Վարդան Հարությունյան. 9 ամիսների արդյունքներով ապահովել ենք այնքան հարկեր, որքան անհրաժեշտ է

Արմինֆո. 2017 թվականի առաջին 9 ամիսների ընթացքում ՀՀ Պետական ​​եկամուտների կոմիտեն (ՊԵԿ) ապահովել է 860.5 մլրդ դրամի հարկային եկամուտները, ԱԱՀ-ի վերադարձի գումարի հետ միասին: Հարկերի գծով աճը կազմել է 6.7%, մաքսատուրքերի գծով`18.3%: Այս մասին հոկտեմբերի 4-ին լրագրողներին հայտնել է ՊԵԿ ղեկավար Վարդան Հարությունյանը, ամփոփելով 9 ամսվա գործունեության արդյունքները:

Ընդհանուր առմամբ, ըստ Հարությունյանի, հարկերի գծով բյուջետային ցուցանիշը կապահովվի: «Մենք հետ չենք մնում պլանավորված ցուցանիշներից, 9 ամիսների արդյունքներով մենք ապահովել ենք այնքան հարկային եկամուտներ, որքան անհրաժեշտ է», - հայտարարել է նա: Արդյունքում, տարվա 9 ամիսների ընթացքում պետական ​​բյուջեի եկամուտների աճը 2016 թ. նույն ժամանակահատվածի համեմատ, կազմել է ավելի քան 74 մլրդ դրամ կամ 9.4%: 640,7 մլրդ դրամն ապահովվել է հարկային, իսկ 219,7 մլրդ.դրամը` մաքսային մարմինների կողմից:

Ինչպես նշել է ՊԵԿ ղեկավարը, հարկային եկամուտների աճն ապահովվել է արդյունավետ վարչարարության շնորհիվ, ստուգումների կրճատման պայմաններում: Այսպես, սկսած 2016 թ. սեպտեմբերից հարկային մարմինների կողմից իրականացվող վերահսկողական միջոցառումների թիվը նվազել է 47.8%: Սակայն, ինչպես հայտարարել է ՊԵԿ ղեկավարը, բարելավել է հարկային վարչարարության արդյունավետությունը: 2017 թվականի հոկտեմբերի 1-իր դրոթյամբ հարկային գերավճարները նվազել են 7.2 մլրդ դրամով: Հայաստանի պետական ​​բյուջեին չվճարված հարկերի և այլ պարտադիր վճարների ցուցանիշը հաշվետու ժամանակահատվածում նվազել է 6.5 մլրդ. դրամով:

Նախօրեին «Ծառուկյան» խմբավորման անդամ Միքայել Մելքումյանը ՀՀ խորհրդարանի ամբիոնից հայտարարել էր, որ 2017 թվականի բյուջեն կատարելու համար Հայաստանի կառավարությանը պետք է մինչև տարվա վերջ, առաջիկա 4 ամիսներին, հավաքի 424 մլրդ դրամի հարկեր, բայց վիճակագրությունը ցույց է տալիս, որ վերջին մի քանի ամիսների ընթացքում ամսական կտրվածքով միջին հաշվով հավաքագրվել է մոտ 90 մլրդ դրամ: Նրա խոսքով, այսօր արդեն կարելի է ասել, որ կառավարությունը դժվար թե կարողանա կատարել 2017-ի բյուջեն: «Երկրի 2017 թվականի գլխավոր ֆինանսական փաստաթուղթը կատարելու նպատակով կառավարությունը, «օպտիմալացման» քողի ներքո, պետական հատվածում գնում է աշխատատեղերի լուրջ կրճատումների, ինչն էլ, իր հերթին, կարող է հանգեցնել աղքատության աճին և արտագաղթին», - ասել է պատգամավորը: Նրա խոսքով, ստեղծված իրավիճակից դուրս գալու ճանապարհը կամ իրական տնտեսական աճի ապահովումն է, կամ ստվերի կրճատումը, հակառակ դեպքում երկիրը կկանգնի լուրջ գնաճի առջև, որն արդեն սկսվել է:

Միևնույն ժամանակ, Կառավարության սեպտեմբերի 28-ի նիստում, անդրադառնալով ԶԼՄների հրապարակումներին, որի համաձայն կառավարությունը կարող է քննարկել սեկվեստորի հավանականությունը պետբյուջեի 2017-ի համար, ֆինանսների նախարար Վարդան Արամյանը նշել էր. «Ես պաշտոնապես հայտարարում եմ, որ նման բան չկա: Մենք ունենք շատ հստակ գաղափարախոսություն, որն ամրագրված է 2017 թ. բյուջեում, և այդ ուղղությունը կշարունակվի նաև 2018 թվականի բյուջեում»: Գաղափարը, ինչպես պարզաբանել էր նախարարը, կայանում է նրանում, որպեսզի որոշակի զսպվածություն ցուցաբերվի ընթացիկ ծախսերի պլանավորման առումով, շեշտը դնելով կապիտալ ծախսերի վրա, որոնք խոստանում են մուլտիպլիկացիոն ազդեցության վերածվել երկրի տնտեսության վրա:

Նշենք, որ երկրի 2017-ի բյուջեով ՀՆԱ-ի անվանական աճը նախատեսվում է 5% կամ 5.405 տրլն դրամ: Ընդհանուր եկամուտները կկազմեն 1 տրիլիոն 210 մլրդ դրամ (եկամուտների և ՀՆԱ-ի հարաբերակցությունը`22.4%), որից հարկային մուտքերը կկազմեն 1 տրլն. 135 մլրդ դրամ: Ծախսերը կկազմեն 1 տրիլիոն 360 մլրդ դրամ (ծախսերի և ՀՆԱ-ի հարաբերակցությունը՝25.2%), իսկ դեֆիցիտը կկազմի 150 մլրդ դրամ (դեֆիցիտի և ՀՆԱ-ի հարաբերակցությունը՝ 2,8%):