Արմինֆո. ՀՀ կառավարությունը նախատեսում է ապահովել տարեկան միջինը 5% տնտեսական աճ: Այդ մասին ասվում է ՀՀ կառավարության պաշտոնապես հրապարակված ծրագրում, որը ներկայացվել է ԱԺ հավանությանը:
Ծրագրում, մասնավորապես, ասվում է. «Հայաստանը փոքր ներքին շուկա ունեցող երկիր է, և նրա մրցունակությունը պայմանավորված է բացառապես արտաքին շուկաներում մրցունակ առաջարկ ներկայացնելու նրա տնտեսության կարողություններով: Երկիրը պետք է առաջնորդվի առաջարկի վրա
հիմնված տնտեսական աճի մոդելով, որտեղ տնտեսական աճի առանցքային շարժիչն արտահանումն է: Դրա համար հատկապես կկարևորվի արտահանման արտադրողների մրցունակության բարձրացման և այդ կերպ՝ առկա արտաքին շուկաներում նրանց դիրքերի ամրապնդման, ինչպես նաև՝ նոր արտաքին շուկաներ ներթափանցելու և դրանցում դիրքավորվելու ճանապարհով: Ծրագրային այս մոտեցումների կենսագործումը պահանջում է տնտեսության իրական հատվածի և արտահանման շուկաների դիվերսիֆիկացիա: Գործարար միջավայրի բարելավման շարունակական քայլերով պետական կարգավորումները, պետության կողմից մատուցվող ծառայություններն ու վարչարարական ընթացակարգերը կդառնան առավել պարզ, թափանցիկ և քիչ ծախսատար»:
Բարեփոխումների առանցքային նպատակադրումը երկրում այնպիսի գործարար
միջավայրի հաստատումն է, որին հատուկ են՝ անհրաժեշտ նվազագույն ծավալով, հստակության բարձր աստիճանով, համաչափ և հավասար կիրառությամբ, կայուն և կանխատեսելի կարգավորումներ: Դրանց արդյունավետ իրականացման դեպքում ակնկալվում է, որ Հայաստանն առաջիկա 4-5 տարիների բարեփոխումների արդյունքում կդիրքավորվի Համաշխարհային բանկի «Գործարարությամբ զբաղվելըե զեկույցի լավագույն 20 երկրների
շարքում:
Նախատեսվում են նաև ներդրողների շահերի պաշտպանությանն ուղղված հետևողական քայլեր՝ համապատասխան օրենսդրական բազայի կատարելագործման, ինչպես նաև ինստիտուցիոնալ բարեփոխումներ նախաձեռնելու ճանապարհով: Ծրագրի համաձան՝ ինկլյուզիվ աճին և նոր աշխատաեղերի ստեղծմանն ուղղված ներդրումային ծրագրերը կօգտվեն գործադիր մարմնի աջակցությունից:
ՀՀ կառավարությունը նպատակադրում է նաև 2017-2022 թվականներին իրականացվելիք քայլերի և միջոցառումների արդյունքում տարեկան զբոսաշրջային այցելությունների թիվը հասցնել առնվազն 3 միլիոնի: Մասնավորապես՝ մինչև 2018 թվականի ավարտը նախատեսվում է սահմանել զբոսաշրջային ծառայությունների նկատմամբ որակական նոր պահանջները և ներդնել դրանց ապահովման մեխանիզմները; մինչև 2019 թվականի ավարտը ներդնել զբոսաշրջության ռեգիստրը: Մինչև 2020 թվականի ավարտն ավարտել հանրապետության տարածքում ժամանակակից զբոսաշրջային տեղեկատվական միասնական ցանցի ստեղծման աշխատանքները; մինչև 2020 թվականի ավարտն ընդունել էկոտուրիզմի զարգացման հայեցակարգը:Նշենք, որ Հայաստանում մեկ շնչին ընկնող ՀՆԱ-ն 2017 թվականի I եռամսյակում տարեկան կտրվածքով աճել է 8,7%, մինչև 325 727 դրամ մեկ անձի համար ($ 671/629 եվրո): Ըստ ԱՄՀ վարկածի, մեկ շնչին ընկնող ՀՆԱ-ի վարկանիշում, որը հրատարակվել է 2017 թվականի ապրիլին, Հայաստանը զբաղեցրել է 115 տեղը ($ 3511): Ըստ ՀԲ-ի փորձագետների, տնտեսական բարեփոխումների իրականացման դեպքում մեկ շնչին ընկնող ՀՆԱ-ն մինչև 2020 թվականը կմնա նույն իրական մակարդակում` 4 հազ. դոլար, 2030-ին մինչև 6 հազար դոլար, իսկ 2050-ին` մինչև 12 հազար դոլար աճելու միտումով, իսկ փաստացի սցենարով այս ցուցանիշը չի գերազանցում 8 հազ.դոլարը: Ընդ որում, աղքատության մակարդակը բարեփոխումների արդյունքում մինչև 2020 թվականը ներկայիս 30%-ից կիջնի 25%, մինչև 2030-ը`10%, իսկ 2050-ին `0,2-0,3%:
Ինչ վերաբերում է աշխատավարձի աճի առնչությամբ սպասումներին, ապա մարտի 22-ին /մինչև ՀՀ-ում խորհրդարանական ընտրությունները/ ՀՀ ֆինանսների նախարար Վարդան Արամյանը թոշակներն ու աշխատավարձերը բարձրացնելու վերաբերյալ քաղաքական կուսակցությունների նախընտրական խոստումները համարել էր նախապես անիրագործելի «Եթե կա մի ռացիոնալ հնարավորություն, հավատացնում եմ ձեզ, որ մեր թիմը նախընտրական շրջանում առաջին հերթին կգնար դրան», - հայտարարել էր Վարդան Արամյանը: «Այսօր բյուջետային աշխատողների աշխատավարձերը վճարելու համար պետբյուջեից հատկացվում է 446 մլրդ.դրամ: Աշխատավարձերի բարձրացման դեպքում կպահանջվի լրացուցիչ 250-350 մլրդ.դրամ: Կենսաթոշակների վճարմանն ամեն տարի ուղղվում է 260 մլրդ.դրամ, իսկ խոստացված փոփոխությունները կպահանջեն ևս 130-140 մլրդ.դրամ: Այս ծախսերը Հայաստանի պետական բյուջեի համար միանշանակ մարտահրավերներ են»,-հայտարարել էր Արամյանը: «Հարց է առաջանում, եթե մեծ ջանքերի գնով մեկ տարում բարձրացնենք աշխատավարձերն ու կենսաթոշակները, բյուջեի բեռնվածությունն ավելացնելով 500-600 մլրդ.դրամով, ապա ինչպե՞ս ենք պատրաստվում այդ հարցը կայունացնել միջնամաժամկետ հեռանկարում: Մեկ տարվա ընթացքում հարկային բեռի 10% աճի հաշվին, թե՞ պարտքի բեռի ավելացման հաշվին: Կարծում եմ, որ դա վտանգավոր ուղի է»,-հայտարարել էր նախարարը: Վիճակագրական տվյալների համաձայն՝ անվանական աշխատավարձը Հայաստանում 2016 թվականի հունվար-դեկտեմբերին կտրուկ դանդաղեցրել է աճի տեմպերը` 2015-ի հունվար-դեկտեմբերի 7.7% աճից մինչև 1.7% 2016-ի հունվար-դեկտեմբերին, կազմելով, կազմելով 187850 դրամ ($ 391): Ըստ ԿԲ կանխատեսման, 2017 թ սպասվում է միջին անվանական աշխատավարձի 1.5% աճ, արագանալով 2018-ին մինչև 3,6-4%, իսկ 2019-ին` մինչև 4.8-5.2% (նախկինում կանխատեսվող` 2% , 5% և 6.2% փոխարեն):
Հիշեցնենք, որ Համաշխարհային բանկը Հայաստանի ՀՆԱ-ի աճը 2017 թ.-ին կանխատեսում է 2,7%, 2018-ին` 3,1%, 2019-ին `3.4%: Հայաստանի պետական բյուջեով 2017-ին երկրի ՀՆԱ աճը կկազմի 3,2%: Ըստ ՀՀ ԿԲ նորացված կանխատեսման, Հայաստանի ՀՆԱ-ի աճը 2017 թվականին կկազմի 3,2-4,4%, ԱՄՀ կանխատեսմամբ`2.9%, Fitch կանխատեսմամբ`2.1%, ԵԱԶԲ - 2.9% և Ասիական Զարգացման Բանկ - 2 2%:
Ջիհադ Ազուր. Բուռն աճի պայմաններում կարևոր է խուսափել տնտեսության գերտաքացումից, զսպել գնաճը և ամրապնդել անբարենպաստ ցնցումներին դիմակայելու ունակությունը
Հայաստանին անհրաժեշտ է արդեն փորձարկված ատոմային էներգաբլոկ. մասնագետ
Տնտեսագետ. առանց արդյունաբերության զարգացման միջնաժամկետ հեռանկարում Հայաստանում լուրջ տնտեսական աճ ակնկալելու հարկ չկա
"Սեպուհ-1" ձեռնարկությունը երկարաժամկետ հեռանկարում մտադիր է կազմակերպել գծային արտադրություն, ինչը թույլ կտա ավտոմեքենաներ արտահանել ԵԱՏՄ երկրների շուկա
Ինչպես է փոխվել միջին աշխատավարձ ստացող քաղաքացու կենսամակարդակը վերջին տարում