Երկուշաբթի, 21 Օգոստոսի 2017 16:38

Արմինֆո. ՀՀ գյուղատնտեսության նախարարությունը 2018 թվականից նախատեսում է  մեկնարկել նորագույն տեխնոլոգիաներով հագեցած ինտենսիվ այգիների հիմնման պետական աջակցության ծրագիրը:

Ինչպես ԱրմԻնֆո-ին հաղորդեցին ՀՀ գյուղատնտեսության նախարարության տեղեկատվության և հասարակայնության հետ կապերի բաժնից, ծրագրով նախատեսվում է տարեկան շուրջ 207 հա ինտենսիվ նոր այգիների հիմնում, ինչը թույլ կտա հնդավոր պտղատեսակների  ներմուծումը  փոխարինել տեղական արտադրությամբ:

«Ինտենսիվ այգիների հիմնումը կարող է շատ շահավետ լինել, քանի որ նման այգիների բերքն ավելի բարձրարժեք է, իսկ իրացումը՝ երաշխավորված», - նշել է ՀՀ գյուղատնտեսության նախարար Իգնատի Առաքելյանն Արարատի մարզ  կատարած այցի ընթացքում:  Նախարարը նաև տեղեկացրել է, որ ծրագրին կարող են դիմել բոլոր ցանկացողները: Ծրագրի պայմաններն են՝ գյուղացիական տնտեսություններին տրամադրվելու է տարեկան 5% տոկոսադրույքով վարկ, վարկը տրամադրվելու է 5 տարի ժամկետով,վարկը տրամադրվելու է առավելագույնը 10 հեկտարի վրա այգի հիմնելու համար:

Ավելի վաղ ԱրմԻնֆո-ն հաղորդել էր, որ Հայաստանի կառավարության նպատակը 2017-2022 թթ. ագրոհատվածում համախառն արտադրանքի տարեկան առնվազն 5% աճի ապահովումն է: Առաջիկա հնգամյակի միջոցառումնեիր ծրագրի համաձայն, գյուղատնտեսության զարգացմանն ուղղված կառավարության գործողությունները նպատակաուղղված կլինեն բուսաբուծության զարգացմանը` սերմերի արտադրության սելեկցիոն կայանների հզորությունները մեծացնելու ճանապարհով: Կայուն բերք ապահովելու համար կառավարությունը նախատեսում է անցկացնել բույսերի պաշտպանությանը նպատակաուղղված միջոցառումներ, այդ թվում` վնասատուների դեմ պայքարին ուղղված քայլեր: 2018-2022 թթ. ակնկալվում է գյուղացիների համար պարարտանյութերի լայն տեսականու մատչելիության ապահովման ծրագրի իրագործում: Մինչև տարեվերջ կմշակվի և 2018-2022 թթ. կիրագործվի ինտենսիվ այգիների ստեղծմանը պետական աջակցության ծրագիր` դրանց մակերեսը հասցնելով մինչև 100 հա: