Հայաստանը 6 կետով բարելավել է դիրքը ՀՏՖ մրցունկության վարկանիշում

Արմինֆո. Հայաստանը տարվա ընթացքում բարելավել է իր դիրքը երկրների մրցունակության վարկանիշում՝ 137 երկրների թվում 79-րդ տեղից բարձրանալով 73-րդ տեղը: Global Competitiveness Report 2017-2018 վարկանիշը (2017-2018 Մրցունակության գլոբալ ինդեքս) հրապարակվել է սեպտեմբերի 27-ին Համաշխարհային տնտեսական ֆորումի կողմից: «Տնտեսություն և արժեքներ» հետազոտական կենտրոնի խորհրդի անդամ Սևակ Հովհաննիսյանը, ներկայացնելով փաստաթուղթը, ցուցանիշները լավագույնն է համարել հետազոտությունների ողջ ընթացքում: Զեկուցի համաձայն, չնայած դիտվող դրական դինամիկային՝ Եվրասիական տարաշրջանի երկրների տնտեսությունները սինխրոն չեն աճում: Այսպես ՝ ամենամեծ աճ արձանագրվել է Մոլդովայում՝ վարկանիշում բարձրանալով 11 դիրքով՝ 89-րդ տեղը:

Նշվում է, որ Հայաստանի ցուցանիշների վրա դրական ազդեցություն են ունեցել պետական ապարատի թափանցիկության և արդյունավետության բարձրացմանն ուղղված կառավարական բարեփոխումները: Միաժամանակ, որպես բացասական գործոն, նշվում է դեֆլյացիայի բարձր մակարդակը, որը 2016 թվականին կազմել է 1.4%:

Տարածաշրջանի երկրներից Իրանը 69-րդ տեղում է, Թուրքիան՝ 53, Ադրբեջանը 35, Վրաստանը՝ 67-րդ: Ղազախստանը վարկանիշում զբաղեցնում է 57-րդ տեղը, Տաջիկստանը՝  79-րդ, Ուկրաինան՝ 81-րդ, Ղրղըզստանը՝ 102-րդ: Մակրոտնտեսական պայմանների կայունացումը թույլ է տվել Ռուսաստանին բարձրանալ գլոբալ մրցունակության վարկանիշում. եթե մեկ տարի առաջ ՌԴ-ն գտնվել է 43-րդ տեղում, այժմ բարձրացել է 38-րդ տեղը:

Աշխարհի 10 ամենամրցունակ տնտեսությունների ցանկում ընդգրկվել են Շվեյցարիան, ԱՄՆ-ը, Սինգապուրը, Նիդերլանդները, Գերմանիան, Հոնկոնգը, Շվեդիան, Մեծ Բրիտանիան, Ճապոնիան և Ֆինլանդիան:

Ավելի վաղ՝ հուլիսի 13-ին ՀՀ կառավարության հավանությանն էր արժանացել Գլոբալ մրցունակության ինդեքսում Հայաստանի դիրքի բարելավման 2017-2018թթ. միջոցառումների ծրագիրը: Ծրագրի նպատակն է ամրագրել Գլոբալ մրցունակության ինդեքսը ձևավորող հենասյուների գծով հասցեական միջոցառումներ, որոնց իրականացման արդյունքները կնպաստեն հետագայում ինդեքսում Հայաստանի պատկերի բարելավմանը: Ծրագրով նախատեսվում է իրականացնել 36 միջոցառում: 2017-2018թթ. միջոցառումների ծրագիրը մշակվել է՝ հաշվի առնելով ԳՄԻ-ում Հայաստանի 2016-2017թթ. արդյունքները: