«Վեոլիա Ջուրը» ՀԾԿՀ հայտ է ներկայացրել ջրի սակագինը բարձրացնելու համար. հիմնավորումը գաղտնի է պահվում

Արմինֆո. Հայաստանի ջրամատակարարման և ջրահեռացման ոլորտի միասնական օպերատոր «Վեոլիա Ջուր» ընկերությունը դիմել է Հանրային ծառայությունները կարգավորող հանձնաժողովին (ՀԾԿՀ)` առաջարկելով բարձրացնել ջրի սակագինը: «Գործող սակագնի վերանայման վերաբերյալ հայտ է ներկայացվել ՀԾԿՀ, և այն պետք է ուսումնասիրվի 80 աշխատանքային օրվա ընթացքում», - ԱրմԻնֆո-ին հայտարարել է կարգավորողի մամուլի քարտուղար Մարիամ Ստեփանյանը: Հայտը բավարարելու դեպքում նոր սակագինն ուժի մեջ կմտնի 2018 թվականի հունվարի 1-ից:

Հիշեցնենք, որ մեկ տարի առաջ, երբ ՀՀ կառավարությունը հայտարարեց հանրապետության ջրամատակարարման միասնական օպերատորին որոշելու համար միջազգային հայտամրցույթի արդյունքները, պաշտոնապես հայտարարվեց, որ առավելություն է տրվել Ֆրանսիական Veolia Enviroment SA-ն ընկերությանը, որն առաջարկել է ջրի ամենացածր սակագինը: «Առաջիկա 15 տարվա ընթացքում Հայաստանում ջրի սակագինը, եթե անգամ բարձրանա, ապա` աննշան», - 2016 թվականի նոյեմբերի 21-ին լրագրողներին հայտարարել էր ֆրանսիական Veolia Generale des Eaux կորպորացիայի տարածաշրջանային փոխնախագահ Մալիկա Գենդուրին` չնշելով ապագա սակագնի մեծությունը, քանի որ այն սահմանելու էր կարգավորող մարմինը: «Ինչպես գիտեք, մենք 10 տարի իրականացնում ենք Երևանի ջրամատակարարումը: Կարող եմ ասել, որ 40-ից ավելի երկրների շրջանում, որտեղ աշխատում է «Վեոլիան», ամենացածր սակագինը Երևանում է: Այն կարող է բարձրանալ, սակայն` աննշան, հաշվի առնելով պարտավորությունները, որ մենք ստանձնելու ենք, այժմ` արդեն նաև Երևանի սահմաններից դուրս», - ասել էր Գենդուրին: Հենց այն ժամանակ ընկերությունը պարտավորվել էր էապես նվազեցնել կորուստները ջրամատակարարման ոլորտում, իսկ պատասխանատու անձինք հավաստիացնում էին, որ, համենայն դեպս, Հայաստանի տարածքում միասնական սակագնի սահմանումից հետո երկու տարվա ընթացքում բարձրացնելու միտումով դրա վերանայում չի լինի:

Մինչդեռ 2017 թվականի հունվարի 1-ից ջրի միասնական սակագինը Երևանի բնակիչների համար բարձրացվեց` 1 խմ ջրի դիմաց 170,256 դրամից մինչև 180 դրամ` ներառյալ ԱԱՀ: Գործընթացի մասնակիցներն շտապեցին ՀՀ քաղաքացիներին հավաստիացնել, որ այդ բարձրացումը բխում է հենց  բնակչության շահերից, քանի որ միջոցները կուղղորդվեն համակարգի բարելավմանն ու սպասարկման ցանցի ընդլայնմանը: Ինչպես ԱրմԻնֆո-ի թղթակցի հետ զրույցում հայտարարել էր Էներգետիկ ենթակառուցվածքների և բնական պաշարների նախարարության Ջրային տնտեսության պետական կոմիտեի ջրամատակարարման և ջրահեռացման համակարգերի վարչության խորհրդական Մուշեղ Կարապետյանը, պետական քաղաքականությունն այն է, որրպեսզի մինչ օրս «ծածկույթից դուրս» մնացող տարածքները ներառվեն ջրամատակարարման միասնական օպերատորի սպասարկման գոտում: Մինչդեռ մայիս ամսին Հայստանի ջրային տնտեսության պետական կոմիտեի նախագահ Արսեն Հարությունյանն ԱրմԻնֆո-ի թղթակցին հայտարարել էր,  որայսօր «Վեոլիան» ոչ մի պայմանագրային պարտավորություն չունի, և համայնքային ջրային ենթակառուցվածքը միասնական օպերատորի կառավարմանը կարող է հանձնվել միայն անհրաժեշտ ջրային համակարգի ձևավորումից հետո:

Ջրի սակագների բարձրացման նպատակով  Հանրային ծառայությունները կարգավորող հանձնաժողովին դիմելու մտադրության մասին «Վեոլիա Ջուր» ընկերությունը բարձրաձայնել էր անցած շաբաթ: Ընկերության մամուլի քարտուղար Մուրադ Սարգսյանն ԱրմԻՆֆո գործակալությանը հայտարարել էր, որ ընկերության գործողությունները բխում են վարձակալության 15 տարվա պայմանագրից, որի համաձայն, ընկերությունը պարտավոր է ամեն տարվա օգաոտոսին հաջորդ տարվա սակագինը ճշգրտելու նպատակով դիմել Հանձնաժողովին: Հիմնական երեք գործոնների`էլեկտրաէներգիայի սակագների փոփոխության, գնաճի, ինչպես նաև ջրամատակարարման մանրածախ մատակարարումների ուսումնասիրությունների հիման վրա ՀԾԿՀ-ն կընդունի ջրի սակագների փոփոխության մասին որոշում: Տվյալ պարագայում, ըստ Սարգսյանի, սակագնի վերանայումը չի ենթադրում դրա պարտադիր բարձրացում, քանի որ, հաշվի առնելով վերը նշված արգումենտները, հնարավոր է նաև, որ սակագինը 2018 թվականի հունվարի 1-ից իջնի: Օգոստոսի 2-ին, չմեկնաբանելով այն հանգամանքը, որ ավելի վաղ ընկերությունը պարտավորվել էր, համենայն դեպս, 2 տարի չդիմել ՀԾԿՀ սակագինը բարրձրացնելու առաջարկով, Սարգսյանն ԱրմԻնֆո-ին խոստացել էր օգոստոսի 7-ին տեղեկատվություն տրամադրել կարգավորողին դիմելու համար օրենքով սահմանված հիմնավորումների մասին:

Մինչդեռ օգոստոսի 7-ի երեկոյան ընկերությունը դիմել է ՀԾԿՀ սակագինը մինչև 194,3 դրամ բարձրացնելու նպատակով: Խոշոր բաժանորդների համար առաջարկվում է սակագինը բարձրացնել մինչև մոտ 58,3 դրամ` ներկայիս 54 դրամի փոխարեն: Սակայն, օրենքի տառին համաձան, սակագնի բարձրացման մտադրություն հայտնելիս ընկերությունը պետք է այն հիմնավորի: Հենց վարձականության շուրջ  պայմանագրով այն կարող է վերանայվել հետևյալ պայմանների առկայության դեպքում. էլեկտրաէներգիայի զգալի թանկացման դեպքում, արտարժույթի փոխարժեքի զգալի տատանումների պայմաններում, ընկերության պարտավորությունների շրջանակի ընդլայնման դեպքում, որոնք պահանջում են լրացուցիչ ներդրումներ, կամ` միջազգային անկախ կազմակերպության անցկացրած տեխնիկական աուդիտի արդյունքում, ինչը չի կարող լինել մինչև 2018 թիվը:

Պարզվում է, որ օգոստոսի 9-ի դրությամբ Մուրադ Սարգսյանը պատրաստ չէ  ԶԼՄ-ներին օրինական հիմնավորումներ ներկայացնել սակագնի բարձրացման համար և հրաժարվել է շարունակել խոսակցությունը:

Միևնւոյն ժամանակ, ինչպես հայտարարել են ՀԾԿՀ-ում, հայտը կուսումնասիրվի 80 օրվա ընթացքում, որից 10 օր հատկացվում է հայտի ճիշտ լրացման, ինչպես նաև գործող սակագնի բարձրացումը հիմնավորելու համար անհրաժեշտ բոլոր փաստաթղթերի ստուգմանը: Այնուհետև, ըստ կարգի, կանցկացվեն դիտարկում և հանրային լսումներ: Ջրամատակարարման ոլորտի շուրջ իրավիճակն այսօր բազմաթիվ հարցերով պատմություն է, և, ինչպես փորձն է ցույց տալիս, այս անգամ ևս կարգավորողը բացառություն չի անի և կմերժի գործող սակագինը բարձրացնելու բնական մենատիրոջ հայտը: