Արդշինբանկ. Աշխատավարձային օվերդրաֆտով այժմ հնարավոր է ստանալ վարկային գիծ մինչև աշխատավարձի 14-ապատիկի չափով և մինչև 70 ամիս մարման ժամկետոով

Արմինֆո. Արդշինբանկը բարելավել է աշխատավարձային նախագծի շրջանակում նվազող սահմանաչափով վարկային գծերի պայմանները: Համաձայն բարելավված պայմանների այժմ հնարավոր է ստանալ վարկային գիծ մինչև աշխատավարձի 14-ապատիկը: Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, ավելացվել է նաև վարկային գծի տրամադրման ժամկետը, ըստ որի այն հնարավոր է մարել մինչև 70 ամիս ժամկետում:

«Դասվելով երկրի խոշոր և առաջատար բանկերի շարքը՝  Արդշինբանկը պարբերաբար ընդլայնում և բարելավում է իր կողմից առաջարկվող ծառայությունների պայմանները՝ փորձելով արդարացնել յուրաքանչյուր հաճախորդի ակնկալիքները: Այս վարկային գիծը հնարավորություն է տալիս ստանալ ամսական աշխատավարձի մինչև 14-ապատիկ չափով և մինչև 70 ամիս առավելագույն մարման ժամկետով գումար: Արդշինբանկի այս աշխատավարձային վարկային գիծը հնարավորություն է ընձեռում ստանալ տարեկան 0% անվանական տոկոսադրույքով վարկային սահմանաչափ»,- նշեց Արդշինբանկի Ռազմավարական զարգացման տնօրեն Արմեն Գասպարյանը:

Հավելենք, որ աշխատավարձային նախագծի մասնակիցները, ոչ միայն հնարավորություն  ունեն օգտվել վարկային գծերից, այլ նաև ստանալ ավանդի արտոնյալ պայմաններ, անվճար ապահովագրություն դժբախտ պատահարներից և զեղչեր տարբեր ծառայություններից, ինչպես նաև կարող են տեղափոխել այլ բանկում սպասարկվող վարկերը և վարկային գծերը:

Ըստ ԱրմԻնֆո գործակալության` Հայաստանի Բանկերի Ֆինանսական Վարկանիշի, 2017 թվականի հուլիսի 1-ի դրությամբ, Արդշինբանկը մանրածախ վարկավորման հատվածում գտնվում է 2-րդ տեղում`97.4 մլրդ դրամ, տարեկան աճը` 13.5%: Բանկի վարկային պորտֆելում մանրածախ վարկերի մասնաբաժինը կազմում է 27%, իսկ շուկայում գերազանցում է 12.5% ​​-ը: Սպառողական վարկերի պորտֆելով Արդշինբանկն զբաղեցնում է 2-րդ տեղը`66.9 մլրդ դրամ (տարեկան 4.2% աճ) կամ բանկի վարկային պորտֆելում այն կազմում է 18.9%: Արդշինբանկի քարտային վարկային գծերի պորտֆելը (ներառյալ աշխատավարձային օվերդրաֆտները) կազմել է 23,3 մլրդ դրամ`տարեկան 19% աճով: Բանկը վարկային եկամուտը տարեկան կտրվածքով ավելացրել է 12.4%, պահպանելով երկրորդ տեղը բացարձակ արժեքով: Արդշինբանկը 2017 թվականի առաջին կեսը եզրափակել է 3.1 մլրդ դրամի զուտ շահույթով, ապահովելով այդ ցուցանիշի տարեկան 39.3% աճ:

Նշենք, որ Արդշինբանկը մասնաճյուղային ցանցն ամենամեծերից մեկն է Հայաստանի բանկային համակարգում – 64 մասնաճյուղ, որց 19-ը գտնվում է Երևանում, 42-ը`մարզերում և 3-ը` ԼՂՀ-ում: Բանկի հիմնական բաժնետերերն են`«Arins Group» (այն վերանվանվեց «Բիզնես ներդրումների կենտրոն» ԱՊԸ-ի) - 70.1145% և «Ռեգիոն» Արդյունաբերական ֆինանսական կորպորացիան - 28.3689%: Նշենք, որ 2016 թ. վերջին Առէկսիմբանկ-Գազպրոմբանկի խումբը միացավ Արդշինբանկին:-