Արմինֆո. Կոնվերս Բանկը 4 մլն.դոլար ծավալով դոլարային պարտատոմսերի երկրորդ տրանշի տեղաբաշխումով կավարտի 10 մլն.դոլար ծավալով առաջին թողարկման տեղաբաշխումը: Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, երկրորդ տրանշի առաջնային տեղաբաշխումը մեկնարկել է հոկտեմբերի 19-ին: Դոլարային թողարկման առաջին տրանշի տեղաբաշխումը մեկնարկել է մայիսի 5-ին և ավարտվել մայիսի 16-ին, իսկ մայիսի 26-ին կայացել է ցուցակումը բորսայում:
Դոլարային թողարկման երկրորդ տրանշի պարտատոմսերը նույնպես ունեն 2 տարի շրջանառության ժամկետ, 100 դոլար անվանական արժեքով, իսկ կես տարին մեկ անգամ նախատեսվում է արժեկտրոնային վճարումները: Երկրորդ տրանշի արժեկտրոնի տարեկան եկամտաբերությունը կազմում է 5.25%, իսկ 1-ին տրանշինը`5.75%:
«Այս անգամ ևս, ինչպես և նախորդ թողարկումներում, մեր պարտատոմսերը մեծ հետաքրքրություն են առաջացրել շուկայում: Մենք մեր ռազմավարության շրջանակներում շարունակում ենք ընդլայնել հաճախորդների համար հավելյալ արժեք ստեղծող պրոդուկտների ցանկը: Կոնվերս Բանկի պարտատոմսերի թողարկումը, որպես ավանդներին այլընտրանք, այդ ցանկի առաջին ներդրումային պրոդուկտն է»,- ասել է Կոնվերս Բանկի Ֆինանսական տնօրեն Հրանտ Հակոբյանը:
Առաջնային տեղաբաշխումից հետո տեղի կունենա դոլարային պարտատոմսերի երկրորդ տրանշի ցուցակումը բորսայում, որոնք կշրջանառվեն կորպորատիվ պարտատոմսերի շուկայում: Կոնվերս Բանկի պարտատոմսերի նախորդ թողարկումներն արդեն իսկ ցուցակված են «ՆԱՍԴԱՔ ՕԷՄԷՔՍ Արմենիա» ֆոնդային բորսայի հիմնական ցուցակում:
Երկրորդային շուկայում, այս տարվա հոկտեմբերի 16-ի դրությամբ, Կոնվերս բանկի շրջանառվող դոլարային պարտատոմսերի եկամտաբերությունը կազմել է 5.63%`առքի դեպքում և 5.33%`վաճառքի դեպքում, իսկ դրամով պարտատոմսերինը համապատասխանաբար կազմել է`10.5% և 9.95%: «Սա ցույց է տալիս այդ պարտատոմսերի նկատմամբ բարձր պահանջարկի և բանկի նկատմամբ վստահության մասին», - եզրափակել է Գ.Հակոբյանը`հավելելով, որ պարտատոմսերը երաշխավորված են Ավանդների հատուցումը երաշխավորող հիմնադրամի կողմից՝ ավանդների երաշխավորման ծավալներով:
Հիշեցնենք, որ այս տարվա հոկտեմբերի 19-ի դրությամբ: ՆԱՍԴԱՔ ՕԷՄԷՔՍ Արմենիա ֆոնդային բորսայում շրջանառվում են Կոնվերս Բանկի 6 մլն դոլար ծավալով առաջին տրանշը, որը թողարկվել է մայիսի 5-ին և ցուցակվել մայիսի 26-ին, ինչպես նաև 1 մլրդ.դրամ ծավալով դրամային թոսղարկումը, որը թողարկվել է օգոստոսի 3-ին և ցուցակվել սեպտեմբերի 15-ին: Բանկի դոլարային պարտատոմսերի եկամտաբերությունը կազմել է 5,75%, իսկ դրամով պարտատոմսերինը`10,5%: Երկու դեպքում էլ շրջանառության ժամկետը սահմանված է 2 տարի, իսկ արժեկտրոնային վճարները կատարվում են վեց ամիսը մեկ անգամ: Նշենք, որ Կոնվերս Բանկ ՓԲԸ գործում է 1996 թվականից: Բանկի բաժնետերերն են` «Ըդվանսդ Գլոբալ Ինվեսթմենթս» ԷլԷլՍի (80,94%), «ՀայՓոստ Թրասթ Մենեջմենթ» Բի. ՎԻ. Ընկերություն (14.06%) և Հայաստանյաց Առաքելական Սուրբ Եկեղեցի (5%): 2017 թվականի հոկտեմբերի 1-ին Կոնվերս Բանկի ակտիվները կազմել են 233.4 մլրդ.դրամ, պարտավորությունները`198.7 մլրդ.դրամ, ընդհանուր կապիտալը`34.8 մլրդ.դրամ:
Նշենք, որ ընդհանուր առմամբ ՆԱՍԴԱՔ ՕԷՄԷՔՍ Արմենիա բորսայում 2017 թվականի հոկտեմբերի 19-ի դրությամբ շրջանառվում են 10 թողարկողների 23 դոլարային պարտատոմսերը, ընդ որում, 19 թողարկումներն իրականացրել են 7 բանկերը` Արարատբանկ (5 թողարկում), Ամերիաբանկ (4), Արմսվիսբանկ (4), Անելիք Բանկ (3), Հայբիզնեսբանկ, Կոնվերս Բանկ և Յունիբանկ`մեկ դոլարային տրանշ: Բացի այդ, բորսայում շրջանառվում են եվրոյով 2 տրանշեր`Ամերիաբանկից և Արմսվիսբանկից:
Ալեքսեյ Մելնիկով. ՀԿԵ-ն թողունակության բավականին լուրջ պաշար ունի
Հայաստանում դոլարային հիփոթեքի արգելքը՝ սպառողի շահերի պահապան թե բանկային շահերի լոբբինգ. Կարեն Զաքարյան
Ինչպես է փոխվել միջին աշխատավարձ ստացող քաղաքացու կենսամակարդակը վերջին տարում
ԵԱՏՄ երկրներ ավտոմեքենա վաճառելիս ՊԵԿ-ի տեղեկանքները չեղարկվել են
Հայաստանի տնտեսությունն անառողջ է. տնտեսագետն առաջարկում է առկա խնդիրների լուծման եղանակներ
ԱԶԲ պատվիրակությունն այցելել է Հյուսիս-Հարավ ճանապարհային միջանցքի Սիսիան-Քաջարան հատված
Հայաստանի բանկերի միության խորհրդի նախագահ է ընտրվել Մհեր Անանյանը