Պրոֆեսոր. ՀԱԷԿ փակման վերաբերյալ Եվրամիության պահանջները վերաբերում են կայանի առաջին էներգաբլոկը շահագործումից հանելուն

Արմինֆո. ՀԱԷԿ փակման վերաբերյալ Եվրամիության պահանջները վերաբերում են կայանի առաջին էներգաբլոկը շահագործումից հանելուն: Այդ մասին այսօր մամուլի ասուլիսի ժամանակ հայտարարել է «Հայատոմ» ԳՀԻ» ՓԲԸ գլխավոր տնօրեն, պրոֆեսոր Վահրամ Պետրոսյանը:

Նրա խոսքով, առաջին բլոկը ներկայումս չի շահագործվում, իսկ երկրորդ բլոկում վերջինիս շահագործման ժամկետը 10 տարով երկարաձգմանն ուղղված միջոցառումներ են իրականացվում: Ներկայումս բլոկում ռուսաստանցի մասնագետների հետ միասին, հիմնվելով միջազգային փորձի վրա, իրականացվում է ՀԱԷԿ N2 էներգաբլոկի շահագործման ժամկետը՝ մինչև 2026 թվականը երկարաձգմանն ուղղված ծրագիր: Ըստ որում, առաջին էներգաբլոկը դոնոր կհանդիսանա երկրորդի համար: Վահրամ Պետրոսյանը հիշեցրել է, որ նման բլոկների շահագործման ժամկետները, որպես կանոն, երկարաձգվում են 30 և ավել տարով: Ռուսաստանի, Ուկրաինայի, Հունգարիայի, Ֆինլանդիայի օրինակները դրա ակնհայտ վկայություն են:

Պրոֆեսորը նշել է այլընտրանքային և վերականգնվող էներգետիկայի զուգահեռ զարգացման անհրաժեշտությունը, սակայն ատոմային էներգետիկան այլընտրանք չունի, քանի որ խոսքը վերաբերում է ինչպես Հայաստանի էներգետիկ համալիրի, այնպես էլ՝ ընդհանուր առմամբ երկրի անվտանգությանը: «Արդյունաբերական նշանակության գեներացիայի այլընտրանքային աղբյուրներ առաջիկա տարիներին ապահովել չենք կարող»,- ասել է Վահրամ Պետրոսյանը: Նա ընդգծել է, որ համաձայն բոլոր միջազգային փորձագիտական գնահատականների՝ ՀԱԷԿ-ն անվտանգ օբյեկտ է, որը կգործի այնքան ժամանակ, քանի դեռ չեն ստեղծվել այլընտրանքային հզորություններ: Իսկ այդ հզորությունները կապված են միջին հզորության նոր բլոկի կամ մի քանի փոքր բլոկների կառուցման հետ: Առաջիկա 2 տարում այդ նախագիծն իր արտացոլումը կգտնի ՀՀ կառավարության որոշման մեջ: 

ՀՀ նախագահին կից ատոմային էներգետիկայի անվտանգության խորհրդի նախագահ Միրոսլավ Լիպարն իր հերթին, պատասխանելով ԱրմԻնֆո-ի հարցին, նշել է, որ պարբերաբար Հայաստան են այցելում տարբեր մասնագիտացված առաքելություններ, այդ թվում՝ ՄԱԳԱՏԷ-ից, որոնց եզրակացություններն ու

առաջարկները թույլ են տալիս բարձրացնել ՀԱԷԿ անվտանգության մակարդակը: Այդ աշխատանքներն իրականացվում են՝ այլ երկրների ВВЭР ռեակտորով համանման բլոկներում կուտակված փորձի հիման վրա /Սլովակիա, Չեխիա, Ռուսաստան, Հունգարիա/: Այն երկրներում, որտեղ ատոմակայանները շահագործվում են, դրանց շահագործման ժամկետի երկարաձգումը  ստանդարտ ընթացակարգ է: Նւոյնիսկ ԱՄՆ-ում, որտեղ ատոմային ռեակտորների շահագործման ժամկետը սահմանափակված է 40 տարով, այսօր դրանց շահագործման ժամկետը ևս 20 տարով երկարաձգելու ուղղությամբ աշխատանք է տարվում: «Հայաստանում և Սլովակիայում գործող ռեակտորների շահագործման ժամկետը կազմում է 30 տարի, սակայն բոլոր հիմքերը կան դրանց շագագործման ժամկետը ևս 10 տարով երկարձգելու համար, ինչից հետո համապատասխան ուսումնասիրությունների արդյունքում կարելի է բլոկների հետագա ճակատագրի վերաբերյալ եզրակացություն անել»,- ասել է Միրոսլավ Լիպարը: Ավելի վաղ ՀՀ Էներգետիկ ենթակառուցվածքների և բնական պաշարների նախարար Աշոտ Մանուկյանը նշել էր, որ ՀԱԷԿ երկրորդ էներգաբլոկի հնարավորությունները անվերջ չեն, բայց այն կաշխատի այնքան, որքան թույլ կտա ռեսուրսը: Միայն դրանից հետո այն կփակվի, իսկ փոխարենը կկառուցվի նոր ատոմային բլոկ: