Արմինֆո. Վարչապետ Կարեն Կարապետյանի գլխավորությամբ կառավարությունում տեղի է ունեցել Հյուսիս-հարավ ճանապարհային միջանցքի և Քաղաքային կայուն զարգացման ներդրումային ծրագրերի կառավարման խորհրդի հերթական նիստը:
Ինչպես տեղեկացնում է ՀՀ կառավարության տեղեկատվության և հասարակայնության հետ կապերի վարչությունը, Խորհուրդն ի գիտություն է ընդունել «Սերենիսսիմա կոստրուցիոնիե ընկերության հետ պայմանագրի լուծումը և հաստատել Երևանի արևմտյան շրջանցիկ ճանապարհի Արգավանդ-Շիրակ ճանապարհահատվածի կառուցման շինարարական աշխատանքների ձեռքբերման մրցութային փաստաթղթերի փաթեթը:
Խորհուրդը քննարկել և հաստատել է նաև Քաղաքային կայուն զարգացման ներդրումային ծրագրի «Տրանշ 2ե-ի շրջանակում աուդիտի ծառայությունների ձեռքբերման մրցույթի գնահատման արդյունքները և պայմանագիրը շնորհել «Գրանդ Թորոնթոնե ՓԲԸ-ին:
Իտալական ընկերության հետ պայմանագրի լուծման պատճառների մասին մամուլի ծառայության հաղորդագրության մեջ ոչինչ չի ասվում: Մինչդեռ հարկ է նշել, որ դեռ 2016 թ. հուլիսի 21-ին Հայաստանի կառավարությունը Քաղաքային կայուն զարգացման ներդրումային ծրագրի «Տրանշ 2ե-ի շրջանակում Արգավանդ-Շիրակ ճանապարհահատվածի կառուցման թույլտվություն էր տվել «Սերենիսսիմա կոստրուցիոնի ընկերությանը:
2016 թ. մարտի 24-ին Երևանի քաղաքապետարանի և իտալական Serenissima Costruzioni ltd ընկերության միջև Արգավանդ-Շիրակ ճանապարհահատվածի կառուցման վերաբերյալ պայմանագիր էր ստորագրվել: Երևանի քաղաքապետարանի և միջազգային հայտամրցույթում հաղթած Serenissima Costruzioni ltd ընկերության միջև ստորագրված պայմանագիրն ուղղված է Երևանի շրջանցիկ ճանապարհի կառուցման վարկային ծրագրի իրականացմանը:
Նշենք, որ շինարարական պայմանագրի աշխատանքները ներառում են Հրազդան գետի վրայով 257մ երկարությամբ նոր մետաղական կամրջի և մոտ 2,7 կմ երկարությամբ երկկողմանի երթևեկությամբ նոր ճանապարհի կառուցում:
Կամրջի տակ տեղադրվելու է ջրի և նավթայուղերի մշտական զատիչ՝ նավթայուղերի հոսքը դեպի գետ կանխելու համար: Նոր ճանապարհն ունենալու է մոտ 24 մ լայնությամբ երթևեկելի հատված՝ 4-6 երթևեկելի գոտիներով: Աշխատանքների տևողությունը՝ 24 ամիս:Կառուցվող նոր ճանապարհահատվածում տեղադրվելու են միջազգային չափորոշիչներին համապատասխան լուսադիոդային (LED) լուսատուներ:
Հիշեցնենք, որ 2015թ. հոկտեմբերի 13-ին Հայաստանի Հանրապետության և Ասիական զարգացման բանկի միջև ստորագրվել է «Քաղաքային կայուն զարգացման ներդրումային ծրագիր- Ծրագիր 2ե վարկային համաձայնագիրը, որով Հայաստանի Հանրապետությանը տրամադրվել է վարկ` 112,970,000 մլն ԱՄՆ դոլար գումարի չափով: Ծրագրի նպատակն է բարելավել ՀՀ քաղաքներում քաղաքային տրանսպորտի ենթակառուցվածքները` ապահովելով ավելի արդյունավետ, ապահով և մատչելի տրանսպորտային ծառայություններ: