Չեխիայի արդյունաբերական կոնֆեդերացիայի նախագահը Հայաստանում տեսնում է համագործակցության մեծ և երկարաժամկետ ներուժ

Արմինֆո.Չեխիայի արդյունաբերական կոնֆեդերացիայի նախագահ Լուկաշ Մարտինը Հայաստանում տեսնում է տնտեսական համագործակցության զարգացման մեծ և երկարաժամկետ ներուժ:

Հայ-չեխական գործարար համաժողովի շրջանակներում կայացած ԱրմԻնֆո գործակալության թղթակցի հետ հարցազրույցում Լուկաշ Մարտինը կարևորել է Հայաստանը, որպես մի երկրի, որտեղ չեխ ձեռներեցները կարող էին զգալիորեն բարելավել իրենց դիրքերն արտաքին շուկաներում:

«Հայաստանն այն փոքր քրիստոնյա երկիրն է, որն ունի գերազանց անձնակազմի ներուժ և կարող է լավ ելք ծառայել դեպի տարածաշրջան`չեխական բիզնեսի համար: Մենք ունենք գերազանց քաղաքական հարաբերություններ, և քաղաքական գործիչները, փաստորեն, մեր դռները բացեցին ավելի սերտ համագործակցության համար», - ընդգծել է Չեխիայի արդյունաբերական ասոցիացիայի ղեկավարը: Նրա խոսքերով, Չեխիայի և Հայաստանի միջև տնտեսական համագործակցությունը կարող է ընթանալ երկու կարևոր ուղղություններով:

Առաջինը, դրանք զուտ առևտրական հարաբերություններ են, ապրանքի փոխադարձ արտահանման ընդլայնում դեպի նոր շուկաներ: Չեխիան պատրաստ է Հայաստանին առաջարկել մեքենաշինության ​​արտադրանք`ավտոմեքենաներ, տրակտորներ, գյուղատնտեսական այլ մեքենաներ, ինչպես նաև տեխնոլոգիաներ և ՏՏ լուծումներ տարբեր ոլորտների համար, ինչպիսիք են`լոգիստիկան, տրանսպորտը, ծառայություններ Հայաստանի միջուկային էներգետիկայի համար, այլընտրանքային էներգետիկայի օբյեկտների զարգացումը և այլն: Համագործակցության զարգացման մյուս ուղղությունը, ըստ Լուկաշ Մարտինի, կարող է հիմնվել Հայաստանում համատեղ ձեռնարկությունների կազմակերպման պլատֆորմների ստեղծման հնարավորությունների վրա, որոնց արտադրանքը կուղարկվի հարևան երկրներ`Իրան, Ռուսաստան, ինչպես նաև Չինաստան: «Հետևաբար, մենք մի քանի օր գտնվում ենք այստեղ, որպեսզի կարողանանք իրականում փորձել կառուցել այդ կամուրջները`երկարաժամկետ և լուրջ համագործակցության համար», - ասել է զրուցակիցը: Նա համաձայնել է, որ հայկական արտահանումը դեպի Չեխիայի Հանրապետություն դեռ շատ թույլ է, և հայտնել է այն միտքը, որ պետք է դիվերսիֆիկացնել տնտեսությունը և արտահանումը: «Դա երկարաժամկետ խնդիր է Հայաստանի տնտեսության համար, և ես վստահ եմ, որ ժամանակի հետ այն կգտնի իր լուծումը», - նկատել է Լուկաշ Մարտինը:

Նշենք, որ այսօր կայացած գործարար համաժողովին, որը նվիրված է Չեխիայի Հանրապետության Սենատի նախագահ Միլան Շտեխի հայաստանյան այցելությանը, մասնակցել են Չեխիայի զանազան բիզնես-կառույցների մոտ 20 ներկայացուցիչներ:  Հայաստանի Զարգացման հիմնադրամը հյուրերի համար կազմակերպել էր երկրի տնտեսական ներուժի վերաբերյալ շնորհանդես: Տեղի է ունեցել B2B ձևաչափով հանդիպում:

Ըստ ՀՀ Ազգային վիճակագրական ծառայության տվյալների, 2017 թվականի հունվար-հուլիսին Հայաստանի և Չեխիայի միջև առևտրի շրջանառությունը կազմել է 14.95 մլն դոլար, տարեկան աճը`88.8%, մասնավորապես, արտահանման ծավալը կազմել է 952.2 հազ. դոլար, տարեկան անկումը`27.5%, իսկ ներմուծումը` 14 մլն դոլար, տարեկան աճը` 2,1 անգամ:-