Արման Բարսեղյան. Հայաստանի բանկային շուկայում տոկոսադրույքների հետագա իջեցումը քիչ հավանական է

Արմինֆո. Այսօր Հայաստանի բանկային շուկայում տիրող իրավիճակն այնպիսին է, որ չպետք է սպասել տոկոսադրույքների հետագա իջեցմանը: Այս մասին Ամերիաբանկի ֆեյսբուքյան էջի միջոցով ընթացող «Տոկոսադրույքների փոփոխման միտումները» խորագրով առցանց-կոնֆերանսի ընթացքում հայտարարել է Ամերիաբանկի մանրածախ բանկինգի տնօրեն Արման Բարսեղյանը, պատասխանելով ԱրմԻնֆոյի թղթակցի հարցին:

Նա պարզաբանել է, որ տոկոսադրույքների իջեցման հետևանքով, շատ բանկերի տեսանկյունից, այսօր շահութաբերության մակարդակը տնտեսապես արդարացված չէ: «Դրամային ավանդների դեպքում տոկոսադրույքները արդեն նվազել են մինչև 8-9%, բայց ի տարբերություն դոլարային ավանդների, դրամային տոկոսադրույքները դեռ ունեն որոշակի իջեցման տեղ, ինչը, այնումանեյնիվ, բանկերին թույլ կտա ապահովել համարժեք շահութաբերություն: Կարծում եմ, որ տոկոսադրույքների անկումը կդադարի և կկայունանա: Հետագայում, կախված հանգամանքներից, հնարավոր է որոշակի աճ, բայց եթե նույնիսկ դա տեղի չունենա, տոկոսադրույքների հետագա իջեցումը քիչ հավանական է», - ասել է նա, նշելով, որ վարկի կարիք ունեցող տնտեսվարողները պետք է այսօր  օգտվեն այդ հնարավորությունից:

Ըստ ՀՀ ԿԲ տվյալների, դրամով վարկերի տոկոսադրույքները 2017 թվականի սեպտեմբերի 1-ի դրությամբ կազմել են 14.01% (նախորդ տարի`17.44%), իսկ դրամով ավանդների տոկոսադրույքները`9.42% (նախորդ տարի`12.04%):

Ըստ ԱրմԻնֆո գործակալության`Հայաստանի Բանկերի Ֆինանսական Վարկանիշի,  30.09.2017թ. դրությամբ Հայաստանի բանկային համակարգի ընդհանուր կապիտալը կազմել է 680.5 մլրդ դրամ, տարեկան աճը`17,8%, ակտիվները կազմել են 4,1 մլրդ դրամ, տարեկան աճը`19%, պարտավորությունները`3,4 տրլն դրամ, տարեկան աճը`19.2%: Ակտիվների կառուցվածքում վարկային ներդրումները կազմել են 64.2% կամ 2.6 տրլն դրամ, տարեկան աճը`18.7%, ընդ որում, կորպորատիվ պորտֆելն աճել է 17.6%, իսկ մանրածախի պորտֆելը`14,4%: Իսկ ընդհանուր պարտավորությունների կառուցվածքում ժամկետային ավանդները կազմել են 46.6% կամ 1.6 տրլն դրամ (տարեկան աճը`18,6%), ցպահանջ պարտավորությունները`23.9% կամ 822,8 մլրդ դրամ (տարեկան աճը`50,4%), իսկ միջազգային փոխառությունները (միջբանկային վարկեր) կազմել են 20.6% կամ 707.9 մլրդ դրամ (տարեկան անկումը`1.4%): Վարկավորումից ստացված եկամուտները տարեկան կտրվածքով աճել են 11%, ժամկետային ավանդներիի և ընթացիկ հաշիվների ծախսերն ավելացել են 17.2%, իսկ միայն III եռամսյակում վարկավորման եկամուտները կրճատվել են 1.4%, իսկ ժամկետային ավանդների և ընթացիկ հաշիվների գծով ծախսերի աճը կազմել է 13.1%: Համակարգի զուտ շահույթը տարեկան կտրվածքով ավելացել է 69.8%, 9 ամիսներին հասենելով 29,5 մլրդ դրամի, որից 10.2 մլրդ-ն ապահովվել է III եռամսյակում, 18% աճով: Ամերիաբանկը շուկայի առաջատարն է ընդհանուր կապիտալով, ակտիվներով, վարկային պորտֆելով (ինչպես նաև կորպորատիվ), արժեթղթերում կատարված ներդրումներով, ընդհանուր պարտավորություններով (ցպահանջ ավանդներով և միջազգային փոխառություններով), երկրորդ տեղում է կանոնադրական կապիտալով և զուտ շահույթով, և 3-րդ տեղում է ժամկետային ավանդներով:

Հիշեցնենք, որ «Ամերիաբանկ» ՓԲԸ ունիվերսալ բանկ է, որը մատուցում է կորպորատիվ, ներդրումային և մանրածախ բանկային ծառայություններ` տրամադրելով բանկային լուծումների ամբողջական փաթեթ: Բանկը հայաստանյան շուկայում գործում է 1996 թվականի հոկտեմբերի 31-ից: Ամերիաբանկն ունի 12 մասնաճյուղ, որից 8 գտնվում է մայրաքաղաքում, իսկ 4-ը`Հայաստանի մարզերում: 2017 թվականի հունվարի 1-ի դրությամբ Բանկի բաժնետերեն են` Ameria Group CY ՍՊԸ – 65,8%, ՎԶԵԲ - 20,7%, ESPS Holding Limited - 13,5%:-