Հինգշաբթի, 16 Նոյեմբերի 2017 18:36

Արմինֆո. «Վնեշէկոնոմբանկ» Ռուսաստանի զարգացման բանկը և «ՓՄՁ ներդրումներ» ՈւՎԿ ՓԲԸ-ն սահմանել են երկկողմ համագործակցության ոլորտները` արդյունաբերություն, տրանսպորտ, նորարարություններ, ՏՏ և հեռահաղորդակցություն: Համապատասխան հուշագիրը  ստորագրվել է 2017 թվականի նոյեմբերի 15-ին: Ինչպես ԱրմԻնֆո գործակալությանը տեղեկացվել է նախարարության մամուլի ծառայությունից, փաստաթուղթը ստորագրել են «Վնեշէկոնոմբանկի» նախագահի առաջին տեղակալ, վարչության անդամ Նիկոլայ Ցեխոմսկին և «ՓՄՁ ներդրումներ»-ի գործադիր տնօրեն Արթուր Բադալյանը:

 

Աղբյուրի համաձայն, ՎԷԲ-ը և «ՓՄՁ ներդրումներ»-ը պայմանավորվածություն են ձեռք բերել երկու երկրների համագործակցության հիմնական ոլորտներում ներդրումների ընդլայնման աջակցության  և ֆինանսավորման  վերաբերյալ: Կողմերը կքննարկեն և կուսումնասիրեն «ՓՄՁ ներդրումներ»-ի համար «Վնեշէկոնոմբանկի» կողմից վարկային գծի բացման հնարավորությունը՝ ինչպես ռուսական արտադրության ապրանքների արտահանման ծրագրերի, այնպես էլ Հայաստանի տարածքում ռուսական կապիտալի մասնակցությամբ դեպի երրորդ երկրներ արտահանման ուղղվածություն ունեցող համատեղ արտադրությունների  ֆինանսավորման համար: Նաև ՎԷԲ-ը, որպես ազգային զարգացման ֆինանսական կառույց, կկիսվի փորձով և խորհրդատվության ձևով օժանդակություն կցուցաբերի «ՓՄՁ ներդրումներ»-ին:

 

«Ռուսաստանը և Հայաստանը փոխշահավետ համագործակցության հարուստ փորձ ունեն, և ստորագրված հուշագիրը երկու երկրների զարգացման ինստիտուտների համար համագործակցության նոր հնարավորություններ կբացի, ինչը կնպաստի ապրանքաշրջանառության աճին, ներդրումների ավելացմանը և արտադրական կոոպերացիային՝ տնտեսության ռազմավարական ճյուղերում: Սա կարևոր քայլ է ինչպես մեր երկկողմ համագործակցության համար, այնպես էլ ԵԱՏՄ տարածքում ինտեգրացիոն գործընթացների շրջանակներում»,- նշել է Նիկոլայ Ցեխոմսկին:

 

«Մեզ հետաքրքիր է «Վնեշէկոնոմբանկի» փորձը, ռազմավարությունը, բիզնես մոդելը` որպես զարգացման ազգային ֆինանսական կառույց: «ՓՄՁ ներդրումներ» ՈւՎԿ ՓԲԸ-ն շուտով անդամակցելու է ԵԱՏՄ զարգացման բանկերի խորհրդին, եւ մենք պատրաստ ենք համագործակցել ինչպես ՎԷԲ-ի, այնպես էլ Խորհրդի մյուս անդամների հետ համատեղ ծրագրերի ընտրության, ուսումնասիրության և իրականացման հարցերում», - ասել է Արթուր Բադալյանը:

 

Ըստ ԱրմԻնֆո գոչրծակալության` Հայաստանի վարկային կազմակերպությունների Ռենկինգի, երկրի 30 ունիվերսալ վարկային կազմակերպությունների շարքում «ՓՄՁ ներդրումներ» ընկերությունն իր հիմնական ցուցանիշներով ընդգրկված է լավագույն տասնյակում: Այսպես, «ՓՄՁ ներդրումներ» ընկերության վարկային ներդրումների ծավալը հոկտեմբերի 1-ին կազմել է 8.1 մլրդ դրամ ($ 17 մլն, տարեկան աճը`11%), ակտիվները կազմել են 15,3 մլրդ դրամ ($ 32 մլն, տարեկան աճը`26,3%): Միայն երրորդ եռամսյակում ընկերության վարկային պորտֆելն աճել է 33.5%, ինչի արդյունքում ակտիվների եռամսյակային աճը կազմել է 30.4%: 2016 թվականին ընկերության զուտ շահույթն աճել է  56.3%: «ՓՄՁ ներդրումներ» ընկերությունը հայկական շուկայում գործում է 2009 թվականի օգոստոսից: Ընկերության միակ բաժնետերն է «Փոքր և միջին ձեռնարկությունների զարգացման ազգային կենտրոն» հիմնադրամը: