Երկուշաբթի, 31 Հուլիսի 2017 19:57

Արմինֆո. Արդշինբանկի մասնաճյուղային ցանցը խոշորագույններից է ՀՀ բանկային համակարգում: Այսօր Արդշինբանկն ունի 64 գործող մասնաճյուղ, որոնցից 19-ը Երևանում, 42-ը՝ մարզերում և 3 մասնաճյուղ՝ ԼՂՀ-ում: Ավելին, Բանկը մշտապես մեծ ուշադրություն է դարձնում մարզերում գործող մասնաճյուղերին, դրանց արդիականացմանը և հետագա զարգացմանը՝ նպատակ ունենալով ապահովել բարենպաստ և հարմարավետ սպասարկման պայմաններ յուրաքանչյուր հաճախորդի համար: Այս մասին ԱրմԻՆֆո գործակալությանը տեղեկացվել է Բանկի մամուլի ծառայությունից:

 

«Արդշինբանկը Երևան քաղաքում այս պահին ունի 19 մասնաճյուղ: Առաջին հայացքից դա շատ է թվում, սակայն հարկ եմ համարում նշել, որ Երևան քաղաքի բոլոր համայնքներում մենք մասնաճյուղեր չունենք, քանի որ ինքնանպատակ չէ ամենուր ապահովել ներկայություն: Նպատակը` ճիշտ ժամանակին ճիշտ տեղում լինելն է: Մասնաճյուղային ցանցը ընդլայնելիս մենք մշտապես գնում ենք այնտեղ, որտեղ մեր հաճախորդներն ու գործընկերներն են: Այսօր, մեր նպատակներից է ոչ միայն նոր մասնաճյուղեր բացելը, այլ  գործող մասնաճյուղերի զարգացումը և առկա խնդիրների լուծումը: Մեր բոլոր նորաբաց և վերանորոգված գրասենյակները կարելի է անվանել օրինակելի, քանի որ դրանք համապատասխանում են ժամանակակից բանկային համակարգի պահանջներին: 2017-2018 թթ. մենք նախատեսում ենք վերանորոգել ևս 9-10 գրասենյակ՝ հավատացած լինելով, որ ժամանակակից գրասենյակները և մասնագիտացված անձնակազմը կնպաստեն սպասարկման ավելի բարձր որակի ապահովմանը» - նշել է Արդշինբանկի  Ռազմավարական զարգացման տնօրեն Արմեն Գասպարյանը:

 

Աղբյուրի համաձայն, Բանկի մի շարք մասնաճյուղերի աշխատանքային ժամերն առավելագույնս հարմարեցված են հաճախորդների պահանջներին: Մասնավորապես, Երևանի Թամանյան 1 հասցեում գտնվող «Կասկադ» և «Զվարթնոց» օդանավակայանում գործող մասնաճյուղերը, ինչպես նաև «Էրեբունի», «Արաբկիր», «Վանաձոր», «Գյումրի» և «Էջմիածին» մասնաճյուղներն աշխատում են երկարացված ռեժիմով, մասնավորապես, «Զվարթնոց» մասնաճյուղ՝ շուրջօրյա 24/7, «Կասկադ» մասնաճյուղ՝ երկուշաբթի - ուրբաթ՝ 09:15-16:45, շաբաթ - կիրակի՝ 11:15-19:45, «Էրեբունի», «Արաբկիր», «Վանաձոր», «Գյումրի» և «Էջմիածին» մասնաճյուղերը՝ երկուշաբթի - ուրբաթ՝ 09:15-16:45, շաբաթ` 10:00 – 14:00:

Բանկի Գլխամասային գրասենյակը սպասարկում է հաճախորդներին աշխատանքային օրերին ժամը 09:15-ից մինչև 16:45-ը` առանց ընդմիջման:

 

Մասնաճյուղային ցանցի վերաբերյալ առավել մանրամասն տեղեկատվություն կարելի է ստանալ այցելելով Բանկի պաշտոնական կայքէջ, զանգահարելով (012) 222222 հեռախոսահամարին կամ օգտվելով կայքի «Հետզանգի պատվեր» ծառայությունից:

 

Ըստ ԱրմԻնֆո գործակալության`Հայաստանի Բանկերի Էքսպրես-Ռենկինգի, 2017 թվականի հուլիսի 1-ի դրությամբ, Արդշինբանկը իր հիմնական ցուցանիշներով գտնվում է առաջատարների եռյակում: Այսպես, Բանկի ընդհանուր կապիտալը կազմել է 62,8 մլրդ դրամ (տարեկան աճը`22,4%), ակտիվները` 507.5 մլրդ դրամ (տարեկան աճը` 12.1%), վարկային ներդրումները (ներառյալ այլ փոխառությունները) կազմել են 354.5 մլրդ դրամ: Առաջին կիսամյակն Արդշինբանկը եզրափակել է 3.1 մլրդ դրամ զուտ շահույթով, տարեկան աճը`39,3%: 2016 թվականի վերջին Արդշինբանկի հետ միավորվեց Առէկսիմբանկ-Գազպրոմբանկի խումբը: