի համաձայն, Գյուղտեխնիկան տրամադրվում է 9 % տոկոսադրույքով, որից 7 տոկոսային կետը սուբսիդավորվում է պետության կողմից, արդյունքում`  շահառուները հնարավորություն ունեն տեխնիկան ձեռք բերել 2 % լիզինգային  տոկոսադրույքով` առանց լրացուցիչ որևէ վճարի: Արդյուքնմում, ինչպես ակնկալվում է, 2017 թվականին գյուղտեխնիկայի ձեռք բերմանը կուղղորդվի շուրջ 2,2 մլրդ դրամ: Առաջիկա 6 տարում լիզինգով գյուղտեխնիկայի տրամադրման ծրագրի շրջանակում սուբսիդավորման համար նախատեսվում է հատկացնել 500 մլն դրամ, իսկ արդեն 2017 թվականին` 120 մլն դրամ: Ավելի մեծ պահանջարկի առկայության դեպքում կառավարությունը խոստացել է քննարկել դրա ծավալը մեծացնելու հնարավորությունը: Ինչպես մարտի 17-ին հայտարարել էր գյուղնախարար Իգնատի Առաքելյանը, ծրագրի շահառուները կարող են գյուղտեխնիկա ձեռք բերել իրենց համար շահավետ պայմաններով` 2% տարեկան տոկոսադրույքով, 3-10 տարի մարման ժամկետով:

ԱրմԻնֆո ԼԸ պատրաստած «Հայաստանի բանկերի և վարկային ընկերությունների ֆինանսական վարկանիշի» տվյալներով, 2016 թվականին լիզինգային գործառնությունների ծավալն աճել է 11%-ով` կազմելով 16.7 մլրդն դրամ: Որպես լիիզնգային ծառայությունների հիմնական մատակարար հանդես է գալիս «ԱԿԲԱ լիզինգ» ընկերությունը, որի պորտֆելում ագրոհատվածին բաժին է ընկնում ներդրումների ընդամենը 3%-ը: