ՀՀ նախագահ. Էներգետիկայի ոլորտում համագործակցությունը հայ-իրանական հարաբերությունների կարևոր տարր է

Արմինֆո. ՀՀ նախագահ Սերժ Սարգսյանը հնարավոր է համարում Իրանից Եվրոպա գազի տարանցման նախագծի իրականացումը: Այդ մասին իրանական «Շարղ» օրաթերթին հարցազրույցում հայտարարել է ՀՀ նախագահ Սերժ Սարգսյանը: 

Նրա խոսքով, էներգետիկայի ոլորտում համագործակցությունը հայ-իրանական հարաբերությունների կարևորագույն բաղադրիչ է: Նախագահը հիշեցրել է, որ շուրջ 10 տարի է, ինչ Հայաստանն Իրանի հետ իրականացնում է «գազ՝ էլեկտրաէներգիայի դիմաց» փոխշահավետ ծրագիրը: Այս համատեքստում, ինչպես նշել է Սարգսյանը, մեծ կարևորություն է տրվում Հայաստան-

Իրան էլեկտրահաղորդման 3-րդ գծի շինարարությանը, ինչը թույլ կտա զգալիորեն ավելացնել փոխանակման ծավալները:

Ինչ վերաբերում է Իրանից Եվրոպա գազի տարանցմանը հարցին՝ նման

մասշտաբային նախագծին, ապա այն պետք է բազմակողմանիորեն ուսումնասիրվի, և եթե տնտեսապես շահավետ լինի բոլոր կողմերին, ապա՝ ինչո՞ւ ոչ»,- հայտարարել է նախագահը: Այդ հարցը նրա խոսքով, ներկայումս փորձագիտական քննարկումների փուլում է գտնվում: «Մենք մեր հերթին բազմիցս հայտարարել ենք, որ շահագրգռված ենք տարածաշրջանային

տնտեսական խոշոր նախագծերին մասնակցությամբ և պատրաստ ենք համագործակցության համար»,- ընդգծել է նա:

Նշենք, որ 2015 թվականի դեկտեմբերի 23-ին Երևանում քառակողմ հուշագիր է ստորագրվել է Հայաստանի, Ռուսաստանի, Վրաստանի և Իրանի միջև, որով նախատեսվում է Էլեկտրաէներգիայի փոխհոսքերի կառավարման արդյունավետության, էներգահամակարգերի անվտանգության և հուսալիության բարձրացումը:: Ըստ ՀՀ էներգետիկայի և բնական պաշարների նախարարության, այս նախաձեռնությամբ բարենպաստ միջավայր է ստեղծում մի կողմից այն հանգամանքը, որ Հայաստանի և Իրանի, Վրաստանի և Ռուսաստանի էներգահամակարգերն իրար հետ աշխատում են զուգահեռ  սինխրոն ռեժիմներով, Մասնավորապես նախատեսվում է մինչև 2018թ. շահագործման հանձնել Հայաստան-Վրաստան 400/500 կՎ էլեկտրահաղորդման գիծն ու հաստատուն հոսանքի ներդիրով ենթակայանը։ Դրա արդյունքում կապահովվի Վրաստանի էներգետիկ համակարգի հետ զուգահեռ ասինխրոն ռեժիմում աշխատանքի հնարավորություն և էլեկտրաէներգիայի փոխհոսքի հզորությունը  առաջին փուլում կկազմի 350 Մվտ, մինչև 2021 թ-ը հասնելով 700 Մվտ-ի: Բացի այդ, 2018թ. նախատեսվում է շահագործման հանձնել նաև Իրան-Հայաստան 400 կՎ էլեկտրահաղորդման երկշղթա գիծը։ Այն թույլ կտա Իրանի հետ էլեկտրաէներգիայի փոխհոսքերը հասցնել ընդհուպ մինչև 1200 Մվտ հզորության։ Այս միջոցառումների իրականացման նպատակն է իրագործել հյուսիս-հարավ էլեկտրաէներգտիկական միջանցքի ստեղծման նախաձեռնությունը, որը հնարավորություն կտա աշխատել ԵԱՏՄ և ԵՄ էներգահամակարգերի հետ։