ՀՀ Ավտոապահովագրողների բյուրոն և Green Card Bureau-ն ակտիվացրել են քննարկումները միջազգային ավտոապահովագրության համակարգին Հայաստանի մասնակցության հարցով

Արմինֆո. ՀՀ Ավտոապահովագրողների բյուրոն և Green Card Bureau-ն վերջին ժամանակներս ակտիվացրել են քննարկումները  ավտոքաղաքացիական պատասխանատվության միջազգային համակարգին Հայաստանի անդամության հնարավորության կապակցությամբ: Ինչպես ԱրմԻնֆո գործակալության թղթակցի հետ հարցազրույցում հայտարարել է Հայաստանի Ավտոապահովագրողների բյուրոյի գործադիր տնօրեն Վահան Ավետիսյանը, գործընթացն ընթանում է արդեն մեկ տարի, ընթանում են համապատասխան քննարկումներ`Green Card համակարգին Հայաստանի միանալու առնչությամբ:

«Այս տարվա հունիսին Կենտրոնական բանկի ներկայացուցիչների հետ մենք եղանք Բրյուսելում, Green Card Bureau-ի կենտրոնակայանում, որտեղ ուսումնասիրեցինք այդ համակարգի աշխատանքի մեխանիզմները և ղեկավարության հետ քննարկեցինք մեր մասնակցության հիմնական խնդիրները: Այնուհետև, սեպտեմբերի 4-8-ը Հայաստան այցելեցին Green Card Bureau-ի նախագահը և ներկայացուցիչները: Մի շարք հանդիպումներ կազմակերպվեցին ՀՀ ԿԲ, Ավտոապահովագրողների բյուրոյի և ՀՀ Ճանապարհային ոստիկանության հետ, կազմակերպվեց ընդլայնված սեմինար, որի ընթացքում Green Card Bureau-ի պատվիրակույթունը ներկայացրեց համակարգի գործունեության հիմնական սկզբունքները, ինչպես նաև այն խնդիրները, որոնք պետք է լուծվեն այդ համակարգին Հայաստանի միանալու առումով»,-նշել է Վ.Ավետիսյանը:

Անդամության գործընթացը ձգձգող հիմնական պրոբլեմը կապված է ԼՂՀ-ում գրանցված ավտոմեքենաների համար պոլիսների սահմանափակումը, իսկ օտարերկրյա վարորդների համար`ԼՂՀ տարածք մուտք գործելու դեպքում Green Card-ի պոլիսներով պատահարները չեն հատուցվում:

Նրա խոսքով, մնացած հարցերը կրում են իրավական և ֆինանսական բնույթ: «Այդ առաջարկների հիմքում ընկած են մի շարք օրենսդրական և ենթաօրենսդրական փոփոխությունների պահանջներ, որոնք մեր կողմից արդեն ընդունվել են: Մենք պետք է մեր ապահովագրողների հետ ավելի մանրամասն քննարկենք և ընտրենք համապատասխան ֆինանսական գործիքները` Green Card Bureau-ի կանոնների շրջանակներում»,-հավելել է Վ.Ավետիսյանը:

Անդամ-երկրների հանդեպ Green Card Bureau-ի կարևորագույն պահանջներից է նաև պարտադիր անդամակցումը ճանապարհային երթևեկության միջազգային կոնվենցիային և ճանապարհային նշանների միջազգային կոնվենցիային: Ընդ որում, Հայաստանն արդեն առաջինի մասնակից է, իսկ երկրորդին միանալու գործընթացը մեկնարկել է մեկ ամիս առաջ: Մասնավորապես, ԱԳՆ, արդարադատության նախարարությունը և Ճանապարհային ոստիկանությունն արդեն աշխատում են այդ ուղղությամբ: «Կարծում եմ, որ կայացած բոլոր հանդիպումների և սեմինարների արդյունքում Green Card Bureau-ի ղեկավարության հետ ձեռք է բերվել ընդհանուր պատկերացում հետագա անհրաժշետ քայլերի մասին, որոնք կնպասատեն Հայաստանի միացմանն այդ համակարգին: Ինչպես արդեն ներկայացրեցի, բոլոր նշված ուղղություններով ձեռնարկվում են համապատասխան քայլեր»,-եզրափակել է Վ.Ավետիսյանը:

Նշենք, որ ներկայումս Green Card համակարգը գործում է 47 երկրներում: Բոլոր մասնակից երկրները, որոնց 2009 թվականին միացել է նաև Ռուսաստանը, ճանաչում են Green Card պոլիսները: Հիմնականում դրանք են Եվրոպայի երկրներն են: Ասիայից և Աֆրիկայից համակարգի մասնակիցներ են Մարոկկոն, Թունիսը, Իրանը, Թուրքիան և Իսրայելը, իսկ նմախկին ԽՍՀՄ-ից`Ուկրաինան, Մոլդովան, Բելառուսը, Ադրբեջանը և Բալթյան հանրապետությունները: