Վերլուծաբան. Ադրբեջանի կողմից ՀԱԷԿ փակման արշավի գլխավոր նպատակը հայկական պետականության ոչնչացումն է

Արմինֆո. Ադրբեջանի կողմից ՀԱԷԿ փակման արշավի գլխավոր նպատակը հայկական պետականության ոչնչացումն է, կարծում է վերլուծաբան Սերգեյ Շաքարյանցը: 

Արմինֆո-ի թղթակցի հետ զրույցում վերլուծաբանն ընդգծել է, որ հայկական պետականության ոչնչացման խնդրի հետևում է թաքնված պաշտոնական Բաքվի քարոզչական աղմուկը: Բայց բանն այն է, շարունակել է Շաքարյանցը, որ այդ աղմուկին զանգվածաբար աջակցում է թե Թուրքիան, թե, որքան էլ տարօրինակ է, Եվրամիությունը: Չորս տարի առաջ Հայաստան է այցելել ԵՄ ներկայացուցիչը, ով 200 մլն եվրո է առաջարկել Հայկական ԱԷԿ փակման համար: Ըստ որում, ԵՄ-ն պատրաստ է ֆինանսավորել կայանի ապամոնտաժումը, բայց միաժամանակ պատրաստ չէ ցենտ անգամ տրամադրել ՀԱԷԿ հզորությունների փոխարինման համար: «Մեր, այսպես կոչված, եվրոպացի գործընկերները միջոցներ են տալիս միայն ՀԱԷԿ ապամոնտաժման և կոնսերվացիայի համար՝ փոխարենը ոչինչ չառաջարկելով»,- նշել է վերլուծաբանը՝ մատնանշելով Ադրբեջանի կողմից  Եվրախորհրդարանի մի շարք պատգամավորների կաշառման հետ կապված մի շարք սկանդալները:

Նա հիշեցրել է Եվրախորհրդարանի Շվեդիայից պատգամավոր Յուրան Լինբերգի 2014 թվականին արած անկեղծ խոստովանություններն այն մասին, որ զբաղվել է Եվրախորհրդարանում Ադրբեջանի շահերի լոբբինգով: «Իսկ երբ նրան «զրկեցին» դոտացիաից և հերթական «տրանշից», նա որոշեց ազնիվ մարդ դառնալ: Կամ, օրինակ, ԵԽԽՎ նախագահ Պեդրո Արգամունտը, ում շուրջ այս տարի արդեն բազմաթիվ սկանդալներ են տեղի ունեցել՝ կոռուպցիայի հետ կապված: Այս ամենն ադրբեջանական պետության ակտիվ քարոզարշավի մասն է կազմում, որը չի վարանում կաշառել եվրոպացի որոշ պաշտոնյաների, ովքեր ՀԱԷԿ փակման հարցը ԵՄ հետ Հայաստանի բանակցությունների օրակարգ են մտցնում»,- ընդգծել է վերլուծաբանը: 

Վերլուծաբանը հիշեցրել է, որ 1988 թ. կայանը դիմակայել է Սպիտակի երկրաշարժի հզոր հարվածին: 1995 թ.կայանի վերաշահագործումից հետո

ՀԱԷԿ-ը ոչ միայն բազմիցս ենթարկվել է արդիականացման, այլ նաև՝ ուժեղացրել շահագործման անվտանգության նվազագույն երաշխիքները: Եվ այդ փաստը նշել են ինչպես հայ, այնպես էլ՝ ռուս մասնագետները: Այդ մասին են վկայում նաև ՄԱԳԱՏԷ-ի փորձագետները, ովքեր ընդգծում են, որ կայանն անթերի է՝ շահագործման անվտանգության տեսակետից: «Մեր հարևաններն ուղղակի ցանկանում են զրկել Հայաստանին ունեցած նվազագույն էներգետիկ անկախությունից»,- ասել է Շաքարյանցը՝ նշելով Թուրքիայում և Իրանում ատոմային էլեկտրակայանների կառուցման նախագծերի առնչությամբ Ադրբեջանի արձագանքի բացակայությունը: Չէ որ երկու պետություններում էլ նոր միջուկային էներգաբլոկներ է կառուցում նույն «Ռոսատոմ» ընկերությունը, որը նախագիծ է իրականացնում նաև Հայաստանում: «Թե Թուրքիայի «Ակույու» ԱԷԿ-ում, թե Բուշերում տեղադրվում են նույն ռեակտորները՝ իհարկե, արդիականացված, ինչ ՀԱԷԿ-ում: Սեյսմիկ ակտիվությունն այդ երկրներում ավելի պակաս չէ, քան Հայաստանում»,- նշել է Շաքարյանցը: Ըստ որում, շարունակել է նա, այդ կայաններն աշխատելու են նույն ռուսական միջուկային վառելիքով:

«Ինչո՞ւ այդ գործոնները որևէ կասկած չեն առաջացնում Բաքվի մոտ, իսկ ՀԱԷԿ կենսունակությունը, որն ապացուցել է իր արդիականությունը, կասկած է հարուցում նրանց մոտ: Որովհետև հասնելով ՀԱԷԿ աշխատանքի դադարեցմանը՝ կարելի է հանգիստ ռմբակոծել Հայաստանի տարածքը»,- գտնում է վերլուծաբանը: Նրա կարծիքով, միջուկային վառելիքով բեռնված միջուկային օբյեկտի առկայությունը պետության անվտանգությայն լրացուցիչ երաշխիք է: Այն բանից հետո, երբ Հարավսլավիայում ժամանակավորապես դադարեցվեց ատմակայանի աշխատանքը, անմիջապես սկսվեցին այդ երկրի ռմբակոծությունները ՆԱՏՕ-ի օդուժի կողմից»,- նշել է Շաքարյանցը՝ տարակուսանք հայտնելով ԵՄ դիրքորոշման առնչությամբ, որը ՀԱԷԿ հարցում համահունչ է Բաքվի դիրքորոշմանը: 

Նրա կարծիքով, ՀԱԷԿ անվտանգության մակարդակի մասին պետք է խոսեն նեղ պրոֆիլի մասնագետները, այլ ոչ թե՝ եվրոպացի պաշտոնյաները, առավել ևս՝ Ադրբեջանի կամ Թուրքիայի պետական գործիչները: «Պետք է հասկանալ, որ էներգետիկան պետության արյունատար համակարգն է, և ՀԱԷԿ-ը գլխավոր դեր է խաղում դրանում՝ ապահովելով երկրում արտադրված էլեկտրաէներգիայի շուրջ 40%-ը»,- ընդգծել է փորձագետը՝ միաժամանակ կասկած հայտնելով այլընտրանքային և վերականգնվող էներգետիկայի հնարավորությունների առնչությամբ, ինչի մասին այսօր շատ է խոսվում Հայաստանում: «Խոսել գեներացիայի այլ աղբյուրների մասին, որոնց թվում է՝ արևային էներգետիկան, ուղղակի անլուրջ է, քանի որ վերականգնվող և այլընտրանքային գեներացիայի օբյեկտներից էլեկտրաէներգիան ավելի թանկ է: Իսկ Հայաստանի նման աղքատ երկրի համար էլեկտրաներգիայի գները և էկոլոգիան որոշիչ նշանակություն ունեն: Այդ պատճառով ՀԱԷԿ վտանգավոր բնույթի մասին մեր հարևանների բոլոր խոսակցություններն անհիմն են և ուղղված են հայկական պետականության ոչնչացմանը»,-ասել է վերլուծաբանը: