Հինգշաբթի, 13 Հուլիսի 2017 18:49

Արմինֆո. Management Mix ներդրումային-խորհրդատվական ընկերության նախագահ Րաֆֆի Սեմերջյանն այսօր մամուլի ասուլիսի ժամանկ նշել է Հայաստանի ուժեղ կողմերը՝ ներդրումային գրավչության տեսակետից:

 

Ընդհանուր առմամբ դրական գնահատական տալով Հայաստանի ներդրումային միջավայրին՝ նա բացատրել է, որ եվրոպական որոշ երկրների, օրինակ՝ Շվեդիայի, Նորվեգիայի և Ֆրանսիայի, համեմատ Հայաստանի հարկային միջավայրը շատ ավելի բարենպաստ է: Սակայն, թե համեմատենք Վրաստանի և ԱՄԷ հետ, փորձագետի խոսքով, բարելավման կարիք կա: Ներդրումների ներգրավման տեսակետից, Սեմերջյանի կարծիքով, դրական են նաև հողի և անշարժ գույքի գները Հայաստանում: Միաժամանակ, փորձագետը, որպես անվիճելի ապացույց, նշել է բուհական կրթության բարձր մակարդակը ՀՀ-ում՝ ոչ բարձր աշխատավարձի պայմաններում: «Ստացվում է, որ աշխատուժը Հայաստանում էժան է գնահատվում»,- ընդգծել է նա: Խոսելով Հայաստանի այլ գրավիչ կողմերի մասին՝ Սեմերջյանը նշել է 200-միլիոնանոց շուկան՝ նկատի ունենալով ԵԱՏՄ-ին պետության անդամակցությունը, ինչը, նրա խոսքով, մեծ հնարավորություններ է ստեղծում արտադրողների համար:

 

Ըստ որում, նա նշել է, որ ներդրողներին Հայաստանն այսօր հետաքրքիր է արդյունաբերական և գյուղատնտեսական արտադրությամբ: MM ղեկավարն ավելացրել է, որ անցած տարի ներդրումներն առավելապես ուղղվել են անշարժ գույքի հատված, սակայն հետագա ներդրումային ծրագրերը կիրականացվեն ագրոհատվածում և արդյունաբերությունում: Այս առնչութամբ նա ուշադրությւոնը հրավիրել է ԱՄԷ-ից և Հարավային Աֆրիկայից գործնկերների շահագրգռվածության վրա:

 

ՀՀ Ազգային վիճակագրական ծառայության տվյալներով, 2016 թ. ընդհանուր ներդրումների զուտ հոսքը կազմել է 81.6 մլրդ դրամ՝ 31,1% տարեկան անկումով, այդ թվում՝ ՕՈւՆ-ն կրճատվել է 9,7%-ով՝ մինչև 62.7 մլրդ դրամ: