Արմինֆո. Հայաստանի կառավարության, «Դեբեդ հիդրո» ՍՊԸ և և «Հայաստանի ներդրողների ակումբ» ոչ հրապարակային պայմանագրային ներդրումային ֆոնդի միջև «Շնող» ՀԷԿ կառուցման ծրագրի վերաբերյալ պայամանագիր է կնքվելու: Կառավարությունը պայմանագրի կնքմանը նախատեսում է հավանություն տալ օգոստոսի 10-ի նիստում:
Որոշման հիմնավորման համաձայն՝ նախատեսվում է հավանություն տալ 76 ՄՎՏ դրվածքային հզորությամբ «Շնող» հիդրոէլեկտրակայանի նախագծման, կառուցապատման, ֆինանսավորման, կառուցման, սեփականության իրավունքով տնօրինման, տիրապետման, շահագործման մասին շրջանակային համաձայնագրին:
Նախատեսվում է, որ ՀՀ կառավարությունը կաջակցի կառուցապատողին ձեռք բերել հողատարածք՝ ՀԷԿ-ի կառուցման նպատակով: Կառուցապատողը
պարտավորվում է իրականացնել այդ օբյեկտի շինարարական աշխատանքները: «Շնող» ՀԷԿ շահագործման օրվանից առնվազն 20 տարվա ընթացքում ՀՀ կառավարությունը պարտավորվում է երաշխավորել «Հայաստանի էլեկտրական ցանցեր» ՓԲԸ կողմից տարեկան 500 մլն կՎտժ էլեկտրաէներգիայի գնում:
Հունիսի 14-ին Հայաստանում ԱՄՆ արտակարգ և լիազոր դեսպան Ռիչարդ Միլզի հետ հանդիպման ընթացքում ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանը հայտարարել է, որ Դեբեդ Գետի վրա
«Շնող» ՀԷԿ կառուցման նախագծի իրականացումը թույլ կտա Հայաստանին մեծացնել հանրապետության հիդրոէներգետիկ հնարավորությունները: Նախնական գնահատումներով, ներդրումները կկազմեն շուրջ 150 մլն դոլար։ Ինչպես ընդգծել է նախարարը, նախագծի իրականացումը հնարավորություն կտա նոր աշխատատեղեր ստեղծել Լոռու մարզում: Ռիչարդ Միլզն իր հերթին ընդգծել է ամերիկյան ընկերությունների հետաքրքրությունը Հայաստանի էներգետիկ ոլորտի նկատմամբ։ Դեսպանը պատրաստակամություն է հայտնել այդ ծրագրերը ներկայացնել ամերիկյան ընկերություններին:
Նշենք, որ 2017 թ. հունվարի 25-ին ռուսաստանաբնակ հայազգի գործարար շրջանակների ներկայացուցիչները հայտարարություն էին տարածել՝ Հայաստանում խորը բարեփոխումներ անցկացնելու գործընթացին աջակցելու և ՀՀ կառավարության հետ համատեղ նախաձեռնություններին և բիզնես-ծրագրերին մասնակցելու վերաբերյալ: «Հայաստանի ներդրողների ակումբըե ՀՀ կենտրոնական բանկի կողմից գրանցված առաջին ոչ հրապարակային պայմանագրային ներդրումային ֆոնդն է մեր երկրում, որի նպատակն է ներքին և արտաքին մասնավոր ֆինանսական միջոցների ներգրավմամբ նպաստել ՀՀ տնտեսության համար կարևոր նշանակություն ունեցող հետևյալ ոլորտների զարգացմանը՝ էներգետիկա, այդ թվում՝ այլընտրանքային էներգիայի արտադրություն, էներգետիկ և զբոսաշրջային ենթակառուցվածքներ, հանքարդյունաբերություն, հանքանյութի վերամշակում, սննդի և թեթև արդյունաբերություն: «Հայաստանի ներդրողների ակումբե-ի ներդրումները 2017 թվականին կկազմեն 300 մլն դոլար՝ կառավարության կողմից խոստացված 850 մլն դոլարի փոխարեն: