Ուրբաթ, 14 Հուլիսի 2017 14:29

Արմինֆո. 2017թ.-ի հուլիսի 14-ին Սևծովյան Առևտրի և Զարգացման Բանկի (BSTDB) անվանական, արժեկտրոնային պարտատոմսերը ցուցակվել և ընդգրկվել են ՆԱՍԴԱՔ ՕԷՄԷՔՍ Արմենիայի պարտատոմսերի հիմնական (Abond) ցուցակում: Ինչպես ԱրմԻՆֆո գործակալությանը տեղեկացվել է Բորսայի մամուլի ծառայությունից, ցուցակման պահից թույլատրվել են նշված պարտատոմսերով հասցեական առևտուրը և ռեպո գործարքների կնքումը: 

 

Բանկի պարտատոմսերի թողարկումը ներառում է 200,000 հատ անվանական, արժեկտրոնային պարտատոմս` 10,000 ՀՀ դրամ անվանական արժեքով, արժեկտրոնի 8.455% տոկոսադրույքով և 3 տարի շրջանառության ժամկետով: Պարտատոմսերը (ISIN - AMBSTBB21ER4) բորսայում կշրջանառվեն BSTBB1 բորսայական հապավմամբ:

 

Նշենք, որ 2017 թվականի հունիսի  27-ին ՆԱՍԴԱՔ ՕԷՄԷՔՍ Արմենիայում տեղի էր ունեցել Սևծովյան Առևտրի և Զարգացման Բանկի ՀՀ դրամով արտահայտված, 2 մլրդ.դրամ ծավալով, անվանական արժեկտրոնային պարտատոմսերի տեղաբաշխումը, Ինչն իր ծավալներով երկրորդ դրամային տեղաբաշխումն է Ազգային հիփոթեքային ընկերության կողմից նախորդ տարի իրականացված 2.127 մլրդ.դրամ ծավալով բոնդերի տեղաբաշխումից հետո: Տեղաբաշխման ընթացքում պահանջարկը գերազանցեց առաջարկը, կազմելով 2,691,574,896.50 ՀՀ դրամ: Թողարկումն ամբողջությամբ տեղաբաշխվել է, ինչի արդյունքում  բանկին հաջողվել է ներգրավել 2,005,573,856.5 ՀՀ դրամ: Տեղաբաշխված պարտատոմսերի կտրման գինը կազմել 10,000.13 ՀՀ դրամ, կտրման եկամտաբերությունը` 8.4545%, իսկ միջին կշռված եկամտաբերությունը` 8.3481%:

 

Նշենք, որ ներկայումս ՆԱՍԴԱՔ ՕԷՄԷՔՍ Արմենիա բորսայում, BSTDB ցուցակված պարտատոմսերի հետ միասին, արդեն շրջանառվում է 10 էմիտենտների 13 դրամային թողարկումները, ընդ որում, 6 դրամային թողարկողները բանկեր են: