Ուրբաթ, 7 Հուլիսի 2017 14:28

Արմինֆո. ՀՀ  տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանն ընդունել է Եվրոպական ներդրումային բանկի (ԵՆԲ) ներկայացուցիչներին՝ ոչ ԵՄ տարածաշրջանի հանրային բաժնի ղեկավար Սիժուխ Ժատինի գլխավորությամբ։

 

Ողջունելով ներկաներին՝ Վահան Մարտիրոսյանը նշել է, որ ԵՆԲ-ի հետ  համագործակցության ամուր հիմքեր կան և հույս հայտնել, որ ճանապարհաշինական ծրագրերի շրջանակներում ձևավորված երկկողմ գործակցությունը հետագայում ևս կշարունակվի։

 

Հանդիպման ընթացքում քննարկվել են նախարարության և ԵՆԲ-ի համագործակցության շրջանակներում իրականացվող ծրագրերի ընթացքը, մասնավորապես՝ Վանաձոր-Ալավերդի-Վրաստանի սահման (Մ-6) միջպետական մայրուղու հիմնանորոգմանն առնչվող հարցեր։

 

Նախարարն ընդգծել է, որ Հայաստանը Վրաստանին կապող այս ճանապարհն կարևոր ռազմավարական նշանակություն ունի Հայաստանի համար։ Արդեն իսկ մեծածավալ  աշխատանք է կատարվել, ճանապարհը  կառուցվում է սահմանված չափորոշիչներին համապատասխան և բարձր որակով։ Կարևոր է, որպեսզի ճանապարհի հիմնանորոգման աշխատանքներն ավարտվեն  նախանշված ժամկետների շրջանակներում, հնարավորին սեղմ ժամանակում։

 

Քննարկվել են նաև «Հյուսիս-հարավ ճանապարհային միջանցքիե ներդրումային ծրագրի Թալին-Գյումրի հատվածում աշխատանքների ընթացքին, առկա խնդիրներին վերաբերող հարցեր։

 

Հանդիպման ընթացքում անդրադարձ է եղել նաև ընթացիկ մի շարք ծրագրերի, ինչպես նաև առաջիկա համագործակցության հնարավորություններին։

 

Հիշեցնենք, որ ավելի վաղ վավերացված համաձայնագրի համաձայն՝ Հայաստանը 102 մլն եվրո կստանա Եվրոպական ներդրումային բանկից՝ Վանաձորից մինչև Վրաստանի սահման ավտոճանապարհի վերանորոգման նպատակով: Ծրագիրը ֆինանսավորվելու է Եվրոպական ներդրումային բանկի և Ասիական զարգացման բանկի կողմից համատեղ: Եվրոպական ներդրումային բանկի և Հայաստանի Հանրապետության միջև 2016թ հունվարին ստորագրվել է «Հայաստանի Մ6 միջպետական ճանապարհե ֆինանսական պայմանագիրը: Ծրագրի նպատակն է վերականգնել Մ6 միջպետական ճանապարհի՝ Հայաստանի կենտրոնական  հատվածում գտնվող Վանաձոր քաղաքի և Վրաստանի հյուսիսարևելյան սահմանին գտնվող Բագրատաշենի  միջև ընկած մոտ 90 կիլոմետր երկարությամբ հատվածը:

 

Ավելի վաղ հաղորդվել էր, որ Եվրոպական ներդրումային բանկը մտադիր է Հայաստանում կատարել մոտ 212 մլն եվրոյի ներդրումներ: Ընդ որում, միայն վերջին երեք տարիների ընթացքում ԵՆԲ-ն էականորեն ավելացրել է ներդրումների ծավալը Հայաստանում: Հայաստանի հետ Բանկի համագործակցությունը հիմնված է երեք հիմնական ոլորտներում`էներգամատակարարում, ենթակառուցվածքների զարգացում և  աջակցություն, աջակցություն ՓՄՁ ոլորտին: