Հինգշաբթի, 15 Հունիսի 2017 19:19

Արմինֆո. Սևանա լճի մակարդակի իջեցումը կհանգեցնի անդառնալի հետևանքների: Հունիսի 15-ին կայացած մամուլի ասուլիսում այս մասին հայտարարել է ՀՀ ԳԱԱ ՀՀ ձկնաբուծության և հիդրոէկոլոգիայի ինստիտուտի տնօրեն Բարդուխ Գաբրիելյան: «Ես ուզում եմ դիմել բոլոր պատասխանատուներին, չի կարելի թույլ տալ, որպեսզի Սևանի ջրի մակարդակն իջնի, եթե մենք այսօր ունենանք բացասական հաշվեկշիռ, այսինքն՝ ունենանք իջեցում, ապա կունենանք անդարձելի բացասական երևույթներ Սևանա լճում՝ ջրի վատացում, ճահճացում»,-ընդգծել է նա:

 

Նրա խոսքով, վերջերս ստացվում են Սևանից ջրի բացթողումների ծավալների ավելացման առաջարկներ, մասնավորապես, կառավարության կողմից հաստատված 170 մլն.խմ-ին ուզում են ավելացնել լրացուցիչ 100 մլն.խմ, կապված ջրի պակասի հետ ջրամբարներում: Իսկ «Սևանի մասին» օրենքով նախատեսված է, որ լճի հայելին ամեն տարի պետք է ավելանա 1 սմ, նշել է գւտնականը: «Անհրաժեշտ է սահմանել հստակ ծավալ, որը չի արագացնի լճի ճահճացումը»,-նշել է նա:

 

Միևնույն ժամանակ, ջրի աղտոտվածության վրա ազդում է նաև ձկան ոչ բավարար քանակությունը լճում, ինչը պայմանավորված է ապօրինի ձկնորսությամբ: Ըստ փորձագետի, այս բոլոր գործոնները բացասական ազդեցություն են թողնում ձկան բնական վերարտադրության վրա, սիգի կամ իշխանի ձվադրության ընթացքում: «Բանը նրանում է, որ որսում են ոչ միայն խխոշոր, այլ նաև մանր ձկներին, որոնք չեն հասցրել մեծանալ: Մենք միշտ ասել ենք, որ ձուկը պետք է դիտարկվի ոչ միայն որպես արժեքավոր սնունդ, այլ նաև որպես մեր երկրի ռազմավարական պահուստ», - ասել է նա, նշելով, որ լճից  բռնված ձկների 70-80% -ը կազմում են հենց փոքր ձկները:

 

Ըստ փորձագետի, եթե տեղի ունենան փոփոխություններ, մասնավորապես, կրճատվի  ապօրինի ձկնորսությունը, ապա 3-4 տարի անց ​​հնարավոր է լճում ձկների ընդհանուր պաշարներն ավելացնել 2,5 անգամ: Մասնավորապես, նա տեղեկացրել է, որ, ըստ ուսումնասիրությունների, անցյալ տարի ձկան պաշարների ծավալը, ձկնորսությունից հետո և առանց փոքր ձկների, կազմել է ընդամենը 430 հազար տոննա:

 

Ինչ վերաբերում է խեցգետիններին, փորձագետը նշել է, որ այսօր կատարվում են խեցգետիններ բռնելու նկատմամբ սահմանված պահանջները: «Եթե խեցգետինների նկատմամբ պահանջները կատարվում են, ապա ինչու չի կարելի նման պահանջներ սահմանել նաև ձուկ բռնելուն» - եզրափակել է նա:

 

Ավելի վաղ, ՀՀ բնապահպանության նախարար Արծվիկ Մինասյանը նշել էր, որ ջրի մակարդակը Սևանա լճում 2016-ին աճել է 30 սմ-ով: Ըստ նրա, ջրի մակարդակը Սևանա լճում 2016-ի վերջին կազմել է 1900 մ 48 սմ, նախորդ տարվա համեմատ աճելով 27 սմ: Ըստ կառավարության ծրագրի, 2030 թվականին Սևանա լճի մակարդակը պետք է բարձրանա 6 մետրով:

 

Ըստ ՀՀ Ազգային վիճակագրական ծառայության տվյալների, 2016 թվականին ձկնորսության համախառն արտադրանքը տարեկան կտրվածքով աճել է 3%, մինչև 26,5 մլրդ դրամ, նախորդ տարվա 6.4% աճի համեմատ: Դեկտեմբերին որսացվել է 2 129,1 տոննա ձուկ, տարեկան աճը`7.1%, ամսական աճը`22.2%: Իսկ 2017 թվականի հունվար-ապրիլին ձկնորսության համախառն արտադրանքն աճել է 11,5 մլրդ. դրամով, տարեկան աճը`0.3%: Մասնավորապես, ապրիլին բռնվել է 1 588,1 տոննա ձուկ, տարեկան աճը` 13,9%, ամսական աճը`20%: Ավելին, բռնված ձկան ողջ ծավալն իրացվել է: