ՀՀ գյուղատնտեսության նախարարությունում կայացել է խորհրդակցություն բանկային համակարգի ներկայացուցիչների հետ

Արմինֆո. ՀՀ գյուղատնտեսության նախարար Իգնատի Առաքելյանի մոտ այսօր կայացել է խորհրդակցություն, որին մասնակցել են գյուղատնտեսության նախարարի տեղակալ Ռոբերտ Մակարյանը, Կենտրոնական բանկի ֆինանսական համակարգի կայունության և զարգացման վարչության պետ Անդրանիկ Գրիգորյանը, «ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿ» ՓԲԸ գլխավոր գործադիր տնօրեն Հակոբ Անդրեասյանը, «ՎՏԲ ՀԱՅԱՍՏԱՆ ԲԱՆԿ»-ի գլխավոր տնօրեն Յուրի Գուսևը, բանկային համակարգի այլ ներկայացուցիչներ:

Ինչպես ԱրմԻնֆո գործակալությանը տեղեկացվել է Նախարարության մամուլի ծառայությունից, աշխատանքային խորհրդակցության ընթացքում հիմնականում ներկայացվել են գյուղատնտեսությունում հակակարկտային ցանցերի ներդրման պետական աջակցության, կաթիլային ոռոգման համակարգերի ներդրման համար տրամադրվող վարկերի տոկոսադրույքների սուբսիդավորման ծրագրերին վերաբերող հարցեր:

«Գյուղատնտեսությունն այսօր համարվում է շատ ռիսկային ոլորտ՝ ներդրում կատարելու համար: Մեր ծրագրերի մի մասն ուղղված են նրան, որ ներգրավենք նաև այլ մասնակիցներ, ովքեր կկիրառեն նոր տեխնոլոգիաներ և արդյունավետ գյուղատնտեսություն կվարեն»,- նշել է ՀՀ գյուղատնտեսության նախարար Իգնատի Առաքելյանը:

Ի թիվս այլ հարցերի, ներկայացվել են նաև գյուղատնտեսական տեխնիկայի ֆինանսական վարձակալության՝ լիզինգի պետական աջակցության, գյուղատնտեսության ոլորտին տրամադրվող վարկերի տոկոսադրույքների սուբսիդավորման, գյուղատնտեսական հումքի մթերումների (գնումների) նպատակով ագրովերամշակման ոլորտին տրամադրվող վարկերի տոկոսադրույքների մասնակի սուբսիդավորման և գյուղատնտեսության ոլորտում ապահովագրական համակարգի ներդրման փորձնական ծրագրերը:

Նախարարն ընդգծել է, որ ակնկալում է համագործակցություն նշված ծրագրերի շրջանակներում:

Ըստ ԱրմԻնֆո գործակալության` Հայաստանի Բանկերի Ֆինանսական 2017 թվականի հունվարի 1-ի Վարկանիշների, գյուղատնտեսական վարկերի պորտֆելոով ավանդաբար առաջատարն է ԱԿԲԱ-Կրեդիտ Ագրիկոլ Բանկը, որի վարկային պորտֆելում այդ ոլորտը կազմում է ավելի քան 37%: Բանկային համակարգի գյուղատնտեսական վարկավորման ընդհանուր պորտֆելում ԱԿԲԱ Կրեդիտ Ագրիկոլ Բանկի մասնաբաժինը կազմել է ավելի քան 52%: Սակայն բանկը չի սահմանափակվում գյուղատնտեսության ոլորտով, ակտիվորեն ֆինանսավորելով նաև այնպիսի ոլորտներ, ինչպիսիք են`ՓՄՁ, արդյունաբերության, առևտրի, հասարակական սննդի, սպասարկման ոլորտները, ընդ որում, առաջատար լինելով նաև մանրածախ վարկավորման հատվածում: ԱԿԲԱ-ԿՐԵԴԻՏ ԱԳՐԻԿՈԼ Բանկը Հայաստանում գործում է 1995 թվականից: 2006 թվականից բանկի մեծամասնական բաժնետերն է եվրոպական խոշորագույն Credit Agricole S.A. բանկային խումբը, 15.56% բաժնեմասով, որին հաջորդում է SJSC «Sacam Internationalե-ը (Credit Agricole S.A. խմբի անդամ)` 12.44%: Բանկի կապիտալին մասնակցում են նաև Գյուղացիական փոխօգնության 10 մարզային միություններ: Մասնաճյուղրի ցանցով բանկը երկրորդն է Հայաստանում: Իր հիմնական հաշվեկշռայիին ցուցանիշներով ԱԿԲԱ-ԿՐԵԴԻՏ ԱԳՐԻԿՈԼ Բանկը գտնվում է Հայաստանի առաջատար բանկերի հնգյակում: