Արմինֆո. Ֆինանսների նախարար Վարդան Արամյանը Վաշինգտոնում մասնակցել է Արժույթի միջազգային հիմնադրամի և Համաշխարհային բանկի խմբի հանդիպումների պլենար նիստին։ Նիստի ընթացքում ելույթներով հանդես են եկել ՀԲ խմբի նախագահ Ջիմ Յոն Կիմը և ԱՄՀ-ի կառավարիչ-տնօրեն Քրիստինա Լագարդը։
Ինչպես ԱրմԻնֆո-ին հաղորդեցին Ֆինանսների նախարարության մամուլի ծառայությունից, Ջիմ Յոն Կիմն անդրադարձել է գլոբալ տնտեսական հիմնախնդիրներին, որոնց ներկայումս բախվում են երկրները, և կարևորել է մարդկության կյանքի բարելավման ուղղությամբ միասնական օրակարգի ձևավորման անհրաժեշտությունը։ Նա նաև նշել է Համաշխարհային բանկի ներկա առաջնահերթությունները, որոնք են՝ ներառական և կայուն տնտեսական աճ, ավելի շատ և ավելի արդյունավետ ներդրումներ մարդկային կապիտալում։
Արժույթի միջազգային հիմնադրամի կառավարիչ-տնօրեն Լագարդն իր ելույթում անդրադարձ է կատարել մարդկանց միջև անհավասարությունների վերացմանը, երիտասարդությանը, կլիմայի փոփոխության և կոռուպցիային առնչվող խնդիրներին և կոչ արել բոլոր երկրներին միավորել ջանքերը բարձրացված խնդիրների լուծման ուղղությամբ։
Տարեկան հանդիպումների շրջանակներում ՀՀ ֆինանսների նախարար Վարդան Արամյանը քննարկումներ է ունեցել «VTB», «Bank of America Merrill Lynch», «Citibank», «Deutsche Bank», «J.P. Morgan» կազմակերպությունների և «Moody's» վարկանիշային կազմակերպության ներկայացուցիչների հետ։
Նախարար Արամյանը ներկայացրել է ՀՀ ընդհանուր բյուջետային իրավիճակը, բյուջեի պլանավորման մեխանիզմները և հիմնական սկզբունքները, ինչպես նաև ծրագրային բյուջետավորման ներդնումը։ Անդրադարձ է կատարվել տնտեսական աճի տեմպերին, դրանց վրա ազդող գործոններին և ապագա կանխատեսումներին։ Հանդիպումների ընթացքում նախարարը նաև ներկայացրել է հարկային ոլորտի բարեփոխումները և հարկաբյուջետային կանոնների փոփոխության ուղղությամբ մեկնարկած գործընթացը՝ մանրամասնելով այդ փոփոխությունների հիմնական փիլիսոփայությունը և ընդգծել, որ դրանք ուղղված են երկարաժամկետ հեռանկարում տնտեսական աճի ապահովմանը։ «Moody's» վարկանիշային կազմակերպության ներկայացուցիչների հետ հանդիպման ընթացքում, խոսելով ՀՀ-ում վերջին շրջանում նախաձեռնած բարեփոխումների շրջանակի մասին, նախարարը մեծապես կարևորել է վարկանիշային կազմակերպությունների դերը օտարերկրյա ներդրումների ներգրավման գործում։
ՀԲ և ԱՄՀ խմբի ամենամյա խորհրդակցությունների ընթացքում քննարկվում են այնպիսի հարցեր, ինչպես` համաշխարհային տնտեսական հեռանկարները, աղքատության վերացումը, տնտեսայկան զարգացումն ու տրամադրվող օգնության արդյունավետությունը: Վերջինների շրջանակում անցկացվում են նաև սեմինարներ, տարածաշրջանային ճեպազրույցներ, մամուլի ասուլիսներ և բազմաթիվ այլ միջոցառումներ` կողմնրոշված համաշխարհային տնտեսությանը, միջազգային զարգացմանն ու համաշխարհային ֆինանսական համակարգին:
ՀԲ կանխատեսման համաձայն, Հայաստանի ՀՆԱ աճը 2017 թվականին` 2,7%` 2018թ, մինչև 3,1% տեմպերի արագացմամբ, 2019` մինչև 3,4%: ԵԱԶԲ կանխատեսմամբ` 2017 թվականին սպասվում է Հայաստանի ՀՆԱ 2,9% աճ, Ասիական զարգացման բանկի կանխատեսմամբ` 2,2%: Fitch 2017 թվականին Հայաստանի ՀՆԱ աճի կանխատեսումը բարելավել է նախորդ 2,1%-ից մինչև ներկայի 3,4%` 2018թ. մինչև 3,6% արագացմամբ: 2017թ. Հայաստանի պետբյուջեում ամրագրված է ՀՆԱ 3,2% աճ, սակայն կառավարությունը խոսում է 5% աճի մասին: ՀՀ ԿԲ թարմացված կանխատեսման հնամաձայն, Հայաստանի ՀՆԱ աճը 2017թ. կկազմի 3,9-4,8%:
ՀՀ ազգային վիճակագրական ծառայության տվյալների համաձայն, 2017թ. հունվար-օգոստոսին տնտեսական ակտվությունը բարձրացել է տարեկան 5,5%-ով` 2016 թվականի նույն ժամանակահատվածի 2,4% աճի դիմաց: Աճի արագացում են «հրահրել՚, հիմնականում, արդյունաբերությունը (12,4%), ծառայությունների ոլորը (12,4%) և առևտուրը (12,3%): Այդ ժամանակահատվածում արտաքին առևտրի շրջանառությունն ավելացել է տարեկան 24,4%` արտահանման 21,7% և ներմուծման 26% աճի առնչությամբ: 2016 թվականին Հայաստանի ՀՆԱ աճը դանդաղել է մինչև 0,2%` 2015թ. 3,2%-ից, ընդ որում, սպառողական գների դեֆլյացիան 2016 թվին հասել է 1,1%-ի` 2015 թվականի 0,1%-ից: