Հինգշաբթի, 27 Հուլիսի 2017 10:56

Արմինֆո. Այսօրվա դրությամբ Հայկական ԱԷԿ շահագործման ժամկետի երկարաձգմանն ուղղված ծրագրի շրջանակում բոլոր միջոցառումներն իրականացվում են ժամանակացույցին համապատասխան, իսկ մի շարք դեպքերում` նույնիսկ դրա գերազանցմամբ: ԱրմԻնֆո-ի թղթակցին այդ մասին հաղորդել է ՀՀ էներգետիկ ենթակառուցվածքների և բնական պաշարների փոխնախարար Հայկ Հարությունյանը` մեկնաբանելով ծրագրի իրագործման ժամկետը  2019 թվականից մինչև 2021 թիվ հետաձգելու հնարավորությունը:

Փոխնախարարի ասելով, այժմ անհնար է արձանագրել որոշակի ժամկետներ, քանի որ աշխատանքները կայանում շարունակվում են: Հայկական ԱԷԿ պետք է Միջուկային անվտանգության կարգավորման պետական կոմիտեի լիցենզիա ստանա էլեկտրաէներգիա արտադրելու համար, և դրանից հետո միայն կարելի  է խոսել ստույգ ժամկետների մասին: Փոխնախարարը նշել է, որ արդեն պատրաստ է ՀԱԷԿ երկրորդ էներգաբլոկի շահագործման ժամկետի երկարաձգման ծրագրի ներդրումային պլանի վերաբերյալ կառավարության որոշման նախագիծը: Դրան զուգընթաց գործադիր մարմնի հաստատմանն է ներկաայցվել միջոցառումների ծրագրի նախագիծը, որը մշակվել է առաջին երկու պլանային վերանորոգման աշխատանքների արդյունքների հիման վրա: Փաստաթղթով կարգավորվում են նախագծի իրագործմանն ուղղորդվող ներդրումների ծավալները:

ԱրմԻնֆո-ի թղթակցի հետ զրույցում «Հայկական ատոմային էլեկտրակայան» ՓԲԸ գլխավոր տնօրեն Մովսես Վարդանյանը հաղորդել է, որ կայանը մտադիր է առաջարկել կառավարությանն օպտիմիզացված միջոցներ ուղղորդել 2-րդ էներգաբլոկի շահագործման ժամկետի երկարաձգման ծրագրի շարունակմանը: Նրա ասելով, նախագծի շրջանակում սարքավորումների և ծառայությունների մատակարարման համար անցկացված հայտամրցույթների արդյունքում տնտեսվել են զգալի ֆինանսական ռեսուրսներ: Այսպես, հունիսի 1-ի դրությամբ Ռուսաստանի Դաշնության կողմից 270 մլն դոլար վարկի և 30 մլն դոլար դրամաշնորհի շրջանակում արդեն հատկացված 205 մլն դոլարից կնքվել են 143 մլն դոլարի սարքավորման մատակարարման շուրջ պայմանագրեր, ինչը թույլ է տվել տնտեսել միջոցների շուրջ 34%-ը: Գնման ընթացակարգերի նախնական գնահատումն իրականացրել է նախագծի գլխավոր  կապալառուն` «Ռուսատոմ Սերվիս» ընկերությունյը, որը ներառված է «Ռոսատոմի» շղթայում: Գլխավոր տնօրենի հավաստմամբ, այդ գնահատականը հիմնվել է հիմնական սարքավորման գների վրա, որն արտադրում են ռուսական ընկերությունները: Սակայն բաց մրցույթների անցկացման արդյունքում, որոնց ռուսական ձեռնարկություններից զատ մասնակցել են Չեխիայի, Գերմանիայի, Ուկրաինայի և այլ երկրների ընկերություններ, հաջողվել է օպտիմիզացնել զգալի ֆինանսական ռեսուրսներ, որոնք, Մովսես Վարդանյանի ասելով, միանշանակ կուղղորդվեն ծրագրի շարունակմանը: Հիշեցնենք, որ այս տարվա մարտին լրացել է 3 տարին` կայանի երկրորդ բլոկի արդիականցման աշխատանքների անհրաժեշտության մասին ՀՀ կառավարության որոշման կայացման պահից ի վեր: Հայկական ԱԷԿ շահագործման ժամկետի երկարաձգման նախագծի համակարգումն իրականացնում է ««Ռոսատոմ» պետական կորպորացիայի դուստր կառույց «Ռուսատոմ Սերվիս» ԲԸ: «Ռոսատոմը» և հայ փորձագետները պայմանավորվել էին աշխատել ԱԷԿ շահագուրծման ժամկետը մինչև 2026 թիվը երկարաձգելու նախագծի իրագործման ուղղությամբ: Նախատեսվում է այդ աշխատանքներն ավարտել 2019 թվականին: Ռուսաստանն այդ նպատակների համար 270 մլն դոլարի պետական արտահանման վարկ և 30 մլն դրամաշնորհ է հատկացրել Հայաստանին: 2015 թվականի մարտին ստեղծվել է 2014 թվականի դեկտեմբերի 20-ի ՀԱԷԿ շահագործման ժամկետի երկարաձգման շուրջ միջկառավարական համաձայնագրի իրագործման Համատեղ համակարգման կոմիտե` նախագծին առնչվող գործունեության համակարգման, ժամկետների պահպանման, արդյունքների գնահատման նպատակով: Առ այսօր տեղի է ունեցել Համատեղ համակարգման կոմիտեի չորս նիստ: