Արմինֆո.Սեպտեմբերի 28-ին ՀՀ տնտեսական զարգացման և ներդրումների նախարարությունում ստորագրվել է առևտրատնտեսական համագործակցության հարցերով հայ-ղազախական միջկառավարական հանձնաժողովի 7-րդ նիստի արձանագրությունը: Այն ստորագրել են հանձնաժողովի հայկական կողմի համանախագահ, ՀՀ տնտեսական զարգացման և ներդրումների նախարար Սուրեն Կարայանը և ղազախական կողմի համանախագահ, Ղազախստանի ներդրումների և զարգացման նախարար Ժենիս Կասիմբեկը։
Ինչպես տեղեկացնում է նախարարության մամուլի ծառայությունը, համանախագահները նաև առանձնազրույց են ունեցել, որի ժամանակ քննարկել են համագործակցության հեռանկարները՝ ընդգծելով առևտրաշրջանառության աճի համար նպաստավոր ոլորտներում համագործակցության խթանման անհրաժեշտությունը:
Զրուցակիցները գոհունակությամբ նշել են, որ նախորդ նիստից հետո անցած ժամանակահատվածում հանձնաժովի կողմից որոշակի աշխատանք է իրականացվել Հայաստանի և Ղազախստանի միջև առևտրատնտեսական հարաբերությունների զարգացման ուղղությամբ։
Արձանագրությամբ ամրագրվել է երկու կողմերի պատրաստակամությունը` շարունակելու առևտրատնտեսական համագործակցության զարգացման գործընթացը, այդ թվում՝ երկու երկրների արտահանման ուղղվածությամբ արտադրատեսակների և արտահանման շուկաների վերաբերյալ տեղեկատվության մշտական փոխանակման միջոցով։
Հայկական կողմը տեղեկացրել է ԵՄ կողմից Հայաստանին տրամադրված GSP+ և ԱՄՆ, Կանադայի, Ճապոնիայի, Նորվեգիայի և Շվեյցարիայի կողմից տրամադրված GSP առևտրի ռեժիմի մասին, ինչը կարող է զգալիորեն նպաստել հայ-ղազախական ապրանքաշրջանառության ծավալների ավելացմանը և արտահանման-ներմուծման տեսականու ընդլայնմանը։
Պայմանավորվածություն է ձեռք բերվել ուսումնասիրել Աստանայում և Ալմաթիում «Հայաստան-Ոսկերչական տունե առևտրացուցահանդեսային տաղավարների կազմակերպման և երկու երկրներում անցկացվող ցուցահանդեսներին ու տոնավաճառներին հայաստանյան և ղազախական ընկերությունների մասնակցությանն աջակցելու հարցերը։
Արձանագրության առանձին կետով կողմերը պայմանավորվել են հանձնաժողովի հետագա աշխատանքում հատուկ ուշադրություն դարձնել երկու երկրների տարածաշրջանների՝ հայկական մարզերի և ղազախական ակիմատների, միջև կապերի ստեղծմանը և աջակցել համագործակցությանը տարբեր ոլորտներում։
Հայ-ղազախական միջկառավարական հանձնաժողովի հաջորդ նիստը նախատեսվում է անցկացնել 2018 թվականին՝ Աստանայում։
Սարգիս Խաչատրյան. Մեր գործունեությունն ուղղված է լինելու հաճախորդների փորձառության բարելավմանը
Բիզնեսի թվայնացման հիմնախնդիրը, ո՞ր հանգրվանում է Հայաստանը
Գևորգ Մանթաշյան. Բարձր տեխնոլոգիական արդյունաբերության նախարարությունը հետևողական աշխատանք է տանում Հայաստանում ստարտափների կայացման ուղղությամբ
Bank of Georgia-ն հայտարարել է 303.6 մլն դոլարով "Ամերիաբանկի" ձեռք բերման շուրջ նախնական համաձայնության մասին
Նախկին պատգամավորը՝ Հայաստանի տնտեսական իրավիճակի մասին. այն, ինչը ջուրն է բերում, ջուրն էլ տանում է