«Հայկական նավթի և գազի ընկերությունը» ձեռնամուխ կլինի Շիրակում, Տավուշում և Լոռիում երկրաբանական հետախուզական աշխատանքների

Արմինֆո. «Հայկական նավթի և գազի ընկերությունը» ձեռնամուխ կլինի Շիրակում, Տավուշում և Լոռիում երկրաբանական հետախուզական աշխատանքների:

Ինչպես Շիրակի մարզային վարչությունում խորհրդակցության ժամանակ ասել է ընկերության ներկայացուցիչ Էրիկ Անանյանը, ՍՊԸ-ն չի պատրաստվում նավթի որոնման համար կիրառել հորատման մեթոդ, այլ կօգտագործի ժամանակակից տեխնոլոգիաներ՝ հիմնված մագնիսական ալիքների վրա: 

Շիրակի մարզում որոնողական աշխատանքներ կիրականացվեն Ոսկեհասկում, Ամասիայում, Հայկավանում, Կապսում, Առափիում: Նույն օրը համանման խորհրդակցություններ են անցկացվել Լոռիում: Այսօր խորհրդակցություն տեղի կունենա Տավուշի մարզպետի հետ:

«Հայկական նավթի և գազի ընկերությունե ՍՊԸ-ն մտադիր է նավթի և գազի երկրաբանական հետախուզություններ անցկացնել ՀՀ տարածքի 1-ին և 3-րդ պայմանական բլոկներում: 1-ին պայմանական բլոկը հատման կետեր ունի հայ-թուրքական և հայ-վրացական սահմանների հետ, 3-րդը՝ հայ-վրացա-ադրբեջանական սահմանների հետ:

Եթե Շիրակի մարզի տարածքները, որտեղ նախատեսվում է որոնողական աշխատանքներ իրականացնել, հարցեր չեն առաջացնում, ապա Լոռիի և Տավուշի մարզերում այդ ցանկում մի շարք հատուկ պահպանվող տարածներ են ներառված՝ «Արփի լիճ» և «Դիլիջան» ազգային պարկերը,  Մրտավարդենու, Զիկատարի, Գյուլագարակի, Իջևանի, Մարգահովտի, Գանձաքարի, Հանքավանի ջրաբանական, Ախնաբադի կենու և Գետիկի արգելավայրերը, որոնք ունեն

հարուստ կենդանական և բուսական աշխարհ, այդ թվում՝ Կարմիր գրքում գրանցված տեսակներ: Ծրագրի ազդեցության գոտին ներառում է 43 համայնք:

Սակայն, ՍՊԸ հայտի համաձայն, ինչպես հետախուզական, այնպես էլ հետագա բոլոր աշխատանքները կիրականացվեն նորագույն հատուկ տեխնոլոգիաներով՝ ուղղված շրջակա միջավայրին, կանաչ տարածքներին վնասը նվազագույնի հասցմանը:

Երկրաբանական հետախուզություններ կիրականացվեն «Գեոիմպուլս» ռուսական կենտրոնի կողմից: Ընդհանուր առմամբ 800 կմ2 տարածքում հետախուզական աշատանքների համար կպահանջվի 100 մլն ռուբլի:

Հատկանշական է, որ ընկերությունն առայժմ երկրաբանական հետախուզությունների և հետագա աշխատանքների իրականացման լեցենզիա չի ստացել Էներգետիկ ենթակառուցվածքների և բնական պաշարների նախարարությունից: Ինչպես ԱրմԻնֆո-ի թղթակցի հետ զրույցում հայտնել է նախարարության մամուլի քարտուղար Վասակ Թարփոշյանը, ընկերության հայտը ներկայումս քննարկման փուլում է գտնվում: «Մենք հայտ ենք ուղարկել Բնապահպանությնա ախարարությունը՝ շրջակա միջավայրի վրա հնարավոր սպառնալիքները պարզելու նպատակով, և հիմա սպասում ենք եզրակացությանը: Այդ եզրակացությնա հիման վրա որոշում կկայացվի լիցենզիա տրամադրելու կամ մերժելու վերաբերյալ»,-պարզաբանել է Թարփոշյանը:

Նշենք, որ սա Հայաստանի տարածքում նավթի և գազի որոնումների նպատակով երկրաբանական հետախոզությունների իրականացման արդեն երրորդ հայտն է: Առաջինը հայտ է ներկայացրել ռուսական «Ինտեգրալ» ընկերությունը, երկրորդը՝ կանադական «Ագապե» ՍՊԸ-ն:

«Հայկական նավթի և գազի ընկերություն» ՍՊԸ-ն մտնում է «Էներգո ինվեստ հոլդինգե ՓԲԸ կազմի մեջ, որի բաժնետոմսերի 90%-ը պատկանում է «Հրազդանի էներգետիկ կազմակերպություն» ԲԲԸ-ին, որոնց սեփականատերը գործարար Սամվել Կարապետյանի ընտանիքին պատկանող «Տաշիր Կապիտալե ՓԲԸ-ն է: «Էներգո ինվեստ հոլդինգե ՓԲԸ բաժնետոմսերի 5%-ը պատկանում է նախագահ Սերժ Սարգսյանի նախկին օգնական Սևակ Լալայանի կնոջը՝ Նարինե Սուվարյանին, մնացած 5%-ը՝ Մարինե Ղազարյանին:   

Նշենք, որ «Էներգո ինվեստ հոլդինգ» ՓԲԸ-ն վերջին տարիներին ընդլայնում է իր գործունեությունը Հայաստանում՝ 2016 թվականին ձեռք բերելով «Ձորագետ հիդրո» ՍՊԸ-ի 100 % բաժնեմասը: Ընկերությունը 90 % մասնակցություն ունի 530 մլն դրամ կանոնադրական կապիտալ ունեցող «Ինվեսթմենթ մեդիա գրուպ» ՍՊԸ-ում, որն էլեկտրաէներգիայի արտադրությամբ է զբաղվում: