Արցախի նախագահի խորհրդական. Համախմբված բյուջեի եկամուտները նախորդ տարվա նույն ժամանակահատվածի համեմատ աճել են 19.9 %-ով

Արմինֆո. Արցախի ֆինանսների նախարարության կողմից ներկայացրած տվյալների համաձայն, 2017 թ. հունվար-հունիսին Արցախի համախմբված բյուջեի եկամուտները կազմել են 16.1 մլրդ դրամ: Այդ մասին Ֆեյսբուքի իր էջում գրել է Արցախի նախագահի խորհրդական Տիգրան Աբրահամյանը:

«Նախորդ տարվա նույն ժամանակաշրջանի համեմատ համախմբված բյուջեի եկամուտներն աճել են 19.9 տոկոսով: Արցախի վիճակագրության ծառայության հրապարակած տվյալների համաձայն, 2017 թ. հուլիսի 1-ի դրությամբ առևտրային բանկերի (մասնաճյուղերի) վարկերը կազմել են 128.1 մլրդ դրամ և 2016 թ. հուլիսի 1-ի համեմատ աճել են 30.0 մլրդ դրամով կամ 30.5 տոկոսով: 2017 թ. հուլիսի 1-ի դրությամբ ներգրավված ավանդները կազմել են 83.2 մլրդ դրամ և 2016 թ. հուլիսի 1-ի համեմատ աճել են 31.2 տոկոսով: Ավանդների ընդհանուր կառուցվածքում 78.2 տոկոսը բաժին է ընկնում ռեզիդենտներին, 21.8 տոկոսը` ոչ ռեզիդենտներին, ընդ որում ռեզիդենտների կողմից ավանդների 21.6 տոկոսը ցպահանջ են, 78.4 տոկոսը` ժամկետային»,- գրել է նա:

Ավելի վաղ հաղորդվել էր, որ ԼՂՀ Ազգային վիճակագրական ծառայության տվյալների համաձայն՝ 2017թ. հունիսին տնտեսական ակտիվության ցուցանիշը 2016թ. հունիսի համեմատ կազմել է 113.9 տոկոս, 2017թ. մայիսի համեմատ` 142.5 տոկոս, իսկ 2017թ. հունվար-հունիսին (աճողական) 2016թ. հունվար-հունիսի համեմատ` 115.0 տոկոս: 2017թ. հունվար-հունիսին ԼՂՀ համախառն ներքին արդյունքը կազմել է 102.2 մլրդ դրամ` 2016թ. հունվար-հունիսի 87.7մլրդ դրամի դիմաց: ՀՆԱ-ի հավելաճի տեմպը կազմել է 14.9 տոկոս, ինդեքս-դեֆլյատորը`101.4 տոկոս: 2017թ. հունվար-հունիսին մեկ շնչին ընկնող ՀՆԱ-ն, ընթացիկ գներով, կազմել է 699.8 հազ. դրամ, 1444.2ԱՄՆ դոլար կամ 1333.3 եվրո:ՀՆԱ-ի արձանագրված 14.9 տոկոս հավելաճի շուրջ 6.0 տոկոսային կետն ապահովել է հանքագործական արդյունաբերությունը և բացահանքերի շահագործումը, 2.6 տոկոսային կետը` ֆինանսական և ապահովագրական գործունեությունը,  2.4 տոկոսային կետը`  շինարարությունը, 2.1 տոկոսային կետը`  էլեկտրականության, գազի, գոլորշու և լավորակ օդի մատակարարումը: