Վերջին չորս տարում Հայաստանի առևտրային բանկերը 650 մլրդ դրամի վարկ են տրամադրել ֆերմերներին

Արմինֆո.Վերջին չորս տարում Հայաստանի առևտրային բանկերը 650 մլրդ դրամի վարկ են տրամադրել ֆերմերներին: Այդ մասին այսօր Ազգային ժողովում հայտարարել է ՀՀ ԿԲ նախագահ Արթուր Ջավադյանը:

Նրա խոսքով, միայն սուբսիդավորված վարկերի գծով գյուղացիներին հատկացվել է 90 մլրդ դրամ՝ 5% տարեկան տոկոսադրույքով: Նախորդ տարիների համեմատ ֆերմերներին տրամադրված վարկերի տոկոսադրույքները զգալիորեն նվազել են: Բացառություն չեն կազմում նաև հիփոթեկային վարկերը, որոնց չափը այսօրվա դրությամբ կազմում է 210 մլրդ դրամ, որի կեսն արդեն տրամադրվել է: Ըստ որում, հիփոթեքային վարկերի մարման ժամկետը ավելացվել է մինչև 20 տարի՝ 12% մաքսիմալ տոկոսադրույքով:  Երիտասարդ ընտանիքների համար հիփոթեքային վարկավորման պետական ծրագրի շրջանակներում միան Երևանում տոկոսադրույքի չափը չի գերազանցում 5,6%-ը, մարզերում՝ 6,5%-ը: Ինչ վերաբերում է սպառողական վարկերին, այսօրվա դրությամբ տրամադրվել է 452 մլրդ դրամի չափով: Ըստ որում, արդյունաբերության և գյուղատնտեսության զարգացման համար վարկերը երկու անգամ գերազանցում են սպառողական վարկերի ծավալները:

ԿԲ ղեկավարը նշել է նաև, որ հանրապետության առևտրային բանկերը անհատական մոտեցում են ցուցաբերում Արմավիրի մարզի 9 համայնքների բնակիչներին, ովքեր ավելի վաղ վարկեր են ներգրավել և տուժել կարկուտից: Մի շարք դեպքերում նվազում են տոկոսադրույքները, մյուս դեպքերում՝ երկարաձգվում վարկերի վճարման ժամկետները: