2018 թվականի հուլիսի 1-ից պարտադիր կուտակային կենսաթոշակային համակարգը պարտադիր կլինի Հայաստանի քաղաքացիների բոլոր խմբերի համար

Արմինֆո. 2018 թվականի հուլիսի 1-ից պարտադիր կուտակային կենսաթոշակային համակարգը պարտադիր կլինի Հայաստանի քաղաքացիների բոլոր խմբերի համար: Հոկտեմբերի 4-ին ԱԺ ամբիոնից այդ մասին հայտարարել է ֆինանսների փոխնախարար Կարեն Թամազյանը` ներկայացնելով «Պարտադիր կուտակային կենսաթոշակի մասին՚ օրենքի և հարակից օրենքների փաթեթի փոփոխությունների նախագծերը, որոնք Ազգային  ժողովն ընդունել է առաջին ընթերցմամբ:

Թամազյանի ասելով, երկրի կառավարությունը մտադիր չէ երկարաձգել գործող օրենքի դրույթների իրագործման ժամկետը, որը պարտադիր կլինի բոլորի համար: Գործադիր իշխանության ներկայացրած փաթեթը նպատակուղղված է 2 խնդրի լուծման: Առաջին փոփոխությունն առնչվում է կուտակային կենսաթոշակին համակարգին առնչվող հարցերի կարգավորման լիազորություններին, որոնք պետք է վերաբաշխվեն պետական կառույցների և Կենտրոնասկան բանկի միջև, ինչը ֆինանսական շուկային թույլ կտա  դառնալ ավելի ճկուն: Երկրորդ փոփոխությունն առնչվում է միջազգային կառույցներում աշխատող  Հայաստանի քաղաքացիների կողմից կուտակային հիմնադրամներ և պետական բյուջե հատկացումներին: Խոսքը վերաբերում է շուրջ 50 անձանց, որոնք կարող են իրենց համար հատուկ ստեղծված համակարգի օգնությամբ միջոցները վճարել ինչպես կուտակային հիմնադրամներին, այնպես էլ` 23 տոկոս եկամտահարկ պետական բյուջե: Փոխնախարարը հաղորդել է, որ Սահմանադրական դատարանի որոշման հիման վրա կառավարությունը մշակում է օրինագծերի ևս մեկ փաթեթ, որը սահմանված կարգով կներկայացվի խորհրդարան:

Ավելի վաղ աշխատանքի և սոցիալական հարցերի նախարար Արտեմ Ասատրյանը հաղորդել էր, որ այժմ պարտադիր կուտակային կենսաթոշակային համակարգի մասնակիցների թիվը գերազանցել է 180 հազարը, որոնց մեծ մասը մասնավոր հատվածի ներկայացուցիչներ են: Նախարարի հավաստմամբ, այօրվա դրությամբ պարտադիր կուտակային կենսաթոշակային համակարգի շրջանակում կառավարող ընկերությունները կուտակել են 80 մլրդ դրամ: Երեք տարում կառավարման արդյունավետության գնահատման ուղղությամբ կատարված աշխատանքների արդյունքում միջոցներն ավելացել են շուրջ 32 տոկոսով, ինչը, նախարարի գնահատմամբ, բավականին լավ ցուցանիշ է:

Հիշեցնենք, որ ՀՀ կառավարության 2017-2022թթ. նոր ծրագրով նախատեսվում է ԿԲ հետ համատեղ քայլեր ձեռնարկել ֆինանսական գործիքների մատչելիության մակարդակի բարձրացման և երկարաժամկետ կենսաթոշակային կուտակումների ձևավորման համար, որոնց ներարկումն իրական հատված կխթանի տնտեսության զարգացումն ու ներդրումների աճը: Մասնավորապես, կառավարությունը նախատեսում է մինչև 2018 թվականի վերջը ԿԲ հետ համատեղ մշակել կապիտալի շուկայի զարգացման ծրագիր, որը նպատակուղղված կլինի տեղական ընկերությունների կողմից բաժնետոմսմերի և պարտատոմսերի թողարկման խթանմանը: Մինչև 2020 թվականի վերջը կենսաթոշակային կուտակային համակարգի ընդլայնման համար կառավարությունը ԿԲ հետ համատեղ կմշակի ապահովագրական շուկայի զարգացման միջնաժամկետ ծրագիր, որը նպատակաուղղված կլինի ապահովագրական նոր գործիքների ներդրմանն ու կյանքի ապահովագրության գործարկմանը: