Չորեքշաբթի, 11 Հոկտեմբերի 2017 17:33

Արմինֆո. ՀՀ Պետեկամուտների կոմիտեի կողմից նախաձեռնված «Մեկ պատուհան արտաքին առևտրի ոլորտում» ազգային պորտալը տնտեսվարողների սպասարկման նպատակով արդեն ինտեգրել է մոտ 2 էլեկտրոնային համակարգերի: Այս մասին հոկտեմբերի 11-ին կայացած մամուլի ասուլիսում հայտարարել է ՊԵԿ տեղեկատվական տեխնոլոգիաների վարչության պետ Միքայել Փաշայանը:

Փաշայանի խոսքերով, այսօր պորտալը մատուցում է ծառայություններ, որոնք վերաբերում են տնտեսվարող սուբյեկտներին ապրանքների ծագման վկայագրերին, անասնաբուժական և բուսասանիտարական հավաստագրերին, դեղորայքի մատակարարման թույլտվություն ստանալուն, բազմաֆունկցիոնալ միջոցների ներմուծման լիցենզավորմանը և այլն: «Մեկ պատուհանի» շրջանակում, բացի ՊԵԿ-ից ներգրավված են ՀՀ Առողջապահության նախարարությունը, Կապի և տրանսպորտի նախարարությունը, Սննդի անվտանգության պետական ծառայությունը:

Նրա խոսքով, Պետական եկամուտների կոմիտեն, տեխնոլոգիական զարգացման ժամանակակից միտումներին համահունչ, շարունակում է քաղաքացիների և արտաքին տնտեսական գործունեություն իրականացնողների համար հարմարավետ, թափանցիկ և մատչելի ծառայություններ մատուցել:

Ըստ նրա՝ արտաքին տնտեսական գործունեություն իրականացնողն այսուհետ կարող է միայն մեկ անգամ տեղեկատվություն տրամադրել որևէ պետական մարմնի, քանի որ այս հարթակն էլեկտրոնային փոխգործակցություն է ապահովում պետական մարմինների միջև. «Արդյունքում արտահանում և ներմուծում իրականացնողները կարողանում են կենտրոնանալ բիզնեսի կազմակերպման վրա՝ հավաստագրերի, թույլտվությունների, տարբեր փաստաթղթերի ստացման վրա ժամանակ և ֆիանսական ռեսուրսներ ծախսելու փոխարեն»:

«ՀՀ արտաքին առևտրի ազգային մեկ պատուհան» հարթակում արդեն 20 համակարգ է ներդրված: Մի մասն ուղղված է մաքսային մարմնի և գործարարների էլեկտրոնային փոխգործակցությանը: Այդպիսին են ապրանքների հայտարարագրի, տարանցման հայտարարագրի, ապրանքների դասակարգման նախնական որոշման, փոստային առաքանիների հաշվառման համակարգերը: Մյուս մասը վերաբերում է արտաքին տնտեսական գործունեությանն առնչվող մաքսային մարմինների, այլ գերատեսչությունների և գործարարների կողմից շահագործվող թույլատրող փաստաթղթերի էլեկտրոնային տրամադրմանը, օրինակ՝ առողջապահության նախարարության հավաստագիրը, սննդամթերքի անվտանգության պետական ծառայության հավաստագիրը, ռադիոհաճախականության սարքավորումների ներմուծման արտոնագրերի տրամադրման համակարգը: «Միասնական հարթակի գործարկման արդյունքի գնահատումը ցույց է տալիս, որ էլեկտրոնային արդիական համակարգերի ներդրման շնորհիվ բարելավվում է տրամադրվող տեղեկատվության և ծառայությունների որակը, ստեղծվում արտաքին տնտեսական գործունության իրականացման բարենպաստ միջավայր, ապահովվում բարձր արդյունավետություն և ծախսերի կրճատում»,-նշել է Միքայել Փաշայանը՝ հավելելով, որ պարզեցվել և արագացվել է նաև սահմանային անցումային կետերով ապրանքների ու տրանսպորտային միջոցների տեղափոխման գործընթացը: Կոմիտեի ՏՏ վարչության պետն ընդգծել է, որ «ՀՀ արտաքին առևտրի ազգային մեկ պատուհան» հարթակը բարձր գնահատականների է արժանացել միջազգային կառույցների կողմից իրականացվող ծրագրերի և հետազոտությունների արդյունքում. «Գրանցված ձեռքբերումները նպաստում են նոր գաղափարների իրագործմանը՝ միտված քաղաքացիների և պետական կառավարման մարմնի միջև առավել արդյունավետ, գործընկերային և փոխադարձ վստահության վրա հիմնված հարաբերությունների զարգացմանն ու ամրապնդմանը»:
Փաշայանը տեղեկացրել է, որ «ՀՀ արտաքին առևտրի ազգային մեկ պատուհան» հարթակի ներդրումն իրականացվում է փուլային եղանակով: Առաջին փուլում ապահովվում է պետական գերատեսչությունների միջև տեղեկատվության էլեկտրոնային փոխանակումը, երկրորդ փուլում՝ պետական մարմնի և առևտրային կազմակերպությունների՝ բանկերի, ապահովագրական ընկերությունների, փոխադրող կազմակերպությունների միջև համագործակցությունը: Երրորդ փուլում երկու երկրների միջև նախնական տեղեկատվության փոխանակման շնորհիվ կազմակերպվելու է սահմանահատման սահուն գործընթաց՝ ռիսկերի կառավարման համակարգի օգնությամբ իրականացնելով անտեսանելի հսկողություն: