Կոնվերս Բանկն սկսել է իր թողարկած 1 մլրդ.դրամ ծավալով կորպորատիվ դրամային պարտատոմսերի տեղաբաշխումը

Արմինֆո. Կոնվերս Բանկը օգոստոսի 3-ին ձեռնամուխ է եղել իր թողարկած 1 մլրդ.դրամ ծավալով կորպորատիվ դրամային պարտատոմսերի տեղաբաշխմանը: ԻնչպեսԱրմԻնֆո գործակալությանը տեղեկացվել է Բանկի մամուլի ծառայությունից, տեղաբաշխմանը կհետևի պարտատոմսերի ցուցակումը «ՆԱՍԴԱՔ ՕԷՄԷՔՍ Արմենիա» կորպորատիվ պարտատոմսերի հարթակում՝ երկրորդային շուկայում շրջանառվելու համար:

Աղբյուրի համաձայն, թողարկման ընդհանուր ծավալը 1 մլրդ դրամ է: Մեկ պարտատոմսի անվանական արժեքը 100.000  դրամ է, շրջանառության ժամկետը՝ 24 ամիս, իսկ արժեկտրոնների վճարման պարբերականությունը՝ կիսամյակային: Պարտատոմսերի արժեկտրոնային եկամտաբերությունը կազմելու է տարեկան  10.5 տոկոս, իսկ էֆեկտիվ տոկոսադրույքը՝ 10.78 տոկոս:

Նվազագույն փաթեթը, որը կարելի է ձեռքբերել, ներառում է 15 պարտատոմս, որը  դրամային արտահայտությամբ կազմում է 1.500.000 դրամ:

«Այս տարվա ընթացքում սա արդեն երկրորդ տեղաբաշխումն է. առաջինն իրականացվել էր ԱՄՆ դոլարով:  Բանկը, հավատարիմ մնալով իր հաճախորդներին բանկային պրոդուկտների առավել լայն տեսականի մատուցելու քաղաքականությանն, այս անգամ առաջարկում է դրամային պարտատոմսեր, որոնք գրավիչ են ֆինանսական շուկայում դրանց նկատմամբ աճող հետաքրքրությամբ», -ասել է Կոնվերս Բանկի Ֆինանսական տնօրեն Հրանտ Հակոբյանը՝ հավելելով, որ ներգրավված միջոցներն ուղղվելու են տնտեսության տարբեր ոլորտների վարկավորմանը:

«Ֆիզիկական անձանց բանկային ավանդների հատուցումը երաշխավորելու մասին» ՀՀ օրենքի համաձայն, բանկի կողմից թողարկված անվանական պարտատոմսերով ներգրավված դրամական միջոցները համարվում են երաշխավորված բանկային ավանդ և  երաշխավորված են «Ավանդների հատուցումը երաշխավորող հիմնադրամի» կողմից: 

Թողարկված պարտատոմսերի ռեեստրը վարելու է «Կապիտալ ինվեսթմենթս» ընկերությունը, որն իրականացնելու է նաև շուկա ստեղծողի գործառույթները:

Նշենք, որ Կոնվերս Բանկ ՓԲԸ բաժնետերերն են «Ըդվանսդ Գլոբալ Ինվեսթմենթս» ԷլԷլՍի-ն (80,94%), ՀայՓոստ Թրասթ Մենեջմենթ Բի. ՎԻ. Ընկերությունը (14.06%), որոնց վերջնական շահառուն արգենտինահայ գործարար Էդուարդո Էռնեկյանն է, և Հայաստանյաց Առաքելական Սուրբ Եկեղեցին (5 տոկոս):

Նշենք, որ մինչ այդ, մայիսի 5-ին սկսվել էր Կոնվերս Բանկի թողարկած կորպորատիվ դոլարային պարտատոմսերի առաջին տրանշի թողարկումը, որն ավարտվեց մայիսի 16-ին,  իսկ մայիսի 26-ին այդ թողարկումը ցուցակվեց «Nasdaq OMX Armenia» ֆոնդային բորսայում և այդ պահից շրջանառվում են ֆոնդային բորսայում, Abond հիմնական ցուցակում: Դոլարային թողարկումը կազմված է 60 հազար արժեկտրոնային պարտատոմսերից, 100 դոլար անվանական արժեքով, 2 տարի ժամկետով և 5.75% արժեկտրոնային եկամտաբերությամբ: Դիվիդենտները վճարվում են կիսամյակի կտրվածքով:

Նշենք, որ «Կոնվերս Բանկը» Հայաստանում գործում է 1996 թվականի սպտեմբերից: 2017 թվականի հունվարի 1-ից որպես բանկի բաժնետերերերն են`Advanced Global Investments LLC-ն` 80,94%, «Հայփոստ Թրասթ Մենեջմենթ Բի.Վի.» ընկերությունը` 14.06% և Էջմիածնի Մայր տաճարը`5%, իսկ 100% բաժնետոմսերի ուղղակի տնօրինողն է Holding Company "Blakery Assets" LTD ընկերությունը: 2017 թվականի ապրիլի 1-ին Կոնվերս Բանկի ակտիվները կազմել են 203,3 մլրդ.դրամ, պարտավորությունները` 170,2 մլրդ.դրամ, իսկ ընդհանուր կապիտալը`33,1 մլրդ.դրամ: